Masalmo 91
91
Txizimu m'vhikeli wathu
1Awule a zumbako kusisalani ka Nyatxitimwi
a na humula mtsudini ka Nyamitamo,
2Ni na khani: Mkoma Ngene Txizimu txangu,
mbuthavelo wangu, mkhokhola wangu,
ni na themba kwakwe!
3Nguko Mkoma a na kuhulukisa ka mlawu wa mriyeli
ni ka mtungu wu wu dayako.
4 Mkoma a na kufenengeta ngu mitenga yakwe,
hahatshi ka tibhapi takwe
u na maneka u di tsani;
ditshuri dakwe njitxhavangu ni txitsaniso!
5Khu na mbi thava tiphango ta wusiku,
mwendo lingove lo khwinzwa ni mitshikari,
6hambi mtungu wu wu hangalakako txidemani,
ni malwati awa ma dayako ni mitshikari;
71.000 wa vathu va na wa didhawa kwako,
ni 10.000 txinene kwako,
aniko awe khu na mbi hokelwa.
8U na ti wona ngu maso ako dwe,
u wona kutsayiswa ka vathu vo biha.
9Nguko awe Mkoma, ngawe wuthavelo wangu!
Nyatxitimwi mbukhalo wako wo zumba ka wona.
10Khu na mbi manwa ngu dikhombo ni da dimwedo,
hambi mtungu ni wawumwewo
kha wu na mbi hoka ditendani kwako,
11 # Wona ni ka: Mat. 4:6; Luk. 4:10. Nguko Mkoma a na rumela tingelozi takwe kwako,
kasi ku ta ku wonelela
ka totshe tinzila tako.
12 # Wona ni ka: Mat. 4:6; Luk. 4:11. Tona ti na kuñola ngu manza a tona,
kasi ku mkondo wako
wu si ti gumuli ha dirigwini.
13 # Wona ni ka: Luk. 10:19. U na kandetela ngonyamo ni mnyoka;
ni kukandetela ngu mikondo
txingonyamwana ni mnyoka.
14Nguko Txizimu txi kha txona:
“Ni na hulukisa vale va ni randako,
ni na va vhikela,
nguko va ni ziva ti to ni Mkoma.
15Ene a na ni dhana,
se ani ni na mxamula;
ngako a di kuxanisekani,
ni na va kumweko nayo;
ni na m'hulukisa, ni mpfalisa.
16Ni na mninga kuhanya masiku amangi,
kambe ni na mkomba kuhanyisa kwangu.”
Currently Selected:
Masalmo 91: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
