Masalmo 77
77
Thavelelo ka timbimo ta kupandiseka
Disalmo da Asafe. Ka mthangeli wa vaembeleli-kasi kutisola.
1Na kwangula ka Txizimu ngu dipswi da mtamo,
na dila ka Txizimu kasiku txona txi txi ni engisa.
2Mbimo ya sikarato, na kombela ka Mkoma;
ni wusiku, na guleta manza angu
ni txi khongela, ni si karali;
moya wangu kha wu mani thavelelo.
3Ngako ni txi alakanya Txizimu, na dila;
ngako ni txi pimisela na guma mtamo.
4Awe Txizimu khu ni leki ni txi mana wukohe,
na karateka ngutu,
ni pwata ni dipswi do kuangula!
5Na khumbula masiku awa ma nga pinda,
na alakanya malembe a kale.
6Ni wotshe wusiku na pimisela mbiluni kwangu;
mbiluni kwangu na alakanyela,
ni txi ti wotisa ani nipune, ni txi khani:
7“Mkoma a nga va a txi hi tsukula do gwita kani?
Kha na mbiswa e hi themba kambe kani?
8A nga va ene a di lekile ku hi randa kani?
A nga va a di lekile txithembiso txakwe
ka liveleko ni liveleko kani?
9Txizimu txi nga va txi di divate wumbilu wa txona kani?
Txi nga va txi di henyile ngutu
aha koza wunene wa txona wu va wu di gumile kani?”
10Sekoko, ani ni ti khani: “Ati ti ni pandisako ngutu
ngu ti to Nyatxitimwi khaswi e hi khatalela kufana ni kale.”
11 Mkoma, ani na alakanya simaho sako so xamalisa;
na alakanya sidiwukiso si u nga si maha kale.
12Ni na alakanya yotshe mithumo yi u nga yi maha
ni womba-womba ngu sidiwukiso sako.
13Awe Txizimu, sotshe si u nga si maha si sawulekile;
kuwalo Txizimu txi i ku txa hombe
kupinda Txizimu txathu.
14Awe u Txizimu txi txi mahako sidiwukiso;
u wonekisile mtamo wako ka votshe vathu.
15Ngu mtamo wako u ponisile vathu vako,
i ku liveleko la Jakobe ni la Josefa.
16Mbimo yi linene li nga kuwona awe Txizimu, li to thava;
ni kutshimani ka mati ku to dhudhumela.
17Marefu ma to wisa mati a ona;
kudhuma ka singwalangwanda
ku to pfala nzumani
ni tinyangafula tako ti to humelela ka otshe madhawa.
18Kudhuma ka singwalangwanda sako ku to pfala txitimwi
kukeluka ka nzuma ku to woningeta ditiko dotshe;
mafu ma to dekadeka ma txi dhudhumela.
19U tute nzila yako hagari ka linene;
u tsimbila ngu hagari ka mati o khulunga,
aniko ni wammweyo kha nga wona mkondo wako.
20U tsimbitisile vathu vako kota m'dyisi wa mtxhambi,
ngu manza a Mosi ni Aroni.
Currently Selected:
Masalmo 77: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
