Masalmo 75
75
Txizimu, mlamuli wo lulama
Disalmo da Asafe. Ndando. Ka mthangeli wa vaembeleli-Ngu wuembeleli waku “u nga Khundumuse.”
1Ha kubonga, awe Txizimu, athu ha kubonga!
Ha dhana ditina dako; hi txi pfalisa sidiwukiso sako.
2 Mkoma a khene: “Ka mbimo yi ni no yi pima,
ni na lamula ngu kululama.
3Ngako ditiko di txi tsekatseka,
kumweko ni sotshe sivangwa si ku ka dona,
ani ni na tsanisa tiphande ta dona.”
4Ni ti khani ka sipumbu: Mi nga ti maheni sipumbu;
Ni ka vaonhi ni ti khani: “Mi nga ti maheni sihwiri!”
5“Mi nga wukeleni Txizimu,
mi nga ti maheni siphukuphuku,
ngako mi txi bwabwata.”
6Kulamula kha kuti ngu wutxani mwendo mswa-ditambo,
hambi ngu txiwulani, mwendo ngu mimangoni.
7Nguko Txizimu ngu txona i ku mlamuli:
Vamwani txa va abanisa,
aniko vamwani txa va txhatxha.
8Manzani ka Mkoma ku ni digombe
do tala ngu vhinya yo bava ya kuhenya kwakwe,
ayi ene a ningako vathu vo biha va ditiko, kasiku ve sela;
se vona va sela kala kuheta tximinye txa kona.
9Aniko, ani, ni na dhumisa Txizimu kala kupinduka;
ni na embelela ni dhumisa Txizimu txa Jakobe.
10Txona txa haxula mtamo wa vabihi,
aniko txa engetela mtamo wa vavanene.
Currently Selected:
Masalmo 75: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
