Masalmo 64
64
Kukombela kuvhikelwa masoni ka valala
Disalmo da Dhavhidha. Ka mthangeli wa vaembeleli.
1Engisa awe Txizimu, dipswi dangu ka mkombelo wangu;
hulukisa wutomi wangu
ka kuthaviselwa ngu valala vangu.
2Ni lwele ka sikungo sa vabihi;
ni ponise ka vathu vo biha va ni riyelako.
3Vale va nga lota tidimi tawe kufana ni matxhari
va txi khwinza mapswi a livengo nga tingove.
4Va baramela m'thu wo va a si nga ni mnandu,
va txi m'hophosa ngu txidhukisa va si kanakani.
5Va kujetelana hagari kwawe kumaha to biha;
ve riya milawu ve yi sisa
na va txi pimisa ti to kha nga ho wu a va wonako,
6ti to ni wammweyo kha na mbi tumbula wubihi wawe.
Aniko awule a zivako
hambi ni mipimiso ya hakhana ni minavelo yo sisala,
a na tumbula totshe.
7Aniko Txizimu txi na khwinza tingove ta txona
ha mimidini kwawe
se ngu txidhukisa txi na va fula;
8va na wiswa tingana ngu mapswi awe mapune
se avale va no va wona va na va tseketsela.
9Votshe va na thava,
se va na xawuta mtamo wa Txizimu
va txi pimisa ati txona txi nga ti maha.
10M'thu wamnene a mana litsako lakwe ka Mkoma
wa lava kuvhikelwa ngu ngene;
se votshe vathu va kululama va na tsaka.
Currently Selected:
Masalmo 64: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
