Masalmo 53
53
Kuabaniswa ka vobiha
(Disalmo 14)
Txithokozelo txa Dhavhidha. Ka mthangeli wa vaembeleli - Txo embelelwa ngu txiya txa tingoti
1 # Wona ni ka: Var. 3:10-12. Txiphukuphuku txi ti kha txona ngu mbiluni ka txona:
“Kha txi nga ho Txizimu!”
Vathu va onhekile, va maha mithumo yo nyenyeza;
kha ku nga ho ni wammweyo a mahako ta tinene!
2Txizimu txi woni vathu txi di nzumani,
kasi kuziva ti to mwendo
ku ni wammweyo a ku ni mapimo;
m'thu wu a lavako Txizimu.
3Aniko votshe va tekile tinzila to biha,
votshe ngu kufana va onhekile.
Ku walo wu a mahako ta tinene,
hambi ni wammweyo!
4Vathu vo biha, va kakatxulako vathu vangu,
kufana ni wule a dyako sakudya,
ava va si khozeliko Txizimu
ina kha va sikoti kutipima kani?
5Vona va na dhudhumela ngu kuthava,
kambe ku si nga ho mhaka ya kuthava,
nguko Txizimu txi na hangalasa
marambu a vale va ku randelako.
Awe u na va xula, nguko Txizimu txi va tshuralete.
6Oh, idiku kuhanyiswa ka Israyeli ko ta ngu Siyoni!
Ngako Txizimu txi txi wuyisa vathu va txona ngu wukhumbini,
liveleko la Jakobe li na tsaka,
vathu va ka Israyeli va na nengela.
Currently Selected:
Masalmo 53: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
