Masalmo 50
50
Kukhozela ni wutomi
Disalmo da Asafe
1Txizimu txa mtamo wotshe, Mkoma a wombile;
a rambile vaaki va ha mafuni
kukhukhela wutxani kala mswa-ditambo.
2Txizimu txa woninga kukhukhela Siyoni,
didhoropa da kutshura ko hetiseka.
3Txizimu txathu txi nata, kambe kha txi na mbi ta malala;
masoni ka txona kuhuma mndilo wo hisa ngutu,
ka otshe madhawa a txona,
ku na ni txihuhuri txa mtamo.
4Txi di txitimwi, Txizimu txa ramba nzuma ni mafu, kasi kumaha tifakazi,
nguko txi lava kulamula vathu va txona.
5“Tshanganisani votshe vale va thembekako,
avale va nga maha txitumelelano ni nani
va txi ni phaxela timhamba.”
6Hambi tinzuma ti na huwelela ti to Mkoma a lulamile,
nguko Txizimu ngu txona txi lamulako.
7“Engisani anu Vathu vangu, ni lava kuwombawomba ni,
kasi ku kuthethisa, awe Israyeli.
Ani ngani Txizimu, Txizimu txako!
8Kha ni na mbi kukawuka ngu mhaka ya timhamba,
miningelo ya sihari u ni mahelako sotshe sikhati.
9Kha ni ku kombeli ni da dimwedo ka otshe madhuna ako,
hambi tiphongo ti u ku nato sibalani kwako,
10nguko sotshe sihari sa txitinga sa ni lumba,
kufana ni sile si manekako
txitimwi ka magumi a mazana a mimango.
11Na si ziva sotshe sinyana sa mimangoni,
ni sihari so tsimbila ngu dibindi
sa txitinga si mtamoni kwangu.
12Idiku ani ni ni nzala, nga ti si laveki ku kugela,
nguko ditiko ni sotshe si si manekako ka dona sa ni lumba.
13Ina ani na dya nyama ya marole kani?
Mwendo ina na sela mnoha wa tiphongo kani?
14Mningelo wako wa ditshuri ka Txizimu
ngu ku txi bonga ni kuxayisa
sithembiso si u nga si maha ka Nyatxitimwi!
15Ni dhane, mbimo yi u ku ha kuxuphekani;
ani ni na kuhulukisa, se awe u na ni dhumisa.”
16Aniko ka m'thu wo biha Txizimu txi womba tiya:
“Ti kuvhuna txani kuwombetela milayo yangu
ni kuhuwelela yotshe mbimo txitumelelano txangu,
17na kuve khu tsaki, ngako ni txi kukawuka
wo mbi khatala ngu mapswi angu kani?
18Ngako u txi wonana ni makhokhokho wa engisana nawo,
kambe wa patana ni vale va mahako wugango!
19Wa ti toloveta yotshe mbimo kuwomba kubiha,
kambe khu kanakani kuwomba makuhu.
20U womba-womba kubiha ngu mwananu;
wa bhumisa phungo ya kubiha mwanana wa mame wako!
21U mahetete totshe tiya, aniko ani ni malate;
u pimisile ti to ani ni fana ni nawe.
Aniko ni na kudhana ni ta kulamula,
ni txi kuthethisa ngu mithumo yako yi u nga yi maha.
22Engisani ta tinene, anu mi divalako Txizimu;
kasiku ni si mi phatuleli,
ku si maneki ni wammweyo wo mi hulukisa.
23Awule a ni mahelako mphaxo wa kubonga, ni na m'guleta;
ni wule a tsimbilako ngu nzila yangu,
ni na mkomba kuhanyisa ka Txizimu.”
Currently Selected:
Masalmo 50: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
