Masalmo 39
39
Kuxaniseka ni kutisola
Disalmo da Dhavhidha. Ka mthangeli wa vaembeleli - kasi kutisola
1Ani ni to khani: Ni na xayisa tinzila tangu,
kasi ku ni si onhi ngu lidimi langu;
ni na xayisa txisofu txangu ngu matomu
mbimo yile m'bihi a ku masoni kwangu.
2Ni malate ni si wombi txilo,
kha na womba dipswi ni da dimwedo.
Aniko kupandiseka kwangu ku to engeteleka;
3mbilu yangu yi ti tura khanani kwangu!
Kuxanisekani kwangu, ku to tura mndilo mndani kwangu;
se ni wombile ni txi khani:
4“Mkoma, ni zivise magwitelo angu;
ni mtengo wa masiku angu,
kasiku ni ziva ti to ni mpindi!”
5U ni ningile kuhanya masiku amadotho ngutu;
masiku a kuhanya kwangu hi nga txilo masoni kwako.
M'thu, hambi a txi tipfa a di tsani
i mbukanganyisi wo gwita!
6Ene wa pinda kufana ni mtsudi!
Kha ti vhuni txilo kusengeletela tithomba,
na asi ti zivi ti to ti na sala ni mani.
7Ti di ngeto, Mkoma, ni na themba mani?
Ani, themba yangu ngu ngawe!
8Ni hulukise ka sotshe sihambunyeto sangu;
u nga ni mahe txisekiso ka siphukuphuku.
9Ni malate, kha ni na mbi tula txisofu,
nguko mthumo wuwa mbwako.
10U nga swe u txi ni peka;
na guma mtamo ngu kunemela ka dianza dako.
11U tsayisa m'thu kasiku e khawula ka wubihi wakwe
kufana ni sumba, awe wa fuvisa
atxile m'thu a txi dhundako ngutu.
Kunene votshe vathu mba kanganyisi dwe!
12 Mkoma, engisa mkombelo wangu,
riya nzeve u txi engisa miketo yangu!
U nga ti hunde, ngako u txi pfa kudila kwangu.
Masoni kwako ani ni nyamtangumo, ni mpindi
kufana ni votshe vakale vangu.
13U nga ni ronokele kasiku ni mana kupepa,
di sinzi kuhoka ditshiku da kufa, ni txi rura ha mafuni.
Currently Selected:
Masalmo 39: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
