Masalmo 37
37
Magwito a vakubiha, ni magwito a vavanene
Disalmo da Dhavhidha
1U nga henye ngu mhaka ya vale va mahako kubiha,
kambe u nga bavele avale va mahako ta walo,
2nguko va na wilwa kufana ni diphunde
va na wuna kufana ni mwasi wo nakana.
3Themba Mkoma, u txi maha ta tinene;
u na aka ha mafuni, u txi hanya ngu kuthembeka.
4Veka ka Mkoma minavelo yako
ene a na kuninga kuxuva ka mbilu yako.
5Ningela nzila yako ka Mkoma;
themba kwakwe, se ene a na maha totshe.
6Ene a na wonekelisa kululama kwako ni fanelo yako
kufana ni ditambo di woningako ni mitshikari.
7Themba Mkoma, u txi rinzela ene;
u nga khatale ngu vale va humelelako wutomini kwawe,
avale va humelelako ngu makungo awe o biha.
8Leka kuhenya, u nga zumbe ni dikhulo;
u nga henye, nguko eto ti va nga kubiha dwe.
9Sigevenga si na loviswa,
aniko avale va thembako Mkoma
va na mana thomba ya mafu.
10Ngu mbimoanyana ya yidotho,
khu na mbi va wona kambe vabihi;
hambi u txi tsimbila u va lava,
khu na mbiswa u va wona.
11 # Wona ni ka: Mat. 5:5. Aniko avale vo thutha va na mana mafu
va na tsaka, ve hanya ngu kudikha.
12M'thu wo biha a maha sikungo sa kuwukela awu i ku wam'nene
a gegeresela makwasa akwe ngu kuhenyela ene.
13Aniko Mkoma wa m'seka,
nguko wa tiziva ti to masiku akwe ma komile.
14Vobiha va swomola ditxhari dawe, ve domba wulaho,
kasi kudaya txisiwana ni txikulungu,
kasi kudaya avale va londetako nzila ya yinene.
15Kambe ditxhari dawe di na va thola mbilu yawe vapune
se wulaho wawe wu na komolelwa.
16Si na ni lisima ngutu sa sidotho asi m'thu wo lulama a ku naso
kupinda tithomba tatingi ta vabihi.
17Nguko Mkoma wa funyeletela mawoko a vabihi,
e tsanisa ava va mahako ta tinene.
18 Mkoma wa xayisa vathu vo lulama;
liveleko lawe kha li na mbi guma.
19Kha va na mbi va ni tingana ka masiku a sikarato,
ka masiku a nzala, vona va na khura.
20Aniko vaonhi va na fuva;
valala va Mkoma va na hya
kufana ni mwasi wa kuoma
va na hangalaka kufana ni wutshi.
21M'thu wa kubiha wa lomba, kambe kha diheli,
aniko m'thu wo lulama ana ni wumbilu ni wuha.
22Avale Mkoma a nga va katekisa va na mana mafu,
aniko avale a nga va singitela va na fuviswa.
23 Mkoma wa komba vathu nzila yakwe
wa vhikela avale va mtsakisako.
24Mlulami hambi a txi wa, kha weli mphelo,
nguko Mkoma a na mñola ngu diwoko e mu wusa.
25Ni ti mfana, se konkuwa ni kumbile,
kambe kha ni zivi kuwona m'thu wo lulama e lekwa wusiwanani,
hambi vanana vakwe kha ni zivi
ku va wona ve kombela sakudya.
26Yotshe mbimo ene i m'thu wa wumbilu ni wuha;
vanana vakwe va katekile.
27Thava wubihi, u txi maha ati i ku ta tinene,
se u na hanya kala kupinduka.
28 Mkoma a randa kululama
ene kha leki vathu va va mthembako.
Ene wa va vhikela yotshe mbimo,
aniko liveleko la vabihi li na fuviswa.
29Vathu vo lulama va na dya thomba ya mafu,
va na xayiseka ka ona yotshe mbimo.
30Txisofu txa m'thu wo lulama
txi womba mapswi a wutxhari;
lidimi lakwe li womba mapimo amanene.
31Ene ana ni mlayo wa Txizimu mbiluni kwakwe,
ngu kumaha keto, mikondo yakwe kha yi rithimuki.
32M'thu wo biha a mbzwingamela m'thu wo lulama
a lava makungo a ku m'daya;
33aniko Mkoma kha na mbi mleka
a txi wa manzani ka mlala,
kambe kha na mbi mleka a txi konwa kulamulwani.
34Themba Mkoma, u londeta tinzila takwe
ene a na kuguleta, e kuninga mafu awa
me maha thomba yako;
awe u na ti wona ngu maso ako
mbimo yi va no fuviswa vabihi.
35Ni woni m'thu wo biha
a txi ti kukumukisa ngu mtamo,
e nava kufana ni mndonga wa mazokoro o nyuka;
36kambe a mwalate: Khe ngadi a txi hanya;
ni mlavile, aniko kha na mmana.
37Wona m'thu wo thaviseka,
wonisisa m'thu wo lulama;
m'thu wo dikha a na va ni vatukulu.
38Aniko vaonhi votshe va na fuviswa;
liveleko la vabihi li na loviswa.
39Kuhanyiswa ka valulami kuta ngu ka Mkoma,
ngene wuthavelo wawe ka timbimo ta sikarato.
40 Mkoma wa va vhuna ni ku va hulukisa;
ene wa va vhikela ka vabihi, a txi va hanyisa,
nguko vona va themba ene.
Currently Selected:
Masalmo 37: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
