Masalmo 34
34
Wunene wa Txizimu
Masoni ka mfumeli Abhimeleki, Dhavhidha a ti hundile a txi nga wo bharuka, se ngu mhaka yeto, Abhimeleki a mtutumisile. Msana ka kuva a di khukhile, a to bhala Disalmo diya ene Dhavhidha.
1Ni na dhumisa Mkoma yotshe mbimo;
ni na huwelela wudhumo wakwe
ngu txisofu txangu, ni si gwiti.
2 Mkoma ngene wudhumo wangu!
Vathu va i ku sisiwana va na engisa,
kambe va na tsaka ngu mhaka ya toneto.
3Huwelelani ni nani wuhombe wa Mkoma;
a hi embeleleni hotshethu, hi txi m'dhumisa.
4Ni lavile Mkoma, se ene a ni xamute,
a txi ni hulukisa kambe, aha ka dizowa dangu.
5Avale va mu wonako va na tala ngu litsako;
kha va na mbi va ni kuwiswa tingana.
6Ngako txisiwana txi txi dhana
Mkoma, ene wa txi xamula,
kambe wa txi hulukisa ka sotshe sixaniso.
7Ngelozi ya Mkoma ya vhikela
avale va mthavako
yi va hulusa ka tiphango.
8 # Wona ni ka: 1 Ped. 2:3. Duketani mipune mi txi ti wona
to Mkoma mbwa mnene;
a katekile m'thu wule a thembako ene!
9Thavani Mkoma, anu
motshenu vasawuleki vakwe,
nguko kha ku pwateki txilo ka wule a mthavako.
10Vanyatithombe va maha sisiwana,
va pfa nzala, aniko ni txa tximwetxo
kha txi pwateki ka vale va lavako Mkoma.
11Vanangu, ngonani, mi ta ni engisa:
Ni na mi gondisa kuthava Mkoma.
12 # Wona ni ka: 1 Ped. 3:10-12. Ngu wuhi m'thu wu asi randiko wutomi kani?
Awule asi dhundiko kuhanya ngu mbimo yayingi kani?
13Ngu kota yeto, hambana ni kuruketela:
Txisofu txako txi nga thuke txi womba makuhu.
14Hambuka ka wubihi, u txi maha ti i ku ta tinene;
lava kudikha ngu kutimisela.
15Maso a Mkoma ma wonetela vo lulama
ni tinzeve takwe ti engisela huwa yawe.
16Kuhenya ka Mkoma ku txitimwi ka vabihi,
kasiku ve fuva ha ditikoni, ve divalwa.
17Vo lulama va dhana Mkoma
se ene wa va pfa, a txi va hulukisa,
ka sotshe sixaniso sawe.
18 Mkoma a hafuhi ka vale
va ku kupandisekani ka mbilu;
ene wa hanyisa avale va si swiko va di ni kuthemba.
19Vathu vo lulama va dukwa ngu sixaniso so tala,
aniko Mkoma wa va hulukisa ka sotshe.
20 # Wona ni ka: Joh. 19:36. Mkoma wa vekisa otshe marambu awe:
Ni da dimwedo kha di na mbi funywa.
21Vathu vo biha va fa
ngu wubihi wawe;
avale va nyenyako vo
lulama va na tsayiswa.
22 Mkoma wa tirula wutomi
wa vale va mthumelako;
avale va mthembako kha va na mbi tsayiswa.
Currently Selected:
Masalmo 34: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
