Masalmo 27
27
Kuthemba Txizimu
Disalmo da Dhavhidha
1 Mkoma ngene kuwoninga kwangu
ni kuhanyisa kwangu.
Ni nga thava mani kani?
Mkoma i mkhokhola wa kuhanya kwangu.
Ni nga dhukiselwa ngu mani kani?
2Ngako vathu va kubiha va txi ni wukela
ve zama ku ni daya,
ngu vona valala vangu va humbwako va txi wa.
3Hambi ngako dibutho da yimbi di txi ni randela,
kha ni na mbi va ni dizowa;
hambi ngako valala ve xoma va txi ni talela,
ani ni na maneka ni di tsani.
4Tximaha tximwetxo ni kombelako ka Mkoma,
tximaha tximwetxo ni txi navelako;
ni navela kuzumba Nyumbani ka Mkoma
otshe masiku a kuhanya kwangu,
ti to ni txi pfa lirando la Mkoma
ni mkhozela Nyumbani kwakwe.
5Ngako ma txi ni hokela masiku a kubiha,
Moma a na ni lwela;
ene wa ni sisa nyumbani kwakwe;
a na ni hulukisa ngu ku ni veka txitimwi ka dirigwi.
6Ti di halo, ni na sikota kuguleta msungo wangu
txitimwi ka valala vangu;
ni na sikota kuphaxa mhamba yangu
mu Nyumbani ka Txizimu,
ni peka mkulungwani wa litsako
ni kuembelela tindando to dhumisa Mkoma.
7Ni engise, Mkoma, ngako ni txi kukombela txivhuno;
telwa ngu wumbilu ngu ngani, u txi ni xamula!
8“Mbilu yangu ya ni gela, yi txi kha yona:
Tsula u txi ya wonana ni Mkoma;”
Ina, ani ni lava ku kuwona, Mkoma!
9U nga ni tshuralele! U nga ni henyele!
Ngawe wekha u ku m'vhuneteli wangu! U nga ni leke.
U nga ni tshotshe, awe Txizimu, Muhanyisi wangu.
10Hambi idiku tate wangu ni mame wangu vo ni leka,
Mkoma a na ni xayisa.
11Ni gondise, Mkoma, ati u ti lavako ni ti maha,
u ni tsimbitisa ngu nzila yo lulama,
nguko valala vangu mbavangi.
12U nga ni ningele ka valala vangu,
avale va ni wukelako ngu makuhu
ve phika ku ni mahela tshofu.
13Kambe ani, na themba ngu kutsanisa
ti to ni na wona wunene wa Mkoma
ditikoni ka va va hanyako.
14Themba Mkoma!
Tsanisa, u nga thave txilo,
themba Mkoma!
Currently Selected:
Masalmo 27: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
