Masalmo 148
148
Kudhumisa ka sotshe Mkoma Txizimu
1Dhumisani Mkoma!
Dhumisani Mkoma, mi di nzumani;
m'dhumiseni mi di txitimwi ngutu!
2Mu dhumiseni, motshenu tingelozi takwe;
mu dhumiseni, motshenu sivangwa sa nzumani!
3M'dhumiseni awe ditambo ni mtxima;
m'dhumiseni motshenu tinyeleti ti phatimako!
4Mu dhumiseni, anu tinzuma ta tinzuma.
M'dhumiseni, anu mati a txitimwi ka tinzuma!
5Motshenu dhumisani ditina da Mkoma,
nguko ene a to veka mthetho,
se ku txi tumbunuka sotshe sivangwa.
6Ene a vekile sotshe makhaloni ka sona kala kupinduka
asi ningile mlayo,
awu si tandekako ku wu eyisa!
7Anu sivangwa sa ha mafuni, dhumisani Mkoma;
m'dhumiseni, anu sihari so thisa sa linene
ni kutshima ka lona;
8tinyangafula ni maralala,
hunguva ni txyandela;
moya wa hombe wu engisako dipswi dakwe;
9yotshe mimango ni situnga;
yotshe mindonga ya mihando ni mikedhari;
10sotshe sihari sa txitinga
ni mitxhambi ya sifuyo;
sihari sa kutsimbila ngu dibindi
ni sotshe sinyana si purumako.
11M'dhumiseni, anu vafumeli va ditiko
ni nanu motshenu vathu;
motshenu tinduna ni valamuli va mafuni;
12mazambi ni mahorana
vo kumba kumweko ni vavadotho!
13Hi nga dhumisani ditina da Mkoma,
nguko ditina dakwe ngu dona di guletwako;
wudhumo wakwe wu txitimwi ka nzuma ni mafu!
14Ene a ningile mtamo ni mfumo ka vathu vakwe,
kasiku vasawuleki vakwe va txi m'dhumisa;
vona vanana va ka Israyeli,
i ku ngamu yakwe a yi randako.
Dhumisani Mkoma!
Currently Selected:
Masalmo 148: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
