Masalmo 147
147
Kudhumisa Txizimu txa Mtamo-Wotshe
1Dhumisani Mkoma!
Nguko ndinene kuembelela hi dhumisa Txizimu txathu;
Atiya ta tsakisa, kudhumisa Txizimu ngu fanelo.
2 Mkoma wa wuseta Jerusalema
e tshanganisa ngamu ya Israyeli,
yi nga ti hangalakile.
3Ene wa tangalisa timbilu ta vale va nga khuveka
a txi bhanditxha silonda sawe!
4Ene wa bala mtengo wa tinyeleti
e raya ditina ka yimwani ni yimwani.
5Mbwa hombe Mkoma wathu,
kambe mbwa mtamo wa hombe;
wuzivi wakwe kha wu na magwito.
6 Mkoma wa xayisa sisiwana,
aniko wa wisa hahatshi avale va mahako kubiha.
7Embelelani ka Mkoma, mi ninga kubonga;
embelelani kudhumisa
ka Txizimu txathu ngu haripa.
8Ngene a fenengetako nzuma ngu marefu,
a lulamisa mati kasiku mewa ha mafuni
kambe wa milisa mwasi txitimwi ka mimango;
9a ningako ka sihari sakudya sa sona
ni ka mavhondo a magwana,
mbimo yi ma dilako.
10Kha tsakiswi ngu mtamo wa dihantxhi
hambi kutsaka ngu
txikuluveta txa wamwamna.
11 Mkoma a dhunda avale va m'thavako,
avale va thembako lirando lakwe.
12Jerusalema, dhumisa Mkoma,
Siyoni, dhumisa Txizimu txako.
13Ene wa tsanisa sikhoto sa matimba ako
e katekisa vanana vako va ku mndani kwako.
14Wa tsanisa kudikha mndani ka mihingano ya ditiko dako
a txi kukhurisa ngu fulaho ya yinene.
15Wa rumela mithetho yakwe ha mafuni
dipswi dakwe da kuluveta kuhangalaka;
16wa wisa hunguva yo basa nga matoya a tinvuta,
e hangalasa maralala nga dikhuma;
17wa wisa maralala o nga sirigwana
kuwalo m'thu wu a tsanelako pheho ya kona.
18Ngu msana wa rumela dimwani dipswi,
se maralala me nyivilika;
wa ruma diphuho, di txi futeta,
se mati ma txi khulunga.
19Ene wa rumela mahungu akwe ka va ka Jakobe,
mithetho yakwe ni milayo yakwe ka va ka Israyeli.
20Ene kha ti maha tiya ka mamwani matiko,
kha ma tulela kuziva mithetho yakwe.
Dhumisani Mkoma!
Currently Selected:
Masalmo 147: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
