Masalmo 144
144
Ndando ya mfumeli
Disalmo da Dhavhidha
1A na dhumiswe Mkoma i ku dirigwi dangu!
Awu a gondisako manza kulwa,
ni titiho tangu kuya yimbini.
2Ene i Mthaveleli wangu,
mkhokhola wangu, wuthavelo wangu;
ngena mtiruli wangu ni m'vhikeli wangu,
awu ni thembako kwakwe;
ngene a ni ningako mtamo wa kufuma vathu.
3 # Wona ni ka: Job. 7:17-18; Mas. 8:4. Mkoma, nji txani m'thu,
koza u txi mualakanya kani?
Njitxani mwanana wa m'thu,
kasiku u txi mkhatalela kani?
4M'thu a fana ni wukanganyisi;
masiku akwe ma fana ni mtsudi wu wu pindako.
5 Mkoma, releta nzuma yako u txhika;
gwesa mimango, kasi ku yi na tuvika.
6Dhindisa tinyangafula tako u txi va tshatulela;
khwinza tingove tako
u txi va hangalasa ve thava.
7U di kona txitimwiyo, nawuluta manza ako,
ni thavise u ni hulukisa ka mati awa amangi,
ni manzani ka vanana va vamatiko,
8avava sisofu sawe si wombawombako wukanganyisi,
ni manza awe a txinene ma xambanyako makuhu.
9Kwako awe Txizimu, ni embelela ndando ya yiphya;
ngu haripa ni txiya txa digumi da tingoti,
kwako ni na embelela ni kudhumisa.
10Awe u ningako vafumeli mtamo wa kuxula,
u ponisako txithumi txako Dhavhidha, ka ditxhari di dayako
11Ni txhatxhise u ni thavisa ka manza
a vanana va vamatiko,
avale sisofu sawe si wombawombako wukanganganyisi
avale manza awe a txinene i ku a wubihi.
12Kasi ku vanana va vathu,
va na fana ni mindonga,
yi yi kulako yi anda i di ngadi yiphya;
vanana vathu vamahorana va na fana
ni marigwi a makhonani o vatelwa
nga tinyumba ta nyumba ya wukoma,
13kasi ku sizenda sathu si tala ngu sotshe so elulwa;
kasi ku mitxhambi yathu yi na velekela
ngu magumi a mazana, ni magumi a magumi a mazana,
amu ka mabhudhula kwathu.
14Tihomu tathu ti na have kwati, ti txi ena.
Mikhokhola yathu kha ya dolwa,
kha ku nga ni kuyiswa kupayulwani,
kha ku nga ni kudila maphangoni kwathu.
15Va katekile vathu va ti mahekako tiya kwawe!
Va katekile vathu vava, Txizimu i ku Mkoma wawe!
Currently Selected:
Masalmo 144: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
