Mavingu 24
24
-19-
1U nga bavele vathu vo biha, hambi ku navele kuve navo, 2nguko timbilu tawe ti alakanyela wubihi, ni sisofu sawe si womba-womba kubiha.
-20-
3Nyumba yi akwa ngu wutxhari, kambe yi tsaniswa ngu mapimo amanene; 4se ngu mhaka ya wuzivi, tinyumba ti na tala ngu siya sa lisima, so tshura ngutu.
-21-
5Wamwamna wo txhariha a tsani ngutu, kambe wamwamna wo ziva a ni mtamo ngutu. 6Nguko ngu sileleto sa wutxhari wa sikota kulwa yimbi; kutala ka sileleto ka ninga kuxula.
-22-
7Wutxhari wu txitimwi ngutu, kha wu manelwi ngu txiphukuphuku; txi tandeka ni kutula txisofu banzani.
-23-
8Awule a ti ningetetelako kumaha to biha, va na m'dhana ku kha vona mkhulumeteli. 9Mapimo a txiphukuphuku nja kuonho dwe, kambe mtseketseli njinyenyeko ka vathu.
-24-
10U txi ti wona u txi relela ngu ditshiku da xomulo, tikomba ku khwa tsana.
-25-
11Hulukisa vale va ndindelwako dawani, ngako u txi sikota ku va thavisa. 12Ngako u txi khawe: Kha hi ti zivi; ina awule a xolako timbilu, kha na mbi ti tumbula kani?
-26-
13Dyana wulombe mwanangu, nguko mbunene, ni txihesa txa wulombe, txa lombela mkanani kwako. 14Wu na nga toneto wuziva wa wutxhari dihikani kwako; ngako u txi wu mana, ku nava ni hakhelo kwako, kambe khu na mbi komiselwa kuverela kwako.
-27-
15Awe m'bihi, u nga baramele m'ti wa m'thu wo lulama, hambi kuhanda nyumbani kwakwe. 16Nguko awule wo lulama hambi a txi wa mtxhanu ni kumbidi, ngu magwito a na wuka; aniko vabihi va na ti gumula kubihani.
-28-
17Ngako a txi wa mlala wako, u nga tsake, hambi a txi ti gumula, yi nga tsake ngutu mbilu yako; 18kasiku Mkoma asi ti woni eto, e maneka a ti bihile masoni kwako, se e vayilelisa kuhenya kwakwe masoni ka m'thu wule.
-29-
19U nga ti xanise ngu mhaka ya vamahi va kubiha, hambi kubavela vaonhi. 20Nguko m'bihi kha na mbi va ni hakhelo ni ya yimweyo, kambe dilambu da vo biha di na timeka.
-30-
21Mwanangu, thava Mkoma, ni mfumeli, kambe u nga ti wulete ka vale va lavako kuwusa kulwa. 22Nguko valala, kha va na mbi swela kumwalala, hambi dirumbi dawe, i mani a no swa e di ziva kani?
Mamwani mavingu a titxhari
23Aawa ni ona, ngu ona mavingu titxhari. Hi nga ta tinene kulamula ngu kuwona khohe.
24Awule a wombako ka muonhi, a txi khene: U lulamile, vathu va na mruka, a na nyenywa ngu matiko. 25Aniko avale va no mkawuka, va na tsaka, se txitimwi kwawe ku nava ni kukateka ka hombe.
26Mpswopswa ngu txisofu, awule a xamulako mapswi amanene.
27Tshurisela mithumo yako hahanze, u yi hetisela thembweni, sekoko aka nyumba yako.
28U nga fakaze ta kwa mbi tiziva, u wukela mwakelani wako; nguko u na mkanganyisela txani ngu txisofu txako kani? 29U nge khawe: Nga tonti a nga ni mahela, nani ni na mmahelisa toneto; mmweyo ni mmweyo ni na mtshumetela madingano ni mithumo yakwe.
30Ni pindile ngu thembweni ka mkara, kumweko ni mivhinyani ka m'thu wo pwata mapimo; 31wona taku yotshe thembwe yi ti ti tate ngu mipa, yi ti tshuletwe ngu mimwasi, madhawani ku ti wite diguma da marigwi. 32Mbimo yile ni nga ti wona tile, ni to khani; se ni to wonisisa ni gonda to kari. 33Wukohyana wa wudotho, kuotelanyana, u petanyana mawoko mbimoanyana, ku va u maneka u di otete. 34Wusiwana wu nata txitimwi kwako, kufana ni dikhamba, ni kupwata kwako, kufana ni wamwamna wu a nga xoma.
Currently Selected:
Mavingu 24: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
