Mavingu 23
23
-6-
1Mbimo yile u khalahatshako udya kumweko ni mfumeli, wonisisa kha kwati sile si ku masoni kwako; 2Dyana kha kwati, u nga ti mahe wa makolo. 3U nga navele sakudya sakwe so tshamba ngutu, nguko dipawu da wukanganyisi.
-7-
4U nga ti karatele kuva nyatithombe; ninga wukhalo wo khata wutxhari wako. 5Ina u nga dhuka u ronokela sa kuva i si nga sa txilo kani? Nguko eso si na ti mahela tibhapi si purumela nzumani kufana ni digama.
-8-
6U ngadye sakudya sa wule a ku ni maso a wutona, hambi kunavela sakudya sakwe so tshamba ngutu. 7Nguko a ti a nga ti alakanya, ti mbiluni kwakwe; ene a na kugela ku khene: Dyana kha kwati u sela; na kuve mbilu yakwe kha yi nga ni nawe. 8U na kosa sakudyanyana sile u nga dya, ni kuluzekelwa ngu mapswi ako o bonga.
-9-
9U nga womba-wombe tinzeveni ka txiphukuphuku, nguko txi na txhipisa mapswi ako a wutxhari.
-10-
10U nga thavise mihingano ya kale kambe u nga wulelele tithomba ta vo felwa ngu vaveleki, 11nguko Mtiruli wawe mbwa mtamo; ene a na va emela, se awe e kuwukela.
-11-
12Ningetetela mbilu yako kulaywani, ni tinzeve tako ka mapswi a wuzivi.
-12-
13U nga leke kulaya mwanana, nguko u txi mkwapa ngu limhika, kha na mbi fa ngutu. 14Awe u na mkwapa ngu limhika, u hulukisa dihika dakwe kuya kufani.
-13-
15Mwanangu, ngako mbilu yako yi di txharihile, yangu mbilu koko yi na tsaka, ina, mbilu yangu yipune. 16Yi na tsaka ngutu mbilu yangu, mbimo yile txisofu txako txi no womba mapswi a ditshuri.
-14-
17Mbilu yako yi nga bavele vaonhi; kukhata ninga txithavo ka Mkoma, otshe masiku. 18Nguko u na va ni magwito amanene; themba yako kha yi na mbi lova.
-15-
19Engisa, awe mwanangu, txhariha, mbilu yako yi na tsimbile ngu nzila ya yinene. 20U nga maneke hagari ka vaseli va vhinya, hambi hagari ka vathu va txinyamanyama. 21Nguko didevi ni m'thu wa lidyo, va na wa wusiwanani; kambe wukohe wu na va ambeka wusakato.
-16-
22Engisa tate wako wule a nga kuveleka, kambe u nga txhipise mwamwako mbimo yile a no kumba. 23Xava wunene, aniko u nga wu xavise; ina, wutxhari, gondo, ni kupimisisa. 24Tate wa m'thu wo lulama a na tsaka ngutu, ni wule a velekako txhari, a na yi tsakela. 25Va na tsake tate wako ni mwamwako, kambe a na tsake ngutu wule a nga kuveleka.
-17-
26Mwanangu, nihe mbilu yako, kambe maso ako ma na wonisise tinzila tangu. 27Nguko wamsikati wa digelegele diphala do hokoma, kambe njisima txo songa, ka mmwani m'thu. 28Kambe ene, a fana ni dikhokhokho, mbwo zumba ni kusolelela, e andisa vaonhi hagari ka vathu.
-18-
29I mani a ku ni dikhombo kani? I mani a ku xomuloni kani? I mani a ku ni mazunga kani? I mani a ti tsetsako kani? I mani a ku ni silonda hahanze ka mnandu kani? I mani wa maso o bhilivila kani? 30Ngu vale va zumbako kuselani ka vhinya, vale va tsimbilako ve lava wusuke wo patelwa. 31U nga yi wone walo vhinya, kule yi wonekisako kubhilivila, mbimo yile yi pupumako mu ka dijingo yi thekelela kha kwati. 32Ngu magwito ka kona yi na luma kufana ni mnyoka, yi gwaya kufana ni mamba. 33Maso ako ma na wonetela vavasikati vavane, se mbilu yako yi na womba-womba wubihi. 34U na nga m'thu wo otela hagari ka linene, hambi ku nga wule a nga otela tshokani ka phande 35se u na khawe: Va ni balisete, aniko kha na kupfa kupanda; va ni pekile, kambe ni ya tipfa; ni na wuka yihi mbimo kani? Ni na tsula niya yi lava kambe.
Currently Selected:
Mavingu 23: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
