Mavingu 20
20
1Vhinya mtseketseli, ni wusuke wu vangisa diguwa; ni wihi wule a ti ningetetelako ka wona, kha na mbi maha wo txhariha.
2Kuthisa ka mfumeli kufana ni kubhonga ka ngonyamo; awule a mwuselako kuhenya, o lwisa muhefemulo wakwe apune.
3Wa dhundeka m'thu wule a vayilelako mazunga.
4Mkara kha dima ngu mbimo ya wuxika, ngu kumaha keto, ngu mbimo yo funyela a na kombela, aniko kha na mbi amukela txilo.
5Silayelo mbiluni ka m'thu, si fana ni mati o mita; kambe m'thu wa mapimo, a na ma kota kuretha.
6Hagari ka vathu mmweyo ni mmweyo a pfalisa wunene wakwe; kambe i mani a nga mmanako m'thu wo thembeka kani?
7M'thu wo lulama a tsimbila ditshurini kwakwe; va na kateka vanana vakwe vale va mu engisako.
8Mfumeli a txi khalahatsha txituluni ka wulamuli, wa kuluveta kuwona mnandu ha wu ku kona.
9Ina aho waku a nga khene: Ni basisile mbilu yangu, ni kuwutwe sionho sangu!
10Tipimo timbidi to hambana, ni mipimo yimbidi yo hambana, nzinyenyeko ka Mkoma, tximwetxo ni tximwetxo ka sona.
11Hambi mwanana a zivaneka ngu mithumo yakwe, ngako mithumo yakwe i ti ya yinene ni kululama.
12Nzeve yi yi engisako, ni diso di di wonako, ngu wumbidi wa sona si mahilwe ngu Mkoma.
13U nga rande wukohe, kasi ku u si ti wuleti wusiwanani; tula maso ako, u na so khura ngu dipawu.
14Kha si vhuni txilo, kha si vhuni txilo, kuwomba mxavi, aniko a txi khukha a na ti guleta.
15Ku ni nzalama ni marigwi amangi a lisima; kambe lisima la hombe li ka txisofu txa wuzivi.
16Awule a tumelako kudiha mnandu wa m'thu wo mbi m'ziva, a na thavise syambalo sakwe.
17Dipawu da wukanganyisi da mtshambela m'thu, aniko msana keto, mkanani kwakwe ku na tala ngu sibwinzyana sa mafu.
18Otshe makungo ma tsaniswa ngu wusungukati; kambe yimbi yi tsimbitiswa ngu wusungukati wa wutxhari.
19M'thu wo tolovela malengo, wa humisa txihunja; ngu toneto, u nga ti patanise ni m'thu wo lalata.
20Awule a rukako tate wakwe mwendo mwamwakwe, a na timekelwa ngu dilambu dakwe, se a na zumba ka txidema txa hombe.
21Thomba yo yi mana ngu txikuluveta kukhatani, magwito a kona kha ma nga ni kukateka.
22U nga wombe ku khawe: Ni na tshumetela wubihi; themba ka Mkoma, se ene a na kuhulukisa.
23Tipimo timbidi to hambana njinyenyeko ka Mkoma, ni sikalo so kanganyisa hi nga sa sinene.
24Mazambo a m'thu ma tsimbitiswa ngu Mkoma; sekoko m'thu a nga yi zivisa kutxani nzila yakwe apune kani?
25Mlawu ku kuluvetela kuwomba u txi khawe: Ti sawulekile; ni kutshumela u kana-kana msana ka kuxambanya.
26Mfumeli wo txhariha wa wona wu a ku ni mnandu, e mtshinda ngu dirigwi do tsana.
27Dihika da m'thu, dilambu da Mkoma kwakwe, adile di wonako kotshe mndani ka m'thu.
28Wunene ni ditshuri ngu sona si xayisako mfumeli, se wukoma wakwe wu tsaniswa ngu wunene.
29Kutshura ka majaha ku mtamoni ka ona; se wudhundo wa sikosana ngu wunvi wa sona.
30Mikhwimbiriti ya silonda yi sawulekisa vo biha, kumweko ni kupandisa kule ku wulelako mndani.
Currently Selected:
Mavingu 20: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
