Mavingu 19
19
1Txisiwana txi txi tsimbilako ka ditshuri da txona txi txhuko, kupinda txiphukuphuku txa txisofu txo tseketsela.
2Ni kona kuzumba moya wu si nga ni wuzivi hi nga ta tinene; ni wule a tutumako ngu mikondo yakwe wa onha.
3Wuphukuphuku wa m'thu wu na timeta nzila yakwe, se mbilu yakwe yi na henyela Mkoma.
4Tithomba ta manisa vangana vavangi, aniko txisiwana, txa lekwa ngu mngana wa txona.
5Fakazi ya makuhu kha yi na mbi va ni ditshuri; ni wule a wombawombako makuhu, kha na mbi huluka.
6Vo tala va dilela khohe ya dixonga da mfumeli, na kuve mmweyo ni mmweyo mngana wa wule a mningako txokari.
7Votshe vanawe va txisiwana va txi nyenya; ngutu-ngutu vangana va txona, va na tshuketela kule! Txa va londeta ngu kututuma txi va dhana, aniko kha va txi vhuni ngu txilo.
8Awu a manako mapimo wa randa muhefemulo wakwe; awule a xayisako wutxhari a na mana wunene.
9Fakazi ya makuhu kha yi na mbi huluka kutsayiswa; se ni wule a wombawombako makuhu, a na lova.
10Ka txiphukuphuku kha kulaveki kuzumbiseka; ngutu-ngutu ka txithumi kuva txi fuma ka vathangeli!
11Mapimo amanene ma sisa kuhenya ka m'thu; se kudhundeka kwakwe ngu kuretha sihoheto.
12Kuhenya ka mfumeli, kufana ni kubhonga ka txingonyamwana; aniko wunene wakwe wu fana ni mwando txitimwi ka mwasi wo nakanna.
13Mwanana wo mbi engisa i xomulo ka tate wakwe, ni kututelwa ka mwamwakwe ko mbi gwita.
14Nyumba ni silo ngu sona i kuthomba ya vatate ka vanana; aniko wamsikati wamnene ata ngu ka Mkoma.
15Wukara wa maha m'thu e otela wukohe wo tshima, kambe m'thu wo kanganyisa a na fa ngu nzala.
16Awule a vekisako mlayo, a na vekisa muhefemulo wakwe; aniko awule a txhipisako tinzila ta tinene a na fa.
17Awule a ningako ka txisiwana o lombisa ka Mkoma, se ene a na tshumetelwa dibhindu da kona.
18Tsayisa mwanana wako ku di ngadi ni themba, aniko u txo m'daya, khu na mbi wusa moya wakwe.
19M'thu wa txihenyisani a na dawa ngu txona; nguko u txi mtxhatxhisa, u na tshumela u maha toneto kambe.
20Engisa sileleto, u amukela kukawukwa, u na va txhari ka masiku ako o gwitisa.
21Mbiluni ka m'thu ku ni timhaka tatingi, aniko txileleto txa Mkoma txi na zumba yotshe mbimo.
22Dibhindu da m'thu ngu tile a ti navelako; kambe txisiwana i txhuko kupinda wa makuhu.
23Kuthava Mkoma ka yisa kuhanyani; awule a mthavako a na enelelwa, kambe kha na mbi telwa ngu dikhombo ni da dimwedo.
24Mkara wa sisa dianza hammidi; e tandeka ni ku di yisa mkanani.
25Tsayisa mtseketseli, se awule wa txiphuta a na gonda wutxhari; kawuka txhari, yi na gonda wuzivi.
26Awule a xanisako tate wakwe mwendo kuxanisa mame wakwe, mwanana wo thela tingana, ni kupwata txithavo.
27Ema kuengisa gondo mwanangu, ngako yi txi kuvayilelisa ka mapswi a wuzivi.
28Fakazi ya Bheliyali yi tseketsela wululamo, se txisofu txa muonhi txi mita wubihi.
29Wulamuli wu emisetwe vatseketseli, ni sisephu ka makata a siphukuphuku.
Currently Selected:
Mavingu 19: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
