Mavingu 1
1
Lisima la Mavingu
1Mavingu a Solomoni, mwana Dhavhidha, mfumeli wa Israyeli.
2Kasi ku na ziva ngu ona wutxhari ni gondo; kasi ku na pfisisa mapswi o pimeka; 3kasi kuamukela gondo ya wutxhari, wululamo, kulamula, ni kudinganisa; 4kasi kuninga wutxhari ka vale vo kelelelwa ngu mapimo, ni kuninga vale vavaphya maalakanyo amanene; 5kasi ku txhari yi engisa, ni kukula mu ka wutxhari, ni ku awule a gondiswako e mana sileleto sa wutxhari; 6kasi kupima mavingu ni ku ma txhamusela ka kona, kumweko ni mapswi a titxhari, ni kuhutetela ka kona.
7Kuthava Mkoma, ngona makhato a wuzivi; siphukuphuku sa txhipisa wutxhari ni gondo.
Sileleto ka mazambi
8Mwanangu, engisa gondo ya tate wako, kambe u nga leke sileleto sa mwamwako. 9Nguko sona si na va m'bhoti wa wunene ha msungo kwako, ni wusekenya thamoni kwako.
10Mwanangu, ngako vaonhi va txi ku kujetela, u nga va tumelele. 11Va txi kha vona: Tsimbila ni nathu, hi baramela vathu, hi duka vale vo pwata mnandu, 12a hi va miteni va txi hanya, ku nga ho va mayiva, votshe nga vale va relelako diphalani; 13hi na mana totshe tixaka ta tithomba totshura; hi na tata tinyumba tathu ngu so handa; 14tisa dikato dako hagari kwathu; hotshethu hi na abanelana ngu kudingana.
15Mwanangu, u nga tsimbile navo ngu tinzila tawe; vayilelisa mkondo wako ka tisoko tawe. 16Nguko minenge yawe yi tutumela to biha, kambe va kuluveta kutheketa mnoha. 17Ngu ditshuri, mlawu wo riyelwa u txi wonwa ngu sinyana, kha wu vhuni txilo. 18Se vona va riyela kutheketa mnoha wawe vapune; ve baramela wutomi wawe vapune. 19Edo ngu dona ditshuri da vale va ti ningetetelako mu ko navela; kunavela ku na ñola dihika da vale va ku ni kunavela.
Txiziviso txa Wutxhari
20 # Wona ni ka: Mav. 8:1-3. Wutxhari wa hombe wa kwangula hahanze; wa guleta dipswi da wona tinzilani. 21Amu ku nga sengeletana vathu vavangi, da kwangula; amu sitaratoni ni sikenini ka madhoropa, wutxhari wa pfalisa mapswi a wona:
22Anu siphukuphuku, mi na randa wuphukuphuku wanu kala yihi mbimo kani? Ni nanu vatseketseli, mi na randa kutseketsela kani? Se anu siphukuphuku mi na venga wuzivi kani? 23Hundulukani ngu mhaka ya kukawuka kwangu; wonani taku ni na thela moya wangu txitimwi kwanu, kambe ni na mi maha mi ziva mapswi angu. 24Ani ni mi dhani, aniko anu mi lambile; nguko ni nawulutile diwoko dangu, aniko kha ka maneka wo pfisisa; 25anu mi to khata kulamba sileleto sangu, kambe kha ma tumela kukawuka kwangu; 26se nani ni na mi seka ni ku mi poyilela kutimelani kwanu, na ku txi hoka ati ti no mi maha mi thava. 27Kuthava kwanu ku txi ta kufana ni mxaseli, ni xomulo yanu yi txi na mi timeta, ku txi ta tximwi kwanu kutxikwa, ni xomulo. 28Sekoko mi na ni dhana, aniko ani kha ni na mbi xamula; mi na ni lava ngu mabimbi-kutxa, aniko kha mi na mbi ni mana. 29Ngako mi nga venga wuzivi, kambe kha ma lava kuthava Mkoma; 30kha ma si lava sileleto sangu, kambe mi kanetile kotshe kulaya kwangu. 31Ngu konaho, va na dya mihando ya mahanyelo awe, kambe va na khuriswa ngu sileleto sawe vapune. 32Nguko avale vo pwata mapimo va na dawa ngu kutimela kwawe, se kuhumelela ka siphukuphuku ku na va fuvisa. 33Aniko awule a no ni engisa a na hanya ngu kutsana, kambe a na humula mu ko thava kubiha.
Currently Selected:
Mavingu 1: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
