Nehemiya 8
8
Ezra ngako a txi gonda Dibhuku da Mlayo ka vathu
1Se ku di hokile mtxima wa wutxhanu ni yimbidi, vanana va ka Israyeli va di madhoropani kwawe, vathu votshe va to sengeletana ngu mbilu yimweyo, ka mtendela wu ku masoni ka Txike txa Mati; se ve gela mabhalani Ezra, ti to e neha dibhuku da Mlayo wa Mosi, a di Mkoma a nga ti ti leletete Israyeli. 2Se mphaxeli Ezra a to neha Mlayo masoni ka msengeletano, ka vavamna, ni vavasikati ni ka totshe titxhari ti ti no pfisisa mbimo yi di no gondwa, ngu ditshiku do khata da mtxima wa wutxhanu ni yimbidi. 3Se a to di gonda a di masoni ka mtendela, wu wu ku masoni ka Txike txa Mati, kukhukhela ni mixo kala mitshikari, masoni ka vavamna, ni vavasikati ni titxhari; se tinzeve ta votshe vathu ti ti kuengisani ka dibhuku da Mlayo.
4Se Ezra, mabhalani, a to ema txitimwi ka wurathu wa mapulango, va nga ti ti wu mahete mthumo wule. Hafuhi kwakwe ngu didhawa da txinene ku ti ti emile Matitiya, ni Xema, ni Anaya, ni Uriya, ni Hilikiya, ni Mahaseya; se ka didhawa da txibhabha ku ti ni Pedhaya, ni Mixayeli, ni Malikiya, Hasumi, ni Hasibhadhana, ni Zakariya, ni Mesulamu.
5Se Ezra a to tula dibhuku masoni ka votshe vathu; nguko a ti ti txitimwi ka votshe vathu; se mbimo yi a nga tula dibhuku, vathu votshe va to khukha va txi ema. 6Se Ezra a to dhumisa Mkoma, Txizimu txa hombe; vathu votshe va to xamula va txi “Amen! Amen!” Na va txi guleta mawoko; se va to khizama ve khozela Mkoma, va di namisile tikhohe hahatshi.
7Se Jesuwa, ni Bhani, ni Serebhiya, ni Jamini, ni Akubhe, ni Sabhetayi, ni Hodhiya, ni Mahaseya, ni Kelita, ni Azariya, ni Jozabhadhi, ni Hanani, ni Pelaya, ni Valevhi va to gondisa Mlayo ka vathu, na vathu va di ha makhaloni kwawe. 8Se va to gonda dibhuku, ka Mlayo wa Txizimu, ngu ku junyatisa ni kutxhamusela, kasi ve kota kupfisisa ti ti gondwako.
9Se Nehemiya, wu i nga ti mfumeli ni mphaxeli Ezra, mabhalani, ni Valevhi vale va nga ti gondisa vathu va to kha vona ka votshe vathu: Ditshiku diya di sawulekile ka Mkoma Txizimu txanu, ngu toneto mi nga titsetseni, hambi ku ti dilela. Nguko votshe vathu va to dila va txi pfa mapswi a Mlayo. 10A to va gela kambe ku khene: Tsulani mi ya tidyela tinyama to nona, mi sela ni so lombela, mi rumela sakudya ka vale va nga mba ti longisela txilo; nguko ditshiku diya di sawulekile ka Mkoma wathu; ngu toneto mi nga ti xanise, nguko kutsaka ka Mkoma mtamo wanu.
11Se Valevhi va to malata votshe vathu, va txi kha vona: Malalani, nguko ditshiku diya ndo sawuleka; ngu mhaka yeto, mi nga ti xaniseni. 12Sekoko, vathu votshe va to tsula veya dya ve sela, ve rumela sakudya ka vamwani, ve maha m'buso wa hombe, nguko va pfisisile mapswi ale va nga gelwa ona.
Mbuso wa Midhuti
13Se mangwanani ka kona, ku to sengeletana vathangeli va vatate va votshe vathu, vaphaxeli ni Valevhi, ka Ezra, mabhalani, kasi kuya engisisa mapswi a Mlayo. 14Se va to ya mana ku di bhatwe ha Mlayoni tile Mkoma a nga leletela Mosi tito, vanana va ka Israyeli va na zumbe midhutini, ve mahela kona m'buso wa mtxima wa wutxhanu ni wumbidi.
15Ngu ma mahelweyo va to zivisa ni kutxhumayela ka madhoropa awe otshe ni Jerusalema va txi kha vona: Humani mi ya mmangoni mi ya funya madhavi a muolivha, ni madhavi a zambhujero, ni madhavi a murita, ni madhavi a mitxhese, ni madhavi a mindonga ya hombe, mi ti akela midhuti madingano ni ti ti nga bhalwa.
16Sekoko vathu va to tsula, veya lava matshanzu ve ta ti mahela midhuti yawe, mmwani ni mmwani txitimwi ka nyumba yakwe, ni digumani kwakwe, ni mitendelani ka Nyumba ya Txizimu, ni ka mtendela wa Txike txa Mati, ni ka mtendela wa Txike txa ka Efrayime. 17Se wotshe msengeletano wa vale va nga wuya ngu wukhumbini va to maha midhuti va zumba ka yona; nguko vanana va ka Israyeli va si khali kumaha, kukhukhela ka masiku a Joxuwa, mwana Nune, kala ka ditshiku dile, se ku to maneka kutsaka ka hombe. 18Se ditshiku ni ditshiku, a ti ti gonda dibhuku da Mlayo wa Txizimu, kukhukhela ditshiku do khata kala ka do gwita. Se va to maha m'buso wa mtxhanu wa masiku ni mambidi, ngu ditshiku da wutxhanu ni mararu, va to maha m'buso wo vhala, madingano ni kuruma ka mlayo.
Currently Selected:
Nehemiya 8: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
