Nehemiya 12
12
Txhatxhameto ya vaphaxeli ni Valevhi
1Avava mbaphaxeli ni Valevhi va va nga wuya ni Zorobhabheli, mwana Selatiyeli, ni Jesuwa: Seraya, Jeremiya, Ezra, 2Amariya, Maluke, Hatusi, 3Sekaniya, Rehumi, Mermoti, 4Idho, Ginetoyi, Abhiya, 5Miyamini, Mahadhiya, Bhiliga, 6Semaya, Joyaribhe, Jedhaya, 7Salu, Amoki, Hilikiya, e Jedhaya;
avava i ti ti vathangeli va vaphaxeli ni va vanawe, ka masiku a Jesuwa.
8Se Valevhi ngu vava:
Jesuwa, Bhinuyi, Kadhimiyeli, Serebhiya, Judha ni Mataniya; avava ni vanawe va ti thangela mthumo wa kudhumisa.
9Se Bhakebhukiya ni Uni, vanawe, va ti ti masoni kwakwe ko wonelela.
Liveleko la Jesuwa, Mphaxeli wa Hombe
10Se Jesuwa a to veleka Joyakimi, Joyakimi a to veleka Eliyasibhe, Eliyasibhe a to veleka Joyadhi, 11se Joyadhi a to veleka Jonatani, Jonatani a to veleka Jadhuwa.
Vathangeli va mitxawa ya mimwaya ya vaphaxeli
12Se ka masiku a Joyakimi, ku ti ni vaphaxeli, vathangeli va tinyumba ta vatate: Ka Seraya, mphaxeli i Meraya; ka Jeremiya, i Hananiya; 13ka Ezra, i Mesulami; ka Amariya, i Jowanani; 14ka Maluke, i Jonata; ka Sebhaniya, i Josefa; 15ka Harimi, i Adhina; ka Merayoti, i Helikayi; 16ka Idho, i Zakariya; ka Ginetoni, i Mesulami; 17ka Abhiya, i Zikiri, ka Miniyamini ni ka Mohadhiya, i Pilitayi. 18Ka Bhiliga, i Samuwa; ka Semaya, i Jonata; 19se ka Joyaribhe, i Matenayi; ka Jedhaya, Uzi; 20ka Salayi, i Kalayi; Amoki, i Hebheri; 21ka Hilikiya, i Hasabhiya; ka Jedhaya, i Netaneli.
Bhalela ya mimwaya ya vaphaxeli ni Valevhi
22Matina a Valevhi vale i nga ti vathangeli va tinyumba ta vatate, ka masiku a Eliyasibhe, ni Joyadha, ni Jonani, ni Jadhuwa, ma bhatwe; ni a vaphaxeli, kala kufumani ka Dhariyo, mupersiya.
23Vanana va Levhi, vathangeli va tinyumba ta vatate, va bhatwe dibhukuni ka makronika, kala ka masiku a Jowanani, mwana Eliyasibhe.
Kuabaniselwa ka mithumo Dithepeleni
24Ndiva koko vathangeli va Valevhi: Hasabhiya, Serebhiya, ni Jesuwa, mwana Kadhimiyeli; se vanawe va ti masoni kwakwe, va txi dhumisa ni kuninga kubonga, madingano ni kuleleta ka Dhavhidha, m'thu wa Txizimu.
25Mataniya, Bhakebhukiya, Obhadhiya, Mesulami, Talimoni ni Akubhe i ti vaxayisi vo woneleta sike sa tinyumba to veka ka tona siya.
26Avava mba masiku a Joyakimi, mwana Jesuwa, wa mwana Jozadhake, ni masiku a Nehemiya, mfumeli, ni ka masiku a mphaxeli Ezra, mabhalani.
Kuningelisiswa ka maguma
27Se ka mbimo ya kuningelisiswa ka diguma da Jerusalema, ku to lwa Valevhi ka otshe makhalo awe, kasi ku ta maha mthumo wo ningelisisa ngu kutsaka, va txi dhumisa, ni tindando, ni sitende, misengele ni tiharipa. 28Se vanana va vaembeleli va to sengeletana, va libalani li li nga ranganyetako Jerusalema, ni va mikhokhola ya Netofa, 29kumweko ni va nyumba ya Giligali, ni va tithembweni ka Gibheya, ni Azimavhete; nguko vaembeleli va ti ti akete mikhokhola madhawani ka Jerusalema. 30Se vaphaxeli ni Valevhi va to ti sawulekisa; koneko va to sawulekisa vathu, ni matimba ni diguma.
31Sekoko ni to kweta vathangeli va ka Judha txitimwi ka diguma, se ni veka mitxawa yimbidi ya hombe ya vaembeleli.
Mtxawa wumwewo ngu didhawa da txinene txitimwi ka diguma, ka didhawa da Txike txa Ditalani. 32Se ngu msana kwawe, ku ti londeta Hosaya, ni hafu ya vathangeli va ka Judha, 33ni Azariya, ni Ezra, ni Mesulami, 34ni Judha, ni Bhenjamini, ni Semaya, ni Jeremiya; 35ni vamwani va vanana va vaphaxeli, va nga ti ni mipundu: Zakariya, mwana Jonatani, mwana Semaya, mwana Mataniya, mwana Mikaya, mwana Zakuri, mwana Asafe, 36ni vanawe, i ku Semaya, ni Azareli, ni Milalayi, ni Gilalayi, ni Mahayi, ni Netaneli, ni Judha, ni Hanani, ni sivetaveta sa Dhavhidha, m'thu wa Txizimu; se Ezra, mabhalani, a ti thangete masoni kwawe. 37Va di hokile ka Txike txa Txisima ngu masoni kwawe, va to kwela ha dinerani ka Didhoropa da Dhavhidha ngu ha ko kwela ngu kona diguma, kukhukhela txitimwi ka nyumba ya Dhavhidha an'ze ka Txike txa Mati, ngu didhawa da wutxani.
38Se mtxawa wa wumbidi wa vaembeleli wu to thangela, se ani ni londeta msana ka wona; kambe hafu ya vathu yi to tsimbila ngu txitimwi ka diguma, kukhukhela ka Txitezi txa Sikho, an'ze ka Diguma da kuanama; 39se kukhukhela ka Txike txa Efrayime, ni kukhukhela ka Txike txa Kale, ni kukhukhela ka Txike txa Sihaka, ni ka Txitezi txa Hananeli, ni ka Txitezi txa Meya, an'ze ka Txike txa Sifuyo; se va to ya ema ka Txike txa Mkorani.
40Sekoko, mitxawa yiya ya yimbidi ya vaembeleli, yi to ya ema Nyumbani ka Txizimu, kumweko ni nani, ni hafu ya valamuli vale ni nga ti navo. 41Se vaphaxeli Eliyakimu, Mahaseya, Miniyamini, Mikaya, Eliyohenayi, Zakariya ni Hananiya i ti ti vatxhayi va mipundu, 42kufana kambe ni Mahaseya, ni Semaya, ni Eleyazari, ni Uzi, ni Jowanani, ni Malikiya, Elame, Ezeri; se vaembeleli va ti ti embelela kumweko ni Jeziraya, mthangeli.
43Ka ditshiku donedo va to maha mphaxo wa hombe, ve tsaka, nguko Txizimu txi ti ti va ningile litsako la hombe. Se vavasikati ni vanana va to tsaka ni vona. Ngu mamahelo eyo kutsaka ka Jerusalema ku to pfala kule.
Sakudya sa vaphaxeli ni Valevhi
44Ka ditshiku donedo ku to sawulwa va xayisi va sibhiya sa tithomba, miningelo yo ndiwitelwa, ni mihando yo khata, sa wugumi, ve sengeleta ka sona, madingano ni tithembwe ta madhoropa, ni makhalo a ma nga vekwa ngu Mlayo wa vaphaxeli ni Valevhi; nguko Judha a ti ti tsaka ngu mhaka ya mthumo wa vaphaxeli ni wa Valevhi. 45#Wona ni ka: 1 Mak. 25:1-8; 26:12. Se va to thumela Txizimu txawe ni kumaha mithumo ya kubasisa vathu; va ti thuma kufana ni vaembeleli, ni vawoneleli va sike, madingano ni kuruma ka Dhavhidha ni ka mwanana wakwe Solomoni. 46Nguko ka masiku a Dhavhidha ni a Asafe, kukhukhela ka kale ku ti ti ni vathangeli va vaembeleli, ni tindando to dhumisa ni to bonga Txizimu. 47Sekoko ka masiku a Zorobhabheli ni ka masiku a Nehemiya, votshe va ka Israyeli va ti ti ningela sakudya sa vaembeleli ni sa vawoneleli va sike, ka mmweyo ni mmweyo ngu ditshiku dakwe; se va ti ti si sawulekisela Valevhi, ni vona Valevhi ve si sawulekisela vanana va Aroni.
Currently Selected:
Nehemiya 12: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
