Jobe 6
6
Xamulo ya Jobe
(Sipimo 6 ni 7)
Ngu hanya muni ku si nga ni themba kani?
1Sekoko Jobe a to xamula, a txi khene:
2O! I ti ku kupandiseka kwangu ngu ditshuri ko pinda, se kuxaniseka kwangu ku txi vekwa txikaloni!
3Nguko ngu ditshuri, ku da nemela ngutu, kupinda mtxhefa wa lineneni;
ngu toneto ti mahako mapswi angu ma si pfisiswi.
4Nguko na fulwa ngu tingove ta wule wa Mtamo-wotshe,
se moya wangu wa setwa wuxungu wa tona wo hisa;
ni kuhenya ka Txizimu ka ni xomela matxhari.
5Ina yi nga dhuka yi emba mangwa ka mwasi wo nakana kani?
Ina homu yi nga bhoma yi ti bhuwani kani?
6Ina ku nga dyiwa so pwata mnyu, i ku sa ditonde kani?
Niku mwendo di nga tshamba dianda do basa kani?
7Moya wangu wa lamba kugwesa mapswi anu,
nguko ma fana ni sakudya so ni venga m'busoni kwangu.
8Sikwangu i tiku ta maheka toneto!
Ni kuva Txizimu txi ni ninga sile ni si verelako!
9Ni kuva Txizimu txi ti ti lavile ku ni peka,
txi nawuluta dianza da txona txi ni hetisa!
10Kambe ni ndi na tsaka ni kupepa,
kuxuphekani kwangu ni si ti tsetsi,
nguko kha na lamba mapswi a Msawuleki.
11Ngu wuhi mtamo wangu woza ni themba wona kani?
Niku ngu ahi magwito angu, aku ni ku ngadi ni hanya kani?
12Ina mtamo wangu i nga va i ti mtamo wa dirigwi kani?
Niku mwendo mmidi wangu i nga va wa koporo kani?
13Ina ni nga sikota ku ti vhuna nipune kani?
Ina kha na tutumwa ngu sivhuno so tsana kani?
Vangana vangu va ni henyisile
14Mngana a txi dingana kukombisa kupfela wule a xanisekako,
hambi a di lekile ku ve ni txithavo,
ka wule wa Mtamo-wotshe.
15Vanathu va ni amukete ngu wuviyaku,
va nga txinambwana, nga mati a sinambwana maphwako.
16Si nga tshulelwa ngu marigwi a pheho,
i kumo yi sisalako kona hunguva.
17Mbimo yile yi nyekiswako ngu lisani, ya hangalaka;
se ngu kupfa kufutumela,
ya mwalala ka wukhalo wa yona.
18Sitimela sa mati, sa leka tinzila ta sona;
si tsula txizivani si txi ya lova.
19Avale va tsimbilelako Tema, va si wona,
vaendi va Sabha va sikota ku si wona.
20Va wisilwe tingana, nguko va ti ti ni kuthemba,
msana keto va to mana dikhodho.
21Konkuwa mi fana navo;
mi woni to mi dhukisa, mi thavile.
22Ina eko ani ni ti nga khani kwanu:
Mahani siningo kwangu ngu tithomba tanu kani?
23Mwendo ku khani:
Ni txhatxhiseni manzani ka mkhozisi kani?
Mwendo kambe ku khani:
Ni tiruleni manzani ka sidayi kani?
Mi nga ni koneni
24Ni gondiseni, se ni na malala;
ni pimiseni tile ni nga onha.
25O! Mapswi a ditshuri ma ni mtamo ngutu!
Aniko nji txani txi xolako tximangalo txanu kani?
26Ina mi nga dhuka mi mana mapswi o ni laya ngu ona,
eko ditshuri da m'thu wo gwitelwa,
di fanako ni moya kani?
27Aniko, kukhata, mo xaxuvela tixolo txikulungu,
mi dyelelwa, mi ningela walo mngana wanu.
28Sekoko ngako mi txi wuyelwa, ni woneni;
mi na wona to mwendo na womba makuhu masoni kwanu.
29Tshumelani koko, ku nga veho kubiha;
ina, wuyani, nguko mhaka yangu yi lulamile.
30Ina ku nga va ku ti ni wubihi ka lidimi langu kani?
Ina mkanani kwangu kha ku pfalisi wusiwana wangu kani?
Currently Selected:
Jobe 6: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
