Jeremiya 49
49
Kukonwa ka va ka Amoni
1Txisolo ka vanana va Amoni, Mkoma a womba tiya:
Ina Israyeli kha nga ni vanana, kha nga ni sidya-thomba kani? Ngu kutxani koko Malkami a lumbwako ngu Gadhi ni vathu vakwe e zumba madhoropani ka kona kani? 2Ngu toneto, mata masiku, kuwomba Mkoma, aha ni no pfalisa diguwa da yimbi ya Rama yo wukela vanana va Amoni, a na maha mmumbu wa marumbi ni makhalo ya a ma fumelako ma na hiswa ngu mndilo; Israyeli a na lumbwa ngu vale a nga txi va lumba, kuwomba Mkoma. 3Peka huwa awe Hesibhoni, nguko wa hasamulwa Ayi; huwelelani anu vanana va Rabha, tipambiyeteni ngu masaka, dilani, horolokelani maguma; nguko Malkami a naya wukhumbini, kumweko ni vaphaxeli vakwe ni tinduna takwe. 4Ngu kutxani u txi ti dhumisa mikovani, ka mikova yako yo tshura, awe mwanana wa txigevenga u thembako tithomba tako, u txi khawe: 5I mani a nota ni wukela kani? Wona ti taku ni na tisa kuthava txitimwi kwako, kuwomba Mkoma wa Mabutho a Tiyimbi, ka votshe va va nga kurandela; mi na tshotshwa hahanze, mmweyo ni mmweyo a na lava kuthangela, kha ku nga ni wu a no tsanisa vamwani.
6Aniko msana ka tiya, ni na tshumeta tikhumbi ta vanana va Amoni, kuwomba Mkoma.
Kukonwa ka Edhomi
7Txisolo xungetano ni Edhomi. Mkoma wa Mabutho a Tiyimbi a womba tiya:
Ku ngava ku si ngadi ni wutxhari Temani kani? Ina si lovile silayelo sa titxhari kani? Wu bhirete wutxhari wawe kani? 8Pfhukani, wuyani, zumbani kusisalani, anu mi zumbako Dhedhani, nguko ni wuyisile kwakwe dirumbi da Esawu, mbimo yile ni nga mu endela. 9Va txo dhuka va txi ta kwako vahaphi va mauvha, kha va na kusiyeta okari kani? Ina makhamba kha ma na ku ta kuxasela ni wusiku ngu ku phindeletisa kani? 10Aniko mbimo yile ni nga tutumisa Esawu, ni ti ko tumbula sihunja sakwe, kha na mbi sikota kusisala, ku na hasamulwa vanana vakwe, kumweko ni vanawe, ni vaakelani, se asi swi i di ene. 11Leka sikulungu sako, ani ni na si xayisa si txi hanya; ni tinoni tako ti na themba kwangu.
12Nguko Mkoma a khene:
Wonani ti taku avale va nga sa emiselwa kusela dijingo, va di sela ngu ditshuri, se ina awe u nga huluka ngu ditshuri kani? Khu na mbi huluka, ngu ditshuri u na di sela. 13Nguko ni xambanyile ngu ngani nipune, kuwomba Mkoma, taku Bhozira i nava ditiko da txixamaliso, da tingana, da xomulo, di hasamulwako; ni otshe madhoropa akwe ma fuva da magwito.
14Ni pfite diguwa di txi ta ngu ka Mkoma, di txi kha dona ku ni mtumi wu rumwako ka matiko, kuya kha wona: Sengeletanani, mwukeleni, khukhani mi txi tsula yimbini. 15Nguko wona ti to ni kumahile wam'dotho hagari ka matiko, wa kutxhipiswa hagari ka vathu. 16Kasi ngu mhaka ya mathiselo ako, kutikukumukisa ka mbilu yako ku kuxengile. Awe u zumbako mibhalani ka marigwi, u manekako txitimwi ka mimango, hambi u txo guleta txisaka txako nga digama, ni na kukhundumusa koneyo, kuwomba Mkoma.
17Ngu toneto, Edhomi a na va txixamaliso; ni wihi a no pinda ngu kona a na xamala, a na veta mloti ngu mhaka ya sikarato sa kona. 18Ku na nga kukhundumuswa ka Sodhoma ni Gomora, ni ka vaakelani vakwe, kuwomba Mkoma: Kha ku na mbi zumba m'thu eho, hambi ku mwanana wa m'thu e aka kona. 19A na woneka sixaxani Jordhani nga ngonyamo, a txi lwisa wukhalo wa mtamo; nguko, ngu mbimwanyana, ni na mtutumisa hale; niku i mani ni no msawula ni txi m'veka txitimwi kwakwe kani? Nguko i mani a fananako ni nani! I mani a no ni vekela mbimo kani? I mani m'dyisi wu a no ni tsiveta kani? 20Ngu toneto, pfanani sileleto sa Mkoma, asi ene a nga si emisela Edhomi; ni kuxuva kwakwe ngu vaaki va Temani: Ngu ditshuri ava vavadotho hagari ka tinvuta va na ndindwandindwa. Ngu ditshuri ku na fuviswa tinyumba tawe. 21Mafu ma zinginikile ngu diguwa da kuwa kwakwe; ni huwa yakwe, yi pfate hambi ka Linene lo Bhilivila. 22Hi nga wonani ti to wata, a txi puruma ku nga digama, a na nawuluta tibhapi takwe txitimwi ka Bhozira; ni mbilu ya tindena ta Edhomi, ka dona ditshiku dile, yi na nga mbilu ya wamsikati wu a lumwako!
Kukonwa ka Dhamasku
23Xungetano ngu Dhamasku, a vile ni tingana Hamati ni Aripadhe, ni mbimo yile va nga pfa mahungu a maphya o biha, va to tsivala; lineneni ku ni kuxaniseka, kuwalo kuthutha. 24Dhamasku a hetile mtamo; a tshurate, a lava kututuma, a ñotwe ngu kuthava: Xomulo ni kupandiseka si va ñote, kufana ni ka wolava kuhefemula. 25Di nga va di sa siwa didhoropa diya da nduma, i ku didhoropa da kunitsakisa kani? 26Ngu konaho majaha akwe ma na wa tinzilani ka ona; ni votshe vavamna va yimbi va na loviswa, ka dona ditshiku dile, kuwomba Mkoma wa Mabutho a Tiyimbi. 27Ni na dhivela mndilo digumani ka Dhamasku, awu wu no hisa tinyumba ta hombe ta Bhenadhadhi.
Kukonwa ka Kedhari ni ka Hazori
28Xungetano ngu Kedhari, ni mifumo ya Hazori, avale va nga pekwa ngu Nebhukodhonosori, mfumeli wa Bhabhilona. A khene kha Mkoma:
Khukhani, kwelani mi txi ya khundumusa Kedhari, ni kuhangalasa vanana va Wutxani. 29Va na hamdwa, matenda awe, sifuyo sawe, mijiyo yawe, ni siya sawe, va na honyolwa makameli awe; va na va mahela diguwa: Kuho kuthava ngu ka otshe madhawa!
30Tutumani, pengani mi tsula kule ngutu, zumbani kusisalani, anu vaaki va Hazori, kuwomba Mkoma; nguko Nebhukodhonosori, mfumeli wa Bhabhilona, a mahile txikungo txa ku mi wukela, a wombile mapswi a ku mi lwisa. 31Khukhani, kwelani mi txi wukela ditiko do thutha, di zumbako ngu kuthemba, kuwomba Mkoma; amu ku kuwalo matimba, hambi sikhweketo, vona va zumba vokha. 32Makameli awe ma na honyolwa, ni sifuyo sawe sasingi si na handwa: Ni na va hangalasa ka otshe madhawa ava va nga wila misisi yawe ya mabambe, se ngu ka otshe madhawa ni na va mahela marumbi, kuwomba Mkoma. 33Se Hazori a na va dizumbo da madragoni, ngu kufuviswa ka yotshe mbimo; kha nga ho a no zumba hale, kambe kha ku na mbi maneka mwanana wa m'thu.
Kulamulwa ka Elame
34Dipswi da Mkoma di nga ta ka Jeremiya mprofeti, da kusola Elame, kukhatani ka kufuma ka Zedhekiya, mfumeli wa Judha, di txi kha dona: 35Mkoma wa Mabutho a Tiyimbi a khene:
Wonani ti taku ni na funya wulaho wa Elame, i ku makhato a mtamo wakwe. 36Ni na tisa txitimwi ka Elame, mune wa mimoya ya mune wa makhona a nzuma, se ni na yi hangalasa yi londisa mimoya yiya yotshe; kambe kha di na mbi vaho ditiko di va no mbi tutumela ka dona va ka Elame. 37Ni na maha ti to Elame e thava masoni ka valala vakwe, ni ka votshe vale va xotako ku m'daya; ni na tisa wubihi txitimwi kwakwe, txiviti txa kuhenya kwangu, kuwomba Mkoma; se ni na rumela ditxhari, kala di txi va fuvisa. 38Wukoma wangu ni na wu veka kona Elame; se ni na fuvisa vafumeli ni vathangeli vawe, kuwomba Mkoma. 39Ngu toneto, ku na maheka ka dimwedo da masiku o gwitisa, ti to ni wuyisa tikhumbi ta Elame, kuwomba Mkoma.
Currently Selected:
Jeremiya 49: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
