Jeremiya 48
48
Kuhasamulwa ka Mowabhi
1Xungetano ngu Mowabhi, a womba tiya Mkoma wa Mabutho a Tiyimbi, Txizimu txa Israyeli:
Dikhombo da Nebho, nguko a hasamutwe!
Kiriyatayimi a wisilwe tingana, kambe a honyotwe;
Misigabhe a wisilwe tingana, kambe wa xamala.
2Wudhundo wa Mowabhi hi nga ngadi wona kambe;
aniya Hesbhoni va mmahete txikungo, va txi kha vona:
“Ngonani hi ta va fuvisa kasi va si nga ngadi vathu kambe;
na nawe Madhimeni, u na hasamulwa;
u na londiselwa ngu ditxhari.”
3Ka pfala tihuwa kona Haronayime:
Ta dirumbi ni kuhasamulwa ka hombe!
4Mowabhi a hasamutwe;
vanana vakwe va pfate kudila.
5Nguko aha va no kwela Luhite
va na engetekelana kudila;
nguko kutxhika kwawe ngu Horonayime,
valala va Mowabhi va pfite kudila ka hombe.
6“Tutumani mi txi hulukisa wutomi wanu,
nga timbongola ta txitinga!”
7Nguko, ngu mhaka ya ku u thembako mithumo yako ni tithomba tako,
na nawe u na xulwa;
Kemoxe a na yiswa wukhumbini,
kumweko ni vaphaxeli ni vathangeli.
8Nguko a nata mxaseli txitimwi ka didhoropa dimwedo ni dimwedo,
kha ku na mbi huluka ni da dimwedo, mkova wu na lova,
ku na onhetelwa lotshe libala; nguko Mkoma a wombile.
9Mningeni tibhapi Mowabhi;
nguko a txi puruma a na huma,
ni madhoropa akwe ma nave marumbi,
kha na mbi zumba m'thu.
10A ruketetwe wule a mahako mthumo wa Mkoma ngu wukanganyisi!
A ruketetwe nene wule asi lekiko kutheketa mnoha ngu ditxhari.
Kukhundumuswa ka madhoropa a Mowabhi
11Mowabhi a ti ti zumba kuthuthani kukhukhela ha wuphyani kwakwe, a zumbile tithombani kwakwe; kha nga thaviswa ka txiya a txi vekwa ka tximwani, kambe kha tsuliswa wukhumbini; ngu mhaka yeto a xayisile wunene wakwe, ni kubhumula kwakwe kha nga txitxa.
12Ngu konaho, mata masiku, kuwomba Mkoma, aya ni no rumela ngu ka ona vatheketeli, ava va no maha ti to vathu ve tsimbila ngu mazambo a hombe; va nata tshakunutela siya sawe ni ku bhandelela misava yawe. 13Mowabhi a nave ni tingana ngu Kemosi, nga kule nyumba ya ka Israyeli yi nga pfa tingana ngu Bheteli, txithembo txakwe.
14Mi nga wombisa kutxani mi txi khanu:
Hi tindena hi ni mtamo wa kulwa kani?
15Mowabhi a hasamutwe kumweko ni madhoropa akwe,
majaha akwe ma tsulisilwe kudawani, a womba eto Mkoma,
awu ditina dakwe i ku Mkoma wa Mabutho a Tiyimbi.
16Ku hafuhi ni kuta kumwalalelwa ka Mowabhi;
ka kuluveta kubiha kwakwe.
17Xanisekani kumweko nayo,
anu motshe mi ku madhawani kwakwe,
ni nanu motshe mi zivako ditina dakwe.
18Txhika ngu mfumoni kwako,
u txi khalahatsha mu ka kuoma,
awe muaki, mwana Dhibhoni;
nguko muhasamuli wa Mowabhi a ku hokete,
a tshungunulete maguma ako.
19Ema hanzila u txi xiya,
awe u zumbako Aroweri: Wotisa ka wule a tutumako;
ni ka wule a nga huluka u txi khawe: Ku to maheka txani kani?
20Mowabhi a wisilwe tingana nguko a funyilwe;
dilani mi txi peka huwa;
zivisani Arnoni ti to Mowabhi a hasamutwe.
21Ni kona kulamulwa kutile txitimwi ka ditiko da libala: Ka Holomi, Jaza, ni ka Mefaate; 22ni txitimwi ka Dhibhoni, ni ka Nebho ni ka Bheti-Diblatayime, 23ni txitimwi ka Kiriyatayimi, Bheti-Gamuli, ni ka Bheti-Meyoni, 24ni txitimwi ka Keriyote, Bhozira, kala ka otshe madhoropa a ditiko da Mowabhi, a kule ni a hafuhi. 25Mtamo wa Mowabhi wu wilekile, ni kufunywa diwoko dakwe, kuwomba Mkoma.
Ditiko da Mowabhi di mahile txisekiso
26Mleviseni nguko a ti kulisile masoni ka Mkoma;
Mowabhi a na tshumelela ka makosa akwe, se ene a na xaniswa. 27Ina Israyeli kha xaniswa ngu ngawe kani? Ina a to manwa kupani kani? Ti mahisa kutxani aha u wombawombako ngene u txi seka kani?
28Lekani madhoropa, tsulani mi txi ya zumba marigwini, anu mi zumbako Mowabhi; mahisani ku nga tile txituvani txi akisako tona txisaka txa txona, ha txikeni ka diphala. 29Hi pfite kuwomba ngu mabava a Mowabhi, wa livengo ngutu, wo ti guleta ni kutikulisa, e ti veka txitimwi, ni ku ti gwilikisa ngu mbilu. 30Ani na kuziva kuhenya kwakwe, kuwomba Mkoma, hambiko eto hi nga ta txilo: Makuhu akwe kha ma na mbi maha txilo. 31Ngu kota yeto, ni na xanisekela Mowabhi; ina ni na diliswa ngu Mowabhi, nguko vavamna va Kiri-Heresi va na vilela. 32Ni na ku dilelisa ku nga ti ta Jazeri, awe mndonga wa Sibhima; madhavi ako ma pindile linene, ma hokile ka Linene la Jazeri; aniko muhasamuli a wite txitimwi ka mihando ya mbimo ya malanga, ni thembweni kwako. 33Kutsaka ni kunengela si thavisilwe thembweni ko nona ni ditikoni ka Mowabhi; nguko ni mahile ti to yi guma vhinya mapipani: Kha va na mbi rukuta mauvha ngu kutsaka: Kutsaka ku na maha tihuwa.
34Ku pfate huwa ya Hesibhoni kala Eleyale ni Jahazi, ni kukhukhela Zowari kala Horonayime, di pfate dipswi dakwe, nga dirole da malembe mararu; nguko hambi mati a Nimrime, ma nava ma ti phwite. 35Ni na fuvisa vale va phaxelako ni kuhisa dibaselo ka sizimu sawe txitimwi ka Mowabhi.
36Ngu toneto, yi na pfalisa ku nga tshodi mbilu yangu ngu vavamna va Kiri-Heresi; na va di luzile mpfuno wu va nga sengeleta. 37Nguko wotshe msungo wu na va ligwayi, otshe maletu ma di hungutwe; kotshe manzani ku na sehelelwa, ni masaka siwununi kwawe. 38Txitimwi ka totshe tinyumba ta Mowabhi ni mu ka tinzila takwe ta hombe ku na vaho tihuwa ta hombe; nguko ni fayile Mowabhi nga fuko ya kwa mbi tsakisa, kuwomba Mkoma. 39Eto a nga fayeteliswa tona! Eto a pekisako tona tihuwa! Mowabhi a tshurarile, kambe a tinganani! Se Mowabhi a na sekwa ni ku xamalwa ngu votshe vale va ku madhawani kwakwe.
Mowabhi kha na mbi sikota kuhuluka
40Nguko Mkoma a khene: Wonani, mlala a na puruma ku nga digama, a txi gwimba tibhapi takwe txitimwi ka Mowabhi. 41Ma tekwa madhoropa, ni kurandelwa mikhokhola: Yi na va mbilu ya tindena ta Mowabhi, ka dona ditshikwedo, ku nga mbilu ya wamsikati wu a diliswako ngu kupanda. 42Mowabhi a na hasamula, va si ngadi vathu; ngu mhaka yo tikulisa masoni ka Mkoma. 43Msanekera, diphala ni kuthava sata txitimwi kwako, awe u zumbako Mowabhi, kuwomba Mkoma. 44Awule a no tutuma ngu msanekera a na wela diphalani, awu a no huma diphalani a na txikwa ngu mkuni; nguko ni na tisa txitimwi kwakwe, txitimwi ka Mowabhi ni vekile dilembe da kuhasamulwa kwakwe, kuwomba Mkoma. 45Avale va nga txi tutuma va to ya sisala ka mtsudi wa Hesibhoni; aniko ku so vhutuka mndilo ngu Hesibhoni, ni m'dhikila ngu hagari ka Seyoni, wu txi hisa dikhona da Mowabhi, ni mtamo wa sikarato. 46Dikhombo kwako Mowabhi; va lovile vathu va Kemoxe; nguko vanana vako va mahilwe tikhumbi, ni mahorana ako ma wukhumbini. 47Aniko ni na wuyisa tikhumbi ta Mowabhi ka masiku o gwitisa, kuwomba Mkoma. Kala ahawa ngu kona kulamulwa ka Mowabhi.
Currently Selected:
Jeremiya 48: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
