Jeremiya 4
4
1“Ngako u txi wuya, awe Israyeli,
wuyela kwangu, kuwomba Mkoma; ngako u txi thavisa manyala ako masoni kwangu, sekoko khu na mbiswa u peperukela kambe. 2Se u na xambanya, u txi khawe: Mkoma a hanyako, ngu ditshuri, ka kulamula ni ka wululamo; matiko ma na ti katekisa ngu ngene, ni kutikulisa ngu ngene.”
3Nguko Mkoma a to khene ka vavamna va ka Judha ni ka Jerusalema:
Dimani mapulo anu, mi nga phayeni hagari ka mipa.
4 # Wona ni ka: Hos. 10:12. Mahani Sithiva ka Mkoma, mi thavisa didhowo da timbilu tanu, anu vavamna va ka Judha, ni vaaki va Jerusalema. Kasi kuhenya kwangu ku si vhutuki nga mndilo, wu turako ha kaku wu si timwi, ngu mhaka ya kubiha ka mithumo yanu.
Judha a txi lava kulwiswa
5Zivisani kona Judha mi peka huwa kona Jerusalema, mi txi khanu:
Vetani mipundu ditikoni,
mi kwangula, mi txi khanu:
Tshanganani mi tutumela madhoropani
ka mikhokhola.
6Gwimbani mijeke didhawani ka Siyoni,
tutumani kasi ku mi ti hulukisa, mi nga emeni;
nguko na mi nehela dikhombo
na di txita ngu Wuphemba,
ni kulovisa ka hombe.
7Ngonyamo yi humile txigotoni ka yona,
ni m'hasamuli wa matiko,
a khukhile wukhaloni kwakwe
kasi kuhangalasa ditiko dako,
a hasamula a madhoropa ako
ti taku ku si ngadi kuakwa ka ona.
8Ngu konaho, ambalani masaka mi dila, ni kudikwila.
Nguko kutura ka txiviti txa Mkoma
kha ka khukha kwathu.
9Ku na maheka ka yoneyo mbimo, kuwomba Mkoma, ti taku:
Mfumeli ni manganakana va na wika misana; se vaphaxeli va na diwuka, vaprofeti va na xamala.
10Sekoko ani ni to khani:
“Ha, Mkoma! Txizimu u lundumisile vathu vava ni Jerusalema, u txi khawe: Anu mi na va ni kuthutha kuve ditxhari da va thola va hafuhi ni kufa.”
11Ka yoneyo mbimo ku na gelwa vathu vava ni Jerusalema, ku kha vona: Diphuho do hisa da mimango ya txiwulani di rendekete vathu vangu, na i si nga kuhehela ni kutsetseta. 12Txingulu txi nata ngu kuruma kwangu sekoko ni na va lamula.
Kurandelwa ka Judha ngu valala
13“Mlala a nata nga direfu, ni sikotxikani sakwe si nga txihuhuri; mahantxhi akwe ma na kuluveta kupinda magama. Dikhombo kwathu, nguko hi lovile.”
14“Jerusalema, kuwula mbilu yako kubihani, kasi ku u na hanyiswa; Maalakanyo ako o biha ma na zumba ni nawe kala yihi mbimo kani?
15Nguko dipswi da pfala ngu Dhani di pfalisa dikhombo di khukhelako mmangoni ka Efrayime 16Gelani matiko, mi zivisa Jerusalema, ti taku tixoli tata ngu ditikoni ka kule, ta nuwela ngu mapswi a tona kasi ve wukela madhoropa a ka Judha. 17Va mrandete nga vawoneleti va thembwe nguko a tiwukile kwangu. Kuwomba Mkoma!
18Mahanyelo ako ni mithumo yako si ku wusete silo siya, ngu wona m'hando wa kubiha kwako. Kha ditshuri wa bava, ka panda ni mbiluni.”
Kuxaniseka ka Jeremiya ngu mhaka ya vakakwawe
19Mbiluni kwangu, mbiluni kwangu!
Ni ni kupandiseka mbiluni kwangu!
Mbilu yangu ya bhibhika-bhibhika,
kha ni sikoti kumalala;
nguko dihika dangu di pfite txiwungulati txa mpundu,
ni tihuwa ta tiyimbi.
20Kuhuwelela ngu kuloviswa txitimwi ka kulovisa,
nguko ditiko dotshe di hasamutwe.
Matenda angu ma khundumutwe ngu txidhukisa,
ni midhuti yangu ngu mbimwanyana.
21Ni na wu wona mbimo muni m'jeke,
ni kupfa kutuma ka mpundu kani?
22“Nguko vathu vangu va bharukile: Kha va ni zivi;
vanana vo mba ziva, na va si nga ni kupima.
Vona va txharihile kumaha kubiha
aniko kha va sikoti kumaha wunene.”
Kuhasamulwa ku kutako
23Ni woni mafu, ma si nga ni txiwumbeko ma si nga ni txilo;
ni nzumani, ku si nga ni kuwonekela.
24Ni to wona mimango, ti woneka to yi txo dhudhumela;
ni simangwana sotshe si txi dekandeka.
25Ni to xayisisa ni wona ti to ku si nga ni m'thu ni wammweyo
sotshe sinyana sa nzuma si ti ti purumile.
26Ni to xolisisa, ni wona tito,
ditiko do nona di hindukile di maha txiwula
ni otshe madhoropa a dona ma khundumusetwe
masoni ka Mkoma ni masoni ka kuvhiluka ka kuhenya kwakwe.
27Nguko Mkoma a khene:
“Ditiko dotshe di na hasamulwa,
aniko na mbi di hetisela magwito.
28Ngu mhaka yeto, mafu manava ni huwa;
ni tinzuma ta txitimwi ti na phuma;
nguko ani ni wombile, ni hingana ni di xuvileto.
Na mbi hunduluka hambi kutshumelela msana.”
29Votshe va madhoropa va na tutuma ve thava
ngu mhaka ya va vo gadha mahantxhi ni va malaho;
va sisala mu ka tikwakwati,
na va txi kwela txitimwi ka marigwi. Otshe madhoropa ma sala i di siwula,
kha ku zumbi m'thu ka ona.
30Konkuwa koko, u na maha txani, awe u nga hasamulwa kani?
Hambi u txi ambala txiwunguwungu,
u txi ti bombisa ngu wukhetikheti wa nzalama
ni kungako u txo penda maso ako ngu Antimoniya,
wo ti bombisela walo.
Sigango sako sa kunyenya, si lava ku kudaya.
31Nguko napfa dipswi do fana ni da wamsikati a lumwako,
na di txi dikwila nga wamsikati wo tiwula.
Dipswi da m'horana wa Siyoni,
a hefemutekako ni kunawuluta manza akwe,
a txi khene: “Yowe, dikhombo dangu koko! Moya wangu wa tsivala masoni ka sidayi.”
Currently Selected:
Jeremiya 4: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
