Jeremiya 22
22
1 Mkoma a ti khene: Relela nyumbani ka mfumeli wa ka Judha, u txi ya womba kona mhaka yiya: 2Pfana mhaka ya Mkoma, awe mfumeli wa ka Judha, u ku ha ka txikhalo txa wufumeli txa Dhavhidha, awe ni sithumi sako, ni vathu vako ava va wulelako ngu sike siya.
3“Mkoma a khene: Lamulani ngu fanelo ni kululama, mi txi hulukisa wu a handwako manzani ka mtsindaveti, mi nga xaniseni mluveli, ni txisiwana, ni noni, mi nga va tsindaveteni, hambi kutheketa mnoha wa va va kuwalo mnandu ka wuwa wukhalo.” 4Nguko ngako mi txi engisa mhaka yiya, ku na wulelwa ngu sike sa nyumba yiya vafumeli va nga khalahatsha txikhaloni ka wukoma ka Dhavhidha, na va di mu ka sikotxikani ni kugadha mahantxhi, kumweko ni sithumi sawe ni vathu vawe. 5#Wona ni ka: Mat. 23:38; Luk. 13:35. Aniko ngako mi si engisi tiya timhaka, na xambanya ngu wutumbu wangu, kuwomba Mkoma, a ti taku ayiya nyumba yi na va dirumbi.
6Nguko Mkoma wa womba xungetano ngu nyumba ya mfumeli wa ka Judha, a txi khene: Masoni kwangu u fana ni Gileyadhi ni msungo wa Libhanoni, aniko ni na ku hundula uva txiwula, ni madhoropa ma si ngaku ni vathu. 7Ni na kudhanela valovisi, mmweyo ni mmweyo a na va ni matxhari akwe, va na ganga mikedhari yako yo tshura, va txi yi tshotsha mndiloni.
8Se matiko o tala ma na pinda ngu ka diya didhoropa, dimwedo di wotisa ka dimwani, di txi kha dona: “Ngu kutxani Mkoma a nga maha eto ka didhoropa diya da hombe kani?” 9Sekoko va na xamula, va txi kha vona: Nguko va lekile txitumelelano txa Mkoma, Txizimu txawe, va txi ya khozela simwani sizimu, ni ku si thumela.
Dipswi xungetano ni Jowakazi
10Mi nga dileleni wu a nga fa,
mi nga pekeni huwa ngu mhaka yakwe.
Aniko dilelani ngutu wu a khukhako,
nguko kha na mbi ngadi e wuya,
a txi ta wona ditiko di a nga velekwa ka dona.
11Nguko Mkoma a womba tiya xungetano ngu Salumi, mwana Josiya, mfumeli wa ka Judha, awu a nga fuma wukhaloni ka tate wakwe, a nga khukha ka wuwa wukhalo, a txi khene: “Ene kha na mbi ngadi e wuya kambe hawa.” 12“Aniko a na ya fela ka wukhalo wu va nga myisa ka wona kuñolwani, kha na mbi ngadi e wona ditiko diya.”
Txiziviso xungetano ni Jehoyakimu
13Dikhombo ka wule a akako nyumba yakwe ngu kwa mbi lulama
ni sibhiya sa kwa mbi na madingano;
awu a thumisako m'thu-kulowe
asi mu holeli, ni kambe kha m'diheli tile a mmahelako.
14Awu a ku khene: “Ni na ti akela nyumba ya hombe.
Ni sibhiya so anama, a txi dhoda mafasitela;
a txi nameketela makedhari,
ni ku yi penda ngu mxowo wo bhilivila.”
15Ina u na fuma ngu ku u ti ningelako
mthumoni ka makedhari kani?
Tate wako a dyite ni kusela.
Aniko a to lamula ngu mlayo ni fanelo,
a to humelela ngu mhaka ya toneto.
16A lamute mhaka ya mxaniseki ni wa kupwata,
ngu mhaka yeto ti m'humete kha kwati;
ina eko hi nga kona ku ni ziva kani? Kuwomba Mkoma.
17Aniko maso ako ni mbilu yako si navela dibhindu dwe,
ni kutheketa mnoha wa wu asi ngako ni mnandu,
u maha ngu kutsindaveta ni timboyinga.
18Ngu konaho, Mkoma a womba madingano ni Jehoyakimu, mwana Josiya, mfumeli wa ka Judha, a txi khene:
Kha va na mbi m'dilela, va txi kha vona:
Yowe, mwanathu wa txiwamna!
Mwendo yowe, mwanathu wa txisikati!
Se kha va na mbi peka huwa ngu ngene, va txi kha vona:
Yowe, awe nyamne wangu!
Mwendo ku yowe awe mthaviseki!
19A na tshotshiswa ku nga mbongola,
a na ndindwa a txi ya tshotshwa hahanze ka sidinge sa Jerusalema.
Magwito a Jerusalema
20Kwelela Libhanoni, u kwangula,
guleta dipswi dako na u di Bhasani!
Kwangula u di txitimwi ka mimango ya Abharime,
nguko votshe va vo randeka kwako va lovisilwe.
21Ni wombawombile ni nawe ti txi ngadi ti kuhumela kwati,
Aniko u txi khawe: “Kha ni na mbi engisa.”
Ngu ona mahanyelo ako kukhukhela wananani,
aku, khu na mbi pfa dipswi dangu.
22Vadyisi vako va na huhiswa ngu moya,
ni va vo randeka kwako va yiswa wukhumbini;
sekoko u na koyo tingana,
u dhungeka msungo ngu mhaka ya wubihi wako.
23Awe wu u nga aka Libhanoni,
u ku ni txisaka txako madhavini ka mikedhari.
Ngu xaniseka ka kutxani u no va nako
ngako u txi na humelwa ngu makhombo,
ngu pandisa ni tihuwa ku nga wamsikati a lumwako.
Kukonwa ka Jowakimi
24 # Wona ni ka: 2 Vafu. 24:8-15; 2 Mak. 36:9-10. Nga ku ni hanyako, kuwomba Mkoma, i ti ku Jowakimi, mwana Jehoyakimu, mfumeli wa ka Judha, i ti kova ringi ya dianza dangu da txinene, nga ni di mkodote konaho. 25Ni na kuningela manzani ka va va xotako wutomi wako, ni manzani ka vale u dhudhumelako masoni kwawe, i ku ene Nebhukodhonosori, mfumeli wa Bhabhilona ni ka Vakaldheya. 26Ni na kutovela, awe ni mwamwako wu a nga kuveleka, mi txi ya ka dimwani ditiko, aho mi nga mba velekwa kona, kona kheyo mi na ya fela kona. 27Aniko ditiko di va xuvako kutshumelela ka dona, kha va na mbi wuya ka dona.
28Ina m'thu wuwa Jokoniya njiya txo fayeka ni kunyenywa, a txi txi si vhuniko txilo kani? Kasi a leketwe txani ni vanana vakwe va txi ya tshotshwa ka ditiko va si di ziviko kani?
29O ditiko dangu, ditiko dangu, ditiko dangu!
Engisa mhaka ya Mkoma!
30 Mkoma a khene: “Dhanani ditina da m'thu wuwa ti taku kha nga ni vanana,
kha na mbi mana kuhumelela kuhanyani kwakwe,
nguko kha ku na mbi humelela ni mmweyo wa vanana vakwe,
ti taku e ningwa kuzumba txikhaloni ka mfumo wa Dhavhidha, e fumela Judha.”
Currently Selected:
Jeremiya 22: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
