Jeremiya 21
21
Jerusalema a na khundumuswa
1Dipswi di di nga ta ka Jeremiya ngu ka Mkoma, mbimo yi mfumeli Zedhekiya a nga rumela Paxuri, mwana Malakiya, ni Zefaniya, mwana Maseya, mphaxeli, va txi ya kha vona:
2“Hi nga hi wotisela ka Mkoma, nguko Nebhukodhonosori, mfumeli wa Bhabhilona, wa hi xasela; mwendo Mkoma a na hi mahela sixamaliso sakwe, ti taku ene e khukha kwathu.”
3Sekoko Jeremiya a to va xamula, a txi khene: Mi na gela Zedhekiya mi txi khanu: 4“Mkoma, Txizimu txa ka Israyeli, a khene:
Wonani, ni na tshumetela matxhari awa ma ku manzani kwanu, awa milwako ngu ona hahanze, mi txi wukela mfumeli wa Bhabhilona ni Makhaldheya, ava va nga mi randela, ni na ma sengeletela ka didhoropa diya. 5Ani nipune ni na lwa ni nanu ngu dianza di di guletilwe, ngu diwoko da mtamo, ni kuhenya, ni kuswireka, ni txiviti txa hombe. 6Ni na xasela vazumbi va didhoropa diya, vathu ni sihari, va na fa ngu mtungu wa hombe. 7Se msana keto, kuwomba Mkoma, ni na ningela Zedhekiya, mfumeli wa ka Judha, ni maxonga akwe, kumweko ni vathuvo va no maneka va di hulukile mtungu, ka didhoropa diya, ni txi va ningela manzani ka Nebhukodhonosori, mfumeli wa Bhabhilona, ni manzani ka valala vawe, ni ka va va xotako wutomi wawe. Ene a na va dayisa ngu ditxhari, kha na mbi va nyenyeletela, hambi ku va pfela, hambi ni kuva ni wumbilu ka vona.
8U na va gela vathu vava, u txi khawe: Mkoma a khene:
Wonani, na veka nzila ya wutomi ni nzila ya kufa, masoni kwanu. 9Awu a no sala ka didhoropa diya a na fa ngu ditxhari, ni nzala, ni mtungu; aniko awu a no huma hahanze, a txi ya ti ningela ka Makhaldheya, ava va nga mi randela, a na hanya; wutomi wakwe a na maha ngu kuhonyola nga o handa. 10Nguko ni wonelela didhoropa diya ngu wubihi, na i si nga ngu wunene, kuwomba Mkoma. Di na ningelwa didhoropa diya manzani ka mfumeli wa Bhabhilona, a na di hisa ngu mndilo.”
Dipswi nyumbani ka mfumeli wa ka Judha
11U na khawe ka mfumeli wa nyumba ya ka Judha: Pfanani mhaka ya Mkoma: 12Anu nyumba ya ka Dhavhidha, Mkoma a khene: Lamulani ngu kululama i di ngadi mixo; mi hulukisa wu a handwako, manzani ka wu a mtsindavetako; kasi ku kuhenya kwangu ku si turi nga mndilo, ku txi hisa ha kaku ku txi pwateka ni wo tima, ngu mhaka ya wubihi wa mithumo yanu. 13Hi nga wona, ni ni txisolo ni nawe wo zumba mkovani, awe dirigwi da libalani, kuwomba Mkoma; ni ni mhaka ni nanu mi ku khanu: I mani a no relela e ta hi wukela kani? I mani a no wulela dizumboni kwathu kani? 14Ni na mi peka madingano ni muhando wa mithumo yanu, kuwomba Mkoma. Ni na dhivela mndilo txitingani kwanu, wu na danzela sotshe si si ku hahanze ka m'ti.
Currently Selected:
Jeremiya 21: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
