Jeremiya 12
12
Jeremiya a maha siwotiso ka Txizimu
1Wa kululama ngutu ngawe, Mkoma, hambi ni txo kanetisana ni nawe; hambi keto, ni na bhula ni nawe ngu malamulelo ako. Ngu kutxani va kubiha ve humelela kani? Va kateka ngu kutxani votshe va va nga mbi thembeka kani? 2Awe u va phayile ve zima mitwi; ve kula, ve ninga mihando. Awe u hafuhi ni sisofu sawe, aniko u kule ni timbilu tawe. 3O Mkoma, awe wa ni ziva, wa ti wona, wa xola mbilu yangu ti taku yi zumbisa kutxani kwako. Va khumule nga tinvuta ti ti yiswako txitshindoni, va longisele ditshiku da kudawa. 4Ina ditiko di na keta kala yihi mbimo kani? Mwasi wu txi oma txitingani, ngukonaho ka wubihi wa va va zumbako emo kani? Sihari ni sinyana sa lova, nguko va kha vona: Kha na mbi wona kugwitelwa kwathu.
5Ngako u txi palisana ni vathu ngu kututuma, ve kusiya, ina u nga palisanisa kutxani ni mahantxhi kani? U si nga ni kuzumbiseka ditikoni ko thutha, u nga mahisa kutxani txigotoni ka Jordhani kani? 6Nguko ni vona vananu ni nyumba ya tate wako va ku lundumisile; ve ku kulumela. U nga va tumele hambi va txo kugela mapswi o tshura.
Txizimu txi henyela vathu va txona
7Ni tutumile Dithepele dangu,
ni site thomba yangu;
ni ningete txirandwa txangu
manzani ka valala va txona.
8Thomba yangu yi ni wukela ku nga ngonyamo amu txitingani;
yi ni bongela, ngukonaho, ni swirekile ngu yona.
9Ina thomba yangu yi kwangu
nga txinyana txa matshakatshaka.
Ti di ngeto, makoti a na va wukela ngu ka otshe madhawa.
Tsulani mi txi ya mananisa sotshe sihari sa txitinga, si na yi khobweta.
10Vadyisi votala vo onhetela txivhina txangu,
va kandile thembweni kwangu;
thembwe yangu yo tshura va yi mahile txiwula.
11Va di onhile,
da dila kwangu nguko di mahisilwe dirumbi;
ditiko dotshe di mahile dirumbi!
Nguko kha ku na m'thu a di khatalelako.
12Vahasamuli va tile mimangoni kotshe ka txiwula,
nguko ditxhari da Mkoma di xasela kukhukhela magwito
kala kumwani magwito ka ditiko;
kha ku na m'thu ni wammweyo a nova ni kuthutha.
13Va phayile fulaho, va funyete mipa;
va ti karatile walo.
Mi na va ni tingana ngu mhaka ya kufunyela kwawe.
Ni kuhisa ka txiviti txa Mkoma.
14Ndongeto a wombako Mkoma ngu vaakelani vangu vo biha ava va wukelako thomba yi ni nga ninga vathu vangu va Israyeli. Ni na va dula ditikoni kwawe, ni nyumba ya ka Judha ni na yi dula hagari kwawe. 15Aniko msana ka kuva ni ti va dute, ni na tshumela ni va pfela wusiwana, ni na va tshumeta, mmwani ni mmwani thombani kwakwe, mmwani ni mmwani e tshumelela ditikoni kwakwe. 16Ngako va di gondile tinzila ta vathu vangu, ti taku va txi xambanya ditinani kwangu, va txi kha vona: Mkoma a hanyako; nga ku va nga gondisa vathu vangu kuxambanya ngu Bhahali, sekoko va na maneka hagari ka vathu vangu. 17Aniko ngako va si engisi, ni na dula ditiko diya di txi lova, kuwomba Mkoma.
Currently Selected:
Jeremiya 12: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
