Jeremiya 11
11
Jeremiya ni txitumelelano
1Yi tile mhaka ka Jeremiya ngu ka Mkoma, yi txi kha yona:
2Engisani timhaka ta txitumelelano txiya, u txi ti xawutela ka vavamna va ka Judha, ni ka vazumbi va niya Jerusalema; 3u txi ka vona: Mkoma, Txizimu txa Israyeli, a khene: A ruketetwe m'thu wu asi engisiko timhaka ta txiya txitumelelano,
4a txi ni nga layela vatate vanu ditshikwedo ni nga va humisa ditikoni ka Egipta, aha ka m'dhikila wa nyundo ya txikete, ni txi khani: Engisani dipswi dangu, mi txi maha totshe ti ni mi rumako; sekoko mi na va ditiko dangu, nanani ni na va Txizimu txanu,
5kasi ni na tsanisa txifungo txi ni nga txi xambanya ka vatate vanu: Txa kuvaninga ditiko di khulungako masi ni wulombe, nga ti ku ku ngu tona nyamsi. Sekoko ni to xamula, ni txi khani: Amen, Awe Mkoma! 6Sekoko Mkoma a to womba kwangu, a txi khene: Womba-womba totshe tiya timhaka madhoropani a ka Judha, ni mu tiruwani ka Jerusalema, u txi khawe: Engisani timhaka ta txiya txitumelelano, mi maha tona. 7Nguko kukhukhela ditshikwedo ni nga humisa ngu dona vatate vanu ditikoni ka Egipta, kala kuhoka nyamsi, ni va gete ni txi ngadi ni vinduka ni mixo, ni va laya, ni txi khani: Engisani dipswi dangu! 8Aniko kha va engisa, hambi kuhuphuta nzeve yawe. Mmweyo ni mmweyo a to so mbetete e mwalaleka ngu kubanga ka mbilu yakwe yo biha. Nguko ni nehile txitimwi kwawe timhaka totshe ta txiya txitumelelano, txi ni nga va laya ku txi xayisa, aniko kha va txi xayisa. 9Mkoma a txi khene kwangu: Ka mahwa txikungo hagari ka vavamna va ka Judha ni va va zumbako Jerusalema. 10Va tshumelete sionhoni ka vakokwani vawe, va va nga lamba kuengisa timhaka tangu. Va londetete simwani sizimu, ve si khozela. Nyumba ya ka Israyeli ni nyumba ya ka Judha ti funyile txitumelelano txangu atxi ni nga txi maha ni vatate vawe.
11Ngu konaho, Mkoma a khene: Ni na neha dikhombo txitimwi kwawe, kha va na mbi huluka ka dona; va na dilela kwangu, aniko kha ni na mbi va engisa. 12Sekoko madhoropa a ka Judha ni vazumbi va Jerusalema, va na ya dila ka sizimu sile va nga si hisela dibaselo, aniko lambi va na mbi va hulukisa ka ditshiku da dikhombo dawe. 13Nguko mtengo wa sizimu sako wu dingana ni wa madhoropa ako, awe Judha! Mi emisile magandelo a tingana me dingana ni tiruwa ta mu Jerusalema: I ku siluvelo so hisela kona dibaselo ka Bhahali. 14Ngu konaho, u nga va kombelele vava vathu, u nga thuke u guleta dipswi ngu vona ngu mkombelo, nguko kha ni na mbi va pfa mbimo yi va dilako kwangu, ngu mhaka ya dikhombo dawe. 15Txirandwa txangu txi maha txani nyumbani kwangu aku txi nga maha manyala o tala kani? Sifungo ni nyama yi nga basiswa si nga thavisa kubiha kwako kani? Ngako u txi maha to biha ngu kona u tsakako! 16Mkoma a ku thute ditina daku:
Muolivha wo nyuka wa mihando yo tshura. Ngu diguwa da hombe da m'dhikila a di hisile ngu mndilo, madhavi a dona ma phatukete. 17Nguko Mkoma wa Mabutho a Tiyimbi awu a nga kuphaya, a na rumela makhombo txitimwi kwako, ngu mhaka ya kubiha kuwa ku nga mahwa ngu nyumba ya ka Israyeli ni nyumba ya ka Judha, ve ni henyisa ngu kuhisela dibaselo Bhahali.
Txikungo txa kuwukela Jeremiya
18 Mkoma a ni zivisile, ni ti zivile, a ni kombisile mithumo yawe. 19Ani ni fana ni hambana yo thutha yi yiswako kudawani; ni si ti zivi taku va ti ti ni txikungo txo ni wukela, txaku: A hi dikheni mndonga ni muhando wa wona, hi txi wudula ditikoni ka va va hanyako, kasi ditina dakwe di siswi di alakanywa.
20Aniko Mkoma wa Mabutho a Tiyimbi mulamuli wo lulama, awu a xolako titsho ni timbilu. Ni na wona ngako u txi ni tshunda kupharela kwawe, nguko ni kuzivisile mhaka yangu.
21Ngu konaho, Mkoma a womba tiya ngu vathu va Anatote, ava va lavako ku kudaya, va txi kha vona: U nga profete ditinani ka Mkoma, kasi u si feli manzani kwathu! 22Ina, Mkoma wa Mabutho a Tiyimbi, a khene: Ni na va tsayisa; majaha ma na dawa ngu ditxhari; vanana vawe va txiwamna ni va txisikati va na fa ngu nzala. 23Kha ku na mbi sala ni mmweyo wawe; nguko ni na neha dikhombo txitimwi ka vathu va Anatote, ngu dilembe da kutsayiswa kwawe.
Currently Selected:
Jeremiya 11: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
