Isaya 59
59
Sionho sa vathu sa solwa
1Wonani taku dianza da Mkoma kha da khwanyela,
a ti to di si sikoti kuhanyisa;
hambi nzeve yakwe, kha ya tsiveka,
ko naza yi tandeka kuengisa.
2Aniko wubihi wanu wa veka muhingano hagari kwanu ni Txizimu txanu,
ni sionho sanu si sisa khohe ya Txizimu kwanu,
kasi ku txi si mi engisi.
3Nguko manza anu ma tate ngu mnoha,
ni titiho tanu ti tate ngu wubihi;
sisofu sanu si womba-womba makuhu,
ni tidimi tanu ti womba-womba kubiha.
4Ku walo ni wammweyo a pfalisako kululama,
hambi ni wammweyo wo maneka kulamulani ka ditshuri;
va themba manyala, ni kutsimbila ve womba-womba makuhu;
va khura sirumbu sa mithumo, aniko ve veleka wubihi.
5Va fundamela manda a minyoka,
se ve luka sisaka sa vanyazombe;
awule a nodya manda a sona a na fa;
se ngako a txi ma phwinya, kuhuma timamba ka ona.
6Sisaka sa va nyazombe kha si dingani kuluka ngu sona syambalo,
hambi ku ti fenengeta ngu mithumo yawe;
mithumo yawe, mithumo ya wubihi,
ni mithumo ya wugevenga yi manzani kwawe.
7 # Wona ni ka: Var. 3:15-17. Mikondo yawe yi tutumela wubihi,
kambe va kuluvetela kuya theketa mnoha wo mbi na mnandu;
mipimiso yawe mipimiso ya wubihi;
kuhoxota ni kukhundumusela si tinzilani kwawe.
8Kha va yi zivi nzila ya kudikha,
kambe kha ku nga ni kululama kutsimbilani kwawe;
va ti mahete tisoko tawe to gombonyeka vapune;
ni wuhi wu a tsimbilako ka tona, kha zivi kudikha.
9Ngu mhaka yeto, kulamulwa ku kule ninathu,
ni kululama kha ku hi hokeli;
hi verela liwoningo, kambe hi mana txidema dwe;
hi lava kutsimbila mu ko wonekela, kambe hi tsimbila txidemani.
10Hi hulumetela maseta kufana ni mabhofu;
ina, hi hulumetela kufana ni vale va singako ni maso,
hi gutwa ni mitshikari kufana ni txidema,
hagari ka makhalo a txidema, hi fana ni sirumbi.
11Athu hotshethu ha bhonga ku nga singwingwi
kambe hi simama hi dilisa ku nga situvani;
hi verela kulamulwa, aniko kha ku humeleli;
hi verela kuhanyiswa aniko ku kule ni nathu.
12Nguko sihambunyeto sathu si engetelani masoni kwako,
ni sionho sathu sa hi wukela;
nguko sihambunyeto sathu si ni nathu,
kambe ha ziva wubihi wathu;
13hi nga hambukisa kutxani, hi hembela Mkoma,
hi khukha ka Txizimu txathu,
ni kuwombawomba to xanisa vamwani hi hundulukela kwako,
makungo athu ni tile hi ti wombako, makuhu dwe.
14Ngu kumaha keto, kulamulwa ku tshumelete msana,
ni kululama ku ti vekile kule;
nguko ditshuri di gutilwe tiruwani,
se kululama kha ku sikoti kuwulela.
15Ina, ditshuri da thidhela,
se awule a lekako wubihi a ti lavela kuhandwa;
se Mkoma a ti woni, ti si mutsakisi,
nguko kha ku nga ni wululamo.
16Se a to wona ti to, kha ku nga ni wammweyo,
se e tsaka nguko ku si nga ni muemeli;
se diwoko dakwe dipune di mtisete kuhuluka,
ni kululama kwakwe kupune ku mxayisile.
17Nguko a ti ambekile kululama,
ku nga txikatawu txa simbi,
e sanzeka txigoko txa kuhanyisa ha msungo kwakwe,
se a to ambala syambalo so ti photela,
e fenengela txiluse txi txi nga dijasi.
18Madingano ni ti mithumo yawe yi ku ngu tona, va na va tshumetelisa toneto;
kuhenya nga valala vawe, ni hakhelo ka vale valwako nayo;
ene a na dihela sitondolo ngu fanelo.
19Sekoko va na thava ditina da Mkoma kukhukhela Mswa-ditambo,
ni wudhumo wakwe khukhela Muhuma-ditambo;
mlala a nata kufana ni kukhulunga ka mati,
Moya wa Mkoma wu na mu wukela ni m'jeke wakwe.
20 # Wona ni ka: Var. 11:26. Se ku nata Muhanyisi ka Siyoni,
ni ka va ka Jakobe avale va nga leka tinzila to biha,
kuwomba Mkoma.
21Se ani ngu kwangu, atxiya njitumelelano txangu navo, kuwomba Mkoma:
Moya wangu, wu ku txitimwi kwako, ni nga wu veka txisofuni kwako, kha wu na mbi huma txisofuni kwako, hambi ngu txisofuni ka vanana vako, mwendo ngu ka txisofu txa vatukulu vako, kuwomba Mkoma, kukhukhela konkuwa kala kupinduka.
Currently Selected:
Isaya 59: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
