Isaya 58
58
Kutitona ka ditshuri
1Huwelela ngu dipswi do guleka, u nga malale,
guleta dipswi kufana ni mpundu;
kambe zivisa vathu vangu wuhambunyeti wawe,
ni va nyumba ya ka Jakobe sionho sawe.
2Hambi keto, masiku otshe va ni lava,
va tsakela kuziva tinzila tangu;
va txi nga vathu vo maha to lulama,
va va si lekiko mlayo wa Txizimu txawe,
va ni wotisa nzila ya kululama,
va tsakela kuhoka hafuhi ka Txizimu.
3Va txi kha vona: Se hi titonela txani sakudya, na u si hi woni kani?
Hi txanisela txani muhefemulo wathu,
na awe u si ti zivi kani?
Wonani taku, ditshiku di mi ti tonako sakudya,
mo mana ku ti tsakisa mipune,
kambe mi lwela wotshe mthumo wanu.
4Wonani taku mi ti tona sakudya, mi lwisana ni kukanetisana,
mi pekana ngu sibhakela hahanze ka mnandu;
mi nga ti toniseni ku nga ti ta nyamsi,
ngu kulava kupfalisa dipswi danu txitimwi.
5Ina ngu kona kutitona ku ni ndi no kusawula:
Aku ko ditshiku dimwedo m'thu e xanisa muhefemulo wakwe,
e namisa msungo a txi nga liwungu,#58:5 Liwungu: Mbungu, mwasi wa govani wo luka mataho.
kambe e ateta disaka da koni dikhumani kani?
Ina awe u ndi na khawe eko ngu kona kutitona sakudya,
ni ditshiku do tsakisa Mkoma kani?
6Ina hi nga kona kutitona ku ni nga ku sawula:
Kaku u txhatxha mabhanditxhi a wuonhi,
u txhatxha tingoti to sunga dikange;
ni ti to u va leka va di txhatxhekile vale vo xaniswa,
u phatulela dotshe dikange dawe kani?
7 # Wona ni ka: Mat. 25:35. Ina kambe khu abani sakudya sako ni wule a ku ni nzala,
ni kuamukela m'tini kwako sisiwana sile si nga tovelwa kani?
Ni ti to u txi mu wona i di tximbwiri u mfengeta,
kambe khu sisaleli wule i ku wa ka kwanu kani?
8Sekoko liwoningo lako li na huma kufana ni wuronga,
se kukalamuka kwako ku na mila ngu kukuluveta,
ni kululama kwako ku na thangela masoni kwako,
se wudhumo wa Mkoma wu na va msana kwako.
9Sekoko u na dila, kambe Mkoma a na kuxamula;
u na peka huwa, se ene a na khene: “Ngani wuwa hawa.”
Eto ti na maheka ngako u txi thavisa hagari kwako dikange,
u leka kuxungametela ngu litiho,
ni kuwombawomba ka manyala;
10se ngako u txi tula muhefemulo wako ka wule a ku ni nzala,
ni kukhurisa muhefemulo wo xaniseka,
sekoko liwoningo lako li na tura txidemani,
ni kuphuma, kwako ku na fana ni hagari ka mitshikari.
11Se Mkoma a na ku thangela yotshe mbimo,
e khurisa muhefemulo wako ka makhalo a txihala,
kambe a na tsanisa marambu ako;
se u na fana ni thembwe yo theletelwa mati,
ni ku nga txisima txi mati a txona ma si phwiko.
12Se avale va no huma ngu kwako, va na wusa makhalo a marumbi a kale;
kambe u na wusa makhato a liveleko ni liveleko,
se va na ku dhana taku u mlulamisi wa mule ko sakala,
ni muwusi wa tisoko ta vazumbi va ditikoni.
Sabbata yi fanela kumahelwa txithavo
13Ngako u txi vayilelisa mkondo wako ka ditshiku da Sabbata,
u si mahi kuranda kwako ngu ditshiku dangu do sawuleka,
se u txi khawe Sabbata ya tsakisa ngutu,
kambe ditshiku do sawuleka da Mkoma, da wudhundo,
se ngako u txi di dhunda,
u si londeti tinzila tako,
hambi kunavela kumaha kuranda kwako,
mwendo kumaha nyamuwombe,
14sekoko, u na tsaka ka Mkoma,
kambe ni na ku maha u guleka txitimwi ka mafu,
ni ku kutsanisa ngu thomba ya tate wako Jakobe;
nguko txisofu txa Mkoma txi wombile.
Currently Selected:
Isaya 58: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
