Isaya 53
53
1 # Wona ni ka: Joh. 12:38; Var. 10:16. I mani a nga kholwa ka txhumayelo yathu kani?
Niku diwoko da Mkoma di wonekisilwe ka mani kani?
2Nguko a humile masoni ka Mkoma nga txiluva,
e fana ni m'twi ka mafu a kuoma;
asi nga ni wuwono ni kutshura ka hombe;
se mbimo yi athu hi nga muwona,
kha ha wona kutshura ni kakumweko, kasi ku hi txi mnavela.
3A ti ti txhipiswa, kambe i ti ti wo nyenywa ngutu hagari ka vathu,
m'thu wa mipando, wo ziva ngutu kuthuma,
awule vathu va nga txi ti fenengeta tikhohe, a ti ti txhipiswa, kambe kha ha khatala ngu tona ni ka kudotho.
4 # Wona ni ka: Mat. 8:17. Kha ditshuri ene a rwate malwati athu,
e rwala ni kupanda kwathu;
se athu hi txi mfananisa ni mxaniseki, wo pekwa ngu Txizimu ni kukhoziswa.
5 # Wona ni ka: 1 Ped. 2:24. Aniko ene a pekilwe ngu sihambunyeto sathu,
e xaniswa ngu mhaka ya wubihi wathu;
txitsayiso txi txi hi tiselako kudikha,
txi ti ti txitimwi kwakwe,
se hi hanyisilwe ngu mikhwimbiriti yakwe.
6Athu hotshethu hi ti ti hangalakile kufana ni tinvuta;
mmweyo ni mmweyo a ti ti tsimbila ngu nzila yakwe,
aniko Mkoma a mrwekile wubihi wathu hotshethu.
7Ene a to khoziswa, aniko kha tula txisofu;
kufana ni txinvutana a to yiswa kudawani,
ni kufana ni nvuta masoni ka wu a yi kayako, ene kha tula txisofu.
8 # Wona ni ka: Mith. 8:32-33; Mtu. 5:6. A thavisilwe ngu kutsindavetwa ni kulamulwa;
se i mani a no xawutela ta kuhanya wakwe kani?
Nguko a wilisilwe mafuni ka va va hanyako,
kambe a manetwe ngu wuhambunyeti wa vathu vangu.
9 # Wona ni ka: 1 Ped. 2:22. Se diyiva dakwe di to vekwa kumweko ni vaonhi, ni vanyatithombe, kufani kwakwe;
hambi ku ene a nga si zivi kumaha to wekela,
kambe kha phazama ngu txisofu txakwe.
10Hambi keto, Mkoma a tsakete ku mxanisa, e mpfisa kupanda,
ngako muhefemulo wakwe wu txi
maha mhamba yo thavisa sionho,
a na wona vatukulu vakwe,
a na andisa masiku, se litsako la linene la Mkoma, li na kula manzani kwakwe.
11A na wona mthumo wa muhefemulo wakwe, e tsaka;
ngu wuzivi wakwe, txithumi txangu, mlulami,
txi na emela votala, nguko wubihi wawe a na wu rwala.
12 # Wona ni ka: Mar. 15:28; Luk. 22:37. Ngu kumaha keto, ni na mninga txyavelo txa votala,
se a nga abana sile so handwa kumweko ni va va mtamo ngutu;
nguko a tshakunutile muhefemulo wakwe kufani,
se e balwa kumweko ni sindaka-milayo;
aniko ene a ti rwekile sionho sa votala,
kambe a kombelete sindaka-milayo.
Currently Selected:
Isaya 53: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
