Isaya 51
51
Mapswi o thavelela vaaki va Jerusalema
1Ni engiseni anu mi londetako wululamo,
anu mi lavako Mkoma;
wonani ka dirigwi di mi nga huma ka dona,
ni ka phako ya txisima txi mi nga humiswa ka txona.
2Wonani ka Abrahama tate wanu,
ni ka Sara awu a nga mi veleka;
nguko ni m'dhani a di ekha,
kambe ni mkatekisile, ni tshumela ni muandisa.
3Nguko Mkoma a na thavelela Siyoni,
kambe a na thavelela otshe makhalo ale i ku marumbi,
se txiwula txa kona a na txi maha txi fanana ni thembwe ya Edheni,
ni txiwunda txa kona txi na fana ni thembwe ya Mkoma;
kuzumbiseka ni litsako si na maneka ka m'ti wuwa,
ni mithumo ya kubonga, kumweko ni dipswi da m'zeno.
4Ni engiseni anu vathu vangu, ni ditiko dangu!
Riyani tinzeve kwangu,
nguko mlayo wu na huma ngu kwangu,
ni kululama kwangu ku na maneka i ti liwoningo la vathu.
5Kululama kwangu ku hafuhi,
ni kuhanyisa kwangu ka humelela,
se mawoko angu ma na lamula vathu;
sitondolo si na ni verela,
kambe si na themba diwoko dangu.
6Guletani maso mi wona nzumani,
mi wona ni mafu hahatshi,
nguko nzuma yi na mwalala nga wutshi,
ni mafu ma na sakala nga txyambalo,
ni va va zumabako ka ona va na fisa ku nga titshuna;
aniko kuhanyisa kwangu ku na zumba kala kupinduka,
ni kululama kwangu kha ku na mbi funywa.
7Ni engiseni anu mi zivako wululamo,
anu vathunu mlayo wangu wu ku timbiluni kwanu;
mi nga thaveni kutseketselwa ngu vathu,
hambi kukarateka ngu siruko sawe.
8Nguko sumba yi na va sakata nga syambalo,
kambe va na dyiwa ngu timbungu kufana ni matoya;
aniko kululama kwangu ku na zumba kala kupinduka,
ni kuhanyisa kwangu ka liveleko ni liveleko.
9Vhumuka, vhumuka, ti ambeke mtamo, awe diwoko da Mkoma;
vhumuka kufana ni masiku ale ma nga pinda,
kufana ni ka tiveleko ta kale;
ina hi ngawe u nga wilela Rahabhi ngu sitxuwu,
ni kudaya mwamilambo kani?
10Ina hi ngawe u nga omisa linene,
i ku mati a kuhokoma ka hombe kani?
Kambe u nga dola nzila kutshimani ka linene,
kasi kuve tshawunyeta vale va nga tirulwa kani?
11Ngu kumaha keto, va na wuya vale va nga tirulwa ngu Mkoma,
kambe va na tshumelela Siyoni ngu kutsaka ka hombe,
ni kutsaka ka kwa mbi gwita ku nava txitimwi ka misungo yawe;
va na mana kuzumbiseka ni litsako,
kupandiseka ni kuketa si na tutuma.
12Ani, ani ngani awule ni mi thavelelako;
wo va mani awe koko, wa ku naza u thava m'thu wu afako,
mwendo mwanana wa m'thu,
wu a no hinduka e maha mwasi kani?
13Kambe wa divala Mkoma wu a nga kuvanga,
awu a nga nawuluta nzuma ni kumaha makhato a mafu,
u zumbela kuthava masiku otshe,
ngu mhaka ya tshofu ya mxanisi,
a txi ti longisela kuya haxula kani?
Ku hani kuhenya ka wule a nga ti kuxanisa kani?
14Awule a nga sungwa wukhumbini, a na thukunyulwa ngu kukuluveta,
se kha va na mbi fela mu diphalani, kambe kha va na mbi pwata sakudya.
15Nguko ani ngani Mkoma Txizimu txako,
txi txi bhandako linene, ni kudhindisa mavimbi a lona.
Mkoma wa Mabutho a Tiyimbi, ngu dona ditina dangu.
16Ani na veka mapswi angu txisofuni kwako,
ni kufenengeta ngu mtsudi wa dianza dangu,
kasi kuvanga nzuma, ni kukhata mafu,
ni kugela Siyoni kukhani: Anu mi vathu vangu.
Kuxaniseka ka Jerusalema ku na gwita
17 # Wona ni ka: Mtu. 14:10; 16:19. Wuka, Wuka, khukha awe Jerusalema,
u nga sela ka dianza da Mkoma, digombe da txiviti txakwe,
u sete ni kupswonga nzambwa ka digombe di di levisako, u sete nzambwa ya digombe da kuthidhela.
18Ka votshe vanana vale u ngave navo,
kuwalo ni wammweyo a ku kombako ditshuri;
ni ka votshe vanana vale u nga va wunja,
kuwalo ni wammweyo a mñolako ngu dianza.
19Timhaketo tatimbidi ti na kuhumelela;
i mani a no kupfela wusiwana kani?
Kuhaxotwa, ni kuloviswa, ni nzala, ni ditxhari!
Ni na ku thavelelisa kutxani kani?
20Vanana vako va tsivate,
va otete mahandakanyani ka totshe tinzila,
kufana ni timhuti amu ka milawu;
sekoko va tate ngu kuhenya ka Mkoma
ni kukawuka ka Txizimu txako.
21Ngu kumaha keto, konkuwa engisa tiya, awe wo dhuswa, wa kuleva,
aniko na i si nga ngu vhinya:
22A womba tiya Mkoma Txizmu txako, Nyamne wako,
wule a no lwela mhaka ya vathu vakwe:
Wona taku ani na teka manzani kwako digombe di di levisako,
nzambwa ya digombe da kuhenya kwangu;
khu na mbi ngadi u di sela kambe.
23Aniko ni na di veka manzani ka vale va ku henyisako,
va ku kha vona moyani kwako:
Nama, kasi ku hi pinda ngu txitimwi kwako;
se msana wako u wu mahile ku nga mafu,
wu txi nga nzila ya vale va pindako.
Currently Selected:
Isaya 51: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
