Isaya 40
40
Mahungu o thavelela
1Thavelelani, thavelelani vathu vangu,
kuwomba Txizimu txanu.
2Wombawombani ngu wumbilu ka Jerusalema,
kambe kwangulani mi m'zivisa ti to wukhumbi wakwe wu gumile,
ti to sionho sakwe si divaletwe,
ni ti to ka sotshe sionho sakwe a amukete hakhelo kumbidi
ngu ka dianza da Mkoma.
3 # Wona ni ka: Mat. 3:3; Mar. 1:3; Luk. 3:4; Joh. 1:2. “Dipswi da wu a kwangulako txiwulani di kha dona:
Longiselani nzila ya Mkoma;
lulamiselani amu ka ligwangwa magondo a Txizimu txathu.”
4Yotshe mikova yi na guletwe,
yotshe mimango ni sotshe simangwana si na khundumuselwa;
makhalo o gomboyeka ma na lulamiswa,
ni makhalo a mikova ma na tatiselwa.
5 # Wona ni ka: Luk. 3:5-6. Se wudhumo wa Mkoma wu na wonekiswa,
kambe yotshe nyama yi na ti wona tito,
txisofu txa Mkoma txi wombile tiya.
6Dipswi di kha dona: “Kwangula.”
Se wokari a nje khene:
Na kwangula ni txi khani txani kani?
Yotshe nyama#40:6 Nyama: Ti wombako ku “Vathu”. yi fana ni mwasi,
ni kotshe kutshura ka yona kufana ni siluva sa txitinga.
7Mwasi wa oma, se siluva sa mora,
ngako moya wa kuhefemula ka Mkoma wu di pindile txitimwi ka sona.
Ngu ditshuri, vathu i mwasi.
8 # Wona ni ka: Jak. 1:10-11; 1 Ped. 1:24-25. Mwasi wa oma, se siluva sa mora,
aniko dipswi da Txizimu txathu da zumba kala kupinduka.
9Awe u m'zivisi wa mahungu amanene ka Siyoni,
kwela ka mmango wo guleka.
Awe u m'zivisi wa mahungu amanene ka Jerusalema,
guleta dipswi ngu mtamo;
di gulete, u nga thave,
womba ka madhoropa a ka Judha, u txi khawe:
Wonani, nditxe hawa Txizimu txanu.
10 # Wona ni ka: Isa. 62:11; Mtu. 22:12. Wonani taku Mkoma Txizimu a nata, kufana ni ndena,
se diwoko dakwe di na fuma;
wonani taku, ata ni txhatxhazelo yakwe,
ni hakhelo, masoni kwakwe.
11A na dyisa mtxhambi wakwe kufana ni m'dyisi;
a na sengeleta sinvutana mawokoni kwakwe,
e si khutarela hakhana kwakwe;
a na gola kha kwati ati ti mamisako.
Wuhombe wa Txizimu txa ka Israyeli
12I mani a nga pima linene ngu dianza dakwe,
awu a nga teka lipimo la nzuma ngu manza akwe,
se e sengeleta lithulu la mafu, ka mpimo wokari,
ni kupima mimango ni simangwana txikaloni kani?
13 # Wona ni ka: Var. 11:34; 1 Vak. 2:16. I mani a nga tsimbitisa Moya wa Mkoma kani?
I mani a ngava mlayeli wakwe kani?
14A mahile ni mani txikungo,
kasi ku e mninga mapimo, ni ku mkomba tinzila to lulama,
kambe e m'gondisa wutxhari, ni ku mmaha e wona nzila ya wutxhari kani?
15Wonani taku matiko ma fana ni dithotho da mati,
di thothoketelako mu ka dibhaketi,
ni ku nga lithulu la lidotho la sikaloni;
sitondolo si fana ni tximaha txatxidotho ngutu.
16Hambi txitinga txotshe txa Libhanoni,
kha txi eneli kudhivela mndilo wa txiluvelo,
ni sifuyo sa kona kha si eneli kumaha mhamba yo hiswa.
17Otshe matiko hi nga txilo masoni kwakwe;
a ma wona i si nga txilo, kufana ni txa kwa mbi va txilo.
18Mi nga txi fananisa ni mani koko Txizimu,
mwendo mi nga txi fananisa ni txani kani?
19Mthumi wa vata txithombe,
se mtshuli e nameketela nzalama ka txona,
ni ku txi mahela liketani la silivhela.
20Txisiwana txi sisikotiko kuninga so tala, txi sawula dipulango di di si siniko;
se mthumi wo txhariha e di teka,
kasi ku ta m'vatela txithombe txi txi si zinginikiko.
21Ina kha mi tizivi kani?
Ina kha mi ti pfi kani?
Mwendo kha ma ziviswa mhaka yiya makhatoni kani?
Hambi kupima makhato a mafu kani?
22Ngene wule a nga khalahatsha
txitimwi ka txiwumbulutwa txa mafu,
awule kwakwe, ava va zumbako ha mafuni va fanako ni tihumbi;
ngene a nawulutako nzuma yi txi nga m'jiyo,
e yi gwimba ku nga ditenda, kasi kuve zumba ka dona;
23awu a tshumetako vathangeli ve maneka i si nga va txilo,
kambe a maha ti to valamuli va ditiko va si vhuni txilo.
24Se kha va phawi, hambi kuxwaywa,
hambi kuzima mikoloti mafuni, ya txitsha txi txi nga sala;
wa futeta txitimwi kwawe, se va txi oma;
se moya wu na va purumisa kufana ni mthungu.
25Mi na ni fananisa ni mani koko, kasi ku ni txi fana nayo kani?
Kuwomba Msawuleki.
26Gulani maso mi wona txitimwi,
mi wona taku i mani a nga vanga sona siya.
I mani a nga ti vangela so talisa tiya,
i mani asi dhanako sotshe ngu matina a sona;
ngu mhaka ya wuhombe wa mtamo wakwe,
ni kutsana ka mtamo wakwe,
kha ku na mbi pwateka ni txa tximwetxo.
27Ngu kutxani koko, u wombako, awe Jakobe,
ni nawe Israyeli u ku khawe:
Nzila yangu yi tsivilwe ka Mkoma,
ni kulamulwa kwangu ku kule ni Txizimu txangu kani?
28Khu ti zivi, khwa tipfa taku,
Txizimu txa yotshe mbimo, Mkoma,
M'vangi wa magwito a mafu,
kha karali, hambi kurereka kani?
Mapimo akwe kha ma na mpimo.
29A ninga mtamo ka wule a nga karala,
kambe engetela mtamo ka wule asi ngako ni mtamo ni wa wudotho.
30Vavaphya va na karala, ni kurereka,
kambe vavaphya, ngu ditshuri va na wa.
31Aniko avale va emako ka Mkoma,
va na wuseta mitamo yawe,
se va na kwelela ngu tibhapi kufana ni magama;
va na tutuma va si karali,
va na tsimbila va si rereki.
Currently Selected:
Isaya 40: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
