Isaya 34
34
Txizimu txi na tsayisa matiko
1Tshuketani anu matiko, mi ta engisa;
se anu vathu, engisani;
mafu ma na tipfe, ni kutala ka ona;
mafu ni sotshe si si humako ka ona.
2Nguko kuhenya ka Mkoma ku txitimwi ka otshe matiko,
ni txiviti txi txitimwi ka otshe mabutho a ona;
ene a ma khundumusile do gwita, kambe asi ningete kudawani.
3Se vafi va na rinzwa, sirumbi sawe si na nunga,
ni mimango yi na nyivilikiswa ngu mnoha wawe.
4 # Wona ni ka: Mtu. 6:13-14. Se otshe mabutho a nzumani ma na guma,
kambe nzuma yi na petwa nga dibhuku,
ni dotshe dibutho da sa nzumani di na wa,
kufana ni kuwa ka mazokoro a m'vhinya,
ni ku nga kuwa ka dikuwu da mkuwu.
5Nguko ditxhari dangu di levile nzumani;
wona taku di na wela txitimwi ka Edhomi,
ni txitimwi ka vathu vangu, vo ruketelwa, kasi kuya lamula.
6Ditxhari da Mkoma di tate ngu mnoha,
di tate ngu mafura, ni mnoha wa sinvuntana ni wa vamabhongwe,
ngu mafura a titsho ta tihamba,
nguko Mkoma a ni mphaxo kona Bhozira,
ni kudayela ka hombe ditikoni ka Edhomi.
7Ni tinyari ti na txhika nayo, marole, ni madhuna;
kambe mafu awe ma na sela mnoha wa sona me khura,
ni lithulu lawe li na tala ngu mafura.
8Nguko ditshiku da kuphota ka Mkoma,
dilembe da kutshumetela ka kulwa ka Siyoni.
9Se sinambwana sakwe si na hinduka si maha mraka,
ni lithulu lakwe li na maha txivavula,
se mafu akwe ma na maha mraka wo tura.
10Hambi ni wusiku mwendo ni mitshikari kha wu na mbi timeka;
wutshi wa kona wu na kwelela yotshe mbimo;
wu na omiswa ka liveleko ni liveleko,
kambe ka dizana ni dizana kha ku na mbi pinda m'thu ni wammweyo ngu kona.
11Aniko disekwa, ni nungu, si na zumba kona,
se disukulu ni digwana si na aka kona,
kambe ene a na gwimba ngoti ya tipfilupfilu,
ni txidinganiso txa mipimiso yo biha.
12Vona va na dhana vale va lisima veta mfumoni, aniko ni wammweyo kha na mbi vaho,
votshe vathangeli vawe kha va na mbi va va txilo.
13Se tinyumbani kwawe ka wukoma ku na mila mipa,
maxexo ni sihaha ka mikhokhola yawe;
ku na maha dizumbo da vamwamilambo, ni m'hubhe wa sisondo sa timbuwu.
14Se sitoli si na manana ni magoya;
vamabhongwe va na dhanana kona;
ni sihari sa wusiku si na zumba koneho,
kambe si na mana wukhalo waku si humula ka wona.
15Si na aka kona sisuku, kambe si na veka manda a sona,
si na tshotshora vanana va sona, si txi va veka hahatshi ka mitsudi ya sona;
kambe makoti ma na tshangana mamwewo ni mamwani.
16Lavani mu ka dibhuku da Mkoma, mi gonda:
Kha txi ngaho ni txa tximwetxo txi no tandeka,
kha ku na mbi pwateka ni txa tximwetxo hambi tximwani;
nguko txisofu txakwe txipune txi leletile,
kambe moya wakwe wupune wu na si sengela.
17 # Wona ni ka: Isa. 63:1-6; Jer. 49:7-22; Eze. 25:12-14; 35:1-15; Amo. 1:11-12; Obha. 14; Mal. 1:2-5. Nguko ene apune a xaxuvile tixolo,
ni dianza dakwe di si abanisete ditiko ngu ngoti;
si na di fumela yotshe mbimo,
ku na zumba liveleko ni liveleko ka dona.
Currently Selected:
Isaya 34: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
