Isaya 32
32
Mfumo wa wululamo
1Mfumeli a na fuma ngu kululama,
se vathangeli va na fuma madingano ni wulamuli.
2Se wamwamna wule a na fana ni txivhikelo txo vhikela moya,
a na nga wuthavelo ka txihuhuri,
ni ku nga lidhonga la mati ka makhalo a kuoma,
ni mtsudi wa dirigwi da hombe ka ditiko da txihala.
3Se maso a vale va wonako kha ma na mbi wona msana;
ni tinzeve ta vale va engisako, ti na engisisa.
4Se timbilu ta va vo mbi thembeka, ti na mana wutxhari;
ni tidimi ta vo kangamela ti na womba-womba ngu kutxhatxheka.
5Txiphukuphuku kha txi na mbi ngadi txi dhanwa taku nja lisima;
hambi wa wutona kha na mbi dhanwa taku mbwo hana.
6Nguko txiphukuphuku txi womba-womba wuphukuphuku,
ni mbilu ya txona yi maha to biha,
ni kuthumisa wukanganyisi,
kasi kuwombawomba ta walo, to wukela Mkoma,
se txi tona muhefemulo wa wule a ku ni nzala,
ni kutona mati awu a ku ni ditora.
7Kambe siya sa wa likungo si bihile; ene a sika makungo o biha,
kasi kuonha vale vo thutha, ngu mapswi awalo,
hambi ngako txisiwana txi txi womba ditshuri.
8Aniko txisiwana txi maha makungo amanene,
se ngu wunene txi simama txi di emile.
9Khukhani mi ema, anu vavasikati vo zumbiseka,
kambe engisani dipswi dangu;
se anu vanana vamahorana o tithemba ngutu,
riyani tinzeve mi engisa mapswi angu.
10Nguko msana ka dilembe ni masikwanyana,
mi na karatwa anu vavasikati vo ti themba;
nguko kuhaphelwa ka mihando ku na gwita,
hambi kufunyelwa kha ku na mbiswa ku diho.
11Dhudhumelani, anu vavasikati vo zumbiseka,
kambe karatekani anu mi ti thembako ngutu;
thavisani syambalo sanu, mi sala mi di simbwiri,
se mi ambala masaka siwununi kwanu.
12Pekani tikhana, mi dilela thembwe yanu yo nona,
ni mivhinya yo veleka ngutu.
13Txitimwi ka ditiko da vathu vangu, ku na mila sihaha ni sitxhotxhota,
kumweko ni txitimwi ka totshe tinyumba to tsaka ka tona,
ka didhoropa di di ndakandakako ngu kutsaka.
14Nguko nyumba ya wukoma yi na sala yokha,
diguwa da didhoropa di na guma;
mimango ni sitezi sa vawoneleti
si na maha tiphako ka yotshe mbimo,
emo timangwa ti no tutuma-tutuma kona,
ku txi maha lihawu la sifuyo.
Mbimo ya kuthutha ni ya wululamo
15Kala kuza wu txhika txitimwi kwathu Moya wa txitimwi;
sekoko txiwula txi na hinduka txi maha thembwe yo nona,
kambe thembwe yo nona yi na maha txitinga.
16Se kulamula ku na zumba txiwulani,
ni wululamo wu na maneka thembweni ko nona.
17Se simaho sa kululama si na va kudikha,
ni mthumo wa kululana wu na va kuzumbiseka, ni kutsana ko mbi guma.
18Vathu vangu va na zumba ditikoni ka kudikha,
ka tinyumba to tsana ngutu,
ni ka makhalo o humula ngu kuthutha,
19hambi kutxiwa maralala, kuwiswa ni txitinga,
ni didhoropa di na wiswa do gwita.
20Mi katekile anu mi phayako txitimwi ka otshe mati,
kambe mi ningako kutxhatxheka ka minenge ya tihomu, ni ya timbongola.
Currently Selected:
Isaya 32: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
