Isaya 3

Kwa mbi pfana ko enela kona Jerusalema

1Nguko wona taku Mkoma, Txizimu txa Mabutho a Tiyimbi,

a na thavisa ka Jerusalema ni ka Judha,

ndonga ni mtxheketelo,#3:1 Vaheb. Totshe tindonga ni sakudya.

ni otshe mati o tima ditora.

2Tindena ni masotxhwa,

valamuli ni vaprofeti,

muhuti ni didhota;

3mthangeli wa mtxhanu wa magumi a masotxhwa, ni vathangeli,

didhota ni m'thu wo ziva kuthuma ni wa kuziva kuwombawomba;

4na va ninga mazambi kasi ku ma txi maha vathangeli vawe,

ni vanana va na va fuma.

5Se vathu votshe va na xanisana,

hambi vaakelani va na xanisana,

ni mwanana a na xanisa didhota,

vanyalidede va na xanisa vo thaviseka.

6Mbimo yi m'thu a no ñola mwanawe nyumbani ka tate wakwe, a txi khene: Awe u ni syambalo, u na maha mfumeli wathu, dirumbi diya di na xayiswa ngu ngawe. 7Ka ditshiku donedo a na guleta dipswi, a txi khene: Kha ni na mbi maha ñanga, nguko nyumbani kwangu kuwalo sakudya, hambi syambalo; mi nga ni maheni mthangeli wa vathu.

8Nguko Jerusalema a khavilwe

ni ditiko da Judha di wite,

nguko lidimi lawe ni mithumo yawe silwa ni Mkoma,

ve sola wudhumo wakwe.

9Tikhohe tawe ta va kona;

va andisa sionho sawe, kufana ni Sodhoma; kha va si baramisi.

Dikhombo ka mihefemulo yawe!

Nguko vo ti mahela kubiha vona vapune.

10Gelani va vo lulama ti to va katekile,

nguko va na dya mihando ya mithumo yawe.

11Dikhombo ka vakubiha!

Nguko va na ningwa hakhelo ya mithumo ya manza awe.

12Vaxanisi va vathu vangu mbanana,

se vavasikati ngu vona va ku mu ko duketa wukoma. Yowe! Vathu vangu!

Ava va mi thangelako, va mi xenga,

va mi onhela nzila yi mi tsimbilako ngu yona.

13 Mkoma a to khukha a txi ema e womba-womba,

e huma, kasi kulamula vathu.

14 Mkoma a thethisa madhota a vathu vakwe

kumweko ni vathangeli vawe;

nganu mi nga onha thembwe yiya ya m'vhinya;

asi mi nga honyola ka sisiwana

si maneka tinyumbani kwanu.

15Ngu kutxani mi xanisa vathu vangu,

ni kutshinda tikhohe ta sisiwana kani?

Kuwomba Mkoma, Txizimu txa Mabutho a Tiyimbi.

Txizimu txa sola vavasikati va Jerusalema

16 Mkoma a to womba kambe a txi khene:

Nguko mahorana a Siyoni ma ti kulisa,

ma tsimbila ma di emisile tithamo ta ona,

ma wonisa kugwilika,

ma tsimbilisa ku nga mo sinya,

se#3:16 Mwendo: ma txi ginga. ma di ambate masinda minengeni.

17Ngu toneto, Mkoma a na peka misungo ya mahorana a Siyoni,

Mkoma a na vhunungula wumbwuri wa ona.

18Ka ditshiku donedo, Mkoma a na va tekela si va ti tshuriselako ngu sona, sigoko sawe ni masinda awe; 19sikurufu ni tiketani, ni syambalo so vangamela; 20mibhoti, ni masinda o tshurisa ngu ona mawoko, ni tiketani, ni sibutxhangwana sa mafura o bhumula, ni singeda; 21tiringi ni sikurufu sa mu ka tithonvu; 22syambalo sa mibuso ni majasi, ni sikatawu, ni sipeneti; 23sibuko, ni mahembe a linyu yo hehuka, ni mafadhuko, ni masilika.

24Se ku na maheka taku, wukhaloni ko bhumula, ku nava ni kununga; se wukhaloni ka libhande, ku nava ni ngoti; wukhaloni ka misisi, ku na maneka tipala; wukhaloni ka syambalo sa mibuso, ku na ambalwa masaka; wukhaloni ka kutshura ngutu, ku nava ni sibawa so hiswa ngu mndilo.

25Vavamna vako va na dawa ngu ditxhari, ni tindena tako ti na guma yimbini. 26Se sike sa didhoropa si na va kupandisekani ni kudilani; ene a na handwa e khalahatshi hahatshi.

Currently Selected:

Isaya 3: BEC2016

Highlight

Copy