Isaya 21
21
Txiprofeto txa kuwa ka Bhabhilona
1Mahungu a txiwula txa linene.
Kufana ni sihuhuri sa Wulambwe,
si wisetela sotshe, a nata ngu txiwulani,
ka ditiko do thisa.
2Ni wonisilwe txiwoniso txo thisa:
Mkanganyisi wa kanganyisa, ni mxaseli wa xasela.
Kwelela awe Elamu, randela awe Medhi;
ni malatile miketo yawe yotshe.
3Ngu toneto, txiwunu txangu txi taletwe ngu kupanda ka hombe;
kupandiseka ku ni ñote ku nga kupandiseka ka wule a lumwako;
na xaniseka ngutu, aha ko kha ni sikoti ni kuengisa,
ni dhukile ngutu, kha ni sikoti ni kuwona.
4Mbilu yangu yi vhilukile, na dhudhumela ngu kuthava;
kuswa ka ditambo ni nga ti kulava, ku ni mahile ni dhudhumela.
5Va longisa meza, va wonelela,
vadya, ni kusela;
khukhani mi ema anu vathangeli, mi tota sitxhavangu.
6Nguko Mkoma a ni gete tiya:
Tsula u ya veka muwoneleli,
awu a no kugela, ti titako.
7“Se ngako wu txita mtxawa wu di gadhile mahantxhi ngu vambidi-vambidi,
mtxawa wa timbongola ni mtxawa wa makamelu,
ene a na engisele kha kwati ngu kutiwonela ka hombe.”
8Se a to dila nga ngonyamo, a txi khene:
Mkoma, ni emile txitimwi ka txitezi ni wonelela yotsthe mbimo ni mitshikari,
ni wonelela wusiku wotshe.
9 # Wona ni ka: Mtu. 14:8; 18:2. Se wonani konkuwa, wata mtxawa wa vavamna
ni vagadhi va mahantxhi ngu vambidi-vambidi.
Sekoko, a to xamula a txi khene:
“Di wite ditiko da Bhabhilona, di wite!”
Se sotshe sifananiso sa sizimu sawe so vatwa, si fayekete ha mafuni.
10O! Awe u nga Hulwa,
awe fulaho ya wuhulelo wangu!
Ati ni nga tipfa ngu ka Mkoma wa Mabutho a Tiyimbi, Txizimu txa ka Israyeli,
ngutu ni nga mi zivisa.
Mahungu o wukela Edhomi
11Mahungu a Dhuma.
Va ni kwangulela ngu Seyiri, va txi kha vona:
Muwoneleti, nji txani txi nga maheka ni wusiku kani?
Muwoneleli, nji txani txi nga maheka ni wusiku kani?
12Se muwoneleli a to khene:
Mixo yata, wusiku ni wona;
se ngako mi txi lava ku wotisa, wotisani;
tshumelani mi txita.
Mahungu o wukela Arabhiya
13Mahungu o wukela Arabhiya.
Ni wusiku mi na ya gova sitingani ka Arabhiya,
anu vapfhumba va ka Dhedhani.
14Humani ni mati mi hingeta vopfa ditora;
anu vahanyi va ditiko da Tema,
hingetani va va tutumako mi va ninga sakudya.
15Nguko va tutuma masoni ka matxhari,
masoni ka ditxhari da kwa mbi phutelwa,
ni masoni ka wulaho ni tingove,
ni masoni ka yimbi yo thisa.
16Nguko Mkoma a ni gete tiya:
Mndani ka dilembe, kufana ni malembe a vo holelwa, wotshe wudhumo wa Kedhari wu na mwalala. 17Se mtengo wule wu no sala wa vafuli, tindena ta vanana va ka Kedhari, wu na hungulwa, nguko a wombisile eto Mkoma, Txizimu txa ka Israyeli.
Currently Selected:
Isaya 21: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
