Isaya 11
11
Mfumo wa kudikha
1 # Wona ni ka: Mat. 2:23. Nguko ku na mila dikhukhu ditshinani ka Jese,
ni ka mitwi yakwe ku na mila didhavi di veleka mihando.
2Se Moya wa Mkoma wu na zumba txitimwi kwakwe
Moya wa wuzivi ni wutxhari,
Moya wawudhota ni mtamo,
Moya wa kualakanya ni kuthava Mkoma.
3Se a na tsakela kuthava Mkoma,
kha na mbi lamula madingano ni kuwona ka maso akwe,
hambi kuwila mhaka madingano ni kuengisa ka tinzeve takwe;
4 # Wona ni ka: 2 Vat. 2:8. kambe a na lamula sisiwana ngu kululama,
ni timhaka ta vale vo thutha ha mafuni, a na wila ngu kululama,
a na peka mafu ngu donga ya txisofu txakwe,
e fuvisa vabihi ngu kufuteta ka txisofu txakwe.
5Se kululama ku nava libhandi la txiwunu txakwe,
se ditshuri di na va libhandi la tithso takwe.
6Se dixolwa di na zumba kumweko ni txinvutana,
yingwe yi na otela kumweko ni txihongwana,
dirole, ni mwanana wa ngonyamo ni nvunta ya kunona si na hanya kumweko,
si dyiswa ngu mfana wam'dotho.
7Homu ya makati yi na dya kumweko ni mkati wa txingwingwi,
morole a sona ma na otela wukhalo wumwewo;
ngonyamo yi nadya mwasi kufana ni homu.
8Se mwanana wu a mamako a na sakana m'bhalani ka mnyoka,
awu wo lumulwa a na beta dianza m'bhalani ka txifofo.
9 # Wona ni ka: Hab. 2:14. Kotshe mmangoni kwangu ko sawuleka,
kha ku na mbi va ni kubiha hambi kuonhwa txilo,
nguko mafu ma na tala ngu kuziva Mkoma
kufana ni mati awa ma fenegetako linene.
10Se ku na maheka tito, ka ditshiku donedo, matiko ma na wotisa ngu mtwi wa Jese, i ku wule wu no mahwa m'jeke wa vathu, se wukhalo wa kuhumula ka wona wu na va ni wudhumo.
11Nguko ti na maheka tito, ka ditshiku donedo, a na nawuluta kambe dianza dakwe e teka miboti ya vathu vakwe vale va nga sala Asiriya, ni Egipta, ni Patro, ni Etiyopiya, ni Elame, ni Sinari, ni Hamati, ni sitondoloni ka linene.
12Se ku na guletwa m'jeke hagari ka matiko,
a na sengeleta vale va nga tovelwa va ka Israyeli,
ni vale va nga hangalaka va ka Judha,
a na va sengeleta kukhukhela ka mune wa makhona a ditiko.
13A na tovela txiluse txa Efrayime,
se valala va ka Judha va na loviswa,
Efrayime kha na mbi lusela Judha,
ni Judha kha na mbi xanisa Efrayime.
14Aniko va na purumela makatani ka Vafilista, ngu Mswa-ditambo;
va na handa kumweko vanana va Wutxani;
ve ñola Vaedhomi ni Vamowabhi,
se vanana va Amoni va na va engisa.
15Se Mkoma a na khundumusa do gwita diwoko da Linene la Egipta,
a na guleta dianza dakwe e wukela mnambo ngu mtamo wa moya wakwe,
e wu peka wu maha mtxhanu wa minambo ni yimbidi,
ti to ni wuhi e txhatuka a di ni tikathula.
16 # Wona ni ka: Mtu. 16:12. Se ku nava ni nzila ya hombe ka miboti ya vathu vakwe
avale va nga sala ditikoni da Asiriya,
kufana ni tile ti nga maheka ka Israyeli, ditshiku dile va nga huma ngu ditikoni da Egipta.
Currently Selected:
Isaya 11: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
