Isaya 10
10
1Dikhombo ka vale va vekako milayo yo mbi lulama,
ni vabhali vale va bhalako milayo yo xanisa vathu.
2Kasi kuonha mhaka ya sisiwana,
ve pela sisiwana sa ditiko dangu,
kasi kuhanda tinoni, ni kupela vale vo felwa ngu vaveleki.
3Mi na maha txani anu vamwani ngu ditshiku da txitsayiso,
ni da kulovisa kule ku nota ngu kule kani?
Mi na tutumela ka mani kuya lava kuvhunwa kani?
Tithomba tanu mi na ti veka hani kani?
4Mi na sikota kunama hagari ka vale va nga ñolwa,
mwendo kuwa hagari ka sirumbi sile si nga dawa kani?
Hambi keto txiviti txakwe kha txa guma,
aniko dianza dakwe di ngadi nawulutilwe.
Mfumeli wa Asiriya, njiya txa Txizimu
5Dikhombo ka Asiriya,
ndonga ya kuhenya kwangu!
Nguko txiviti txangu txi fanana ni ndonga manzani kwakwe.
6Ni na mruma ku yalwa ni ditiko da wubihi,
ni mleleta kuya wukela vathu vale ni nga va henyela,
ku va handa ni ku va honyola siya sawe,
se ni va veka ti to ve kandetelwa ku nga ndope ya tinzilani;
7hambiko ene a singako ni mhaka nito,
hambi mbiluni kwakwe, kha alakanyeli eto;
Aniko mbilu yakwe yi navela
kuhoxota, ni kulovisa matiko o tala.
8Nguko a khene: Vathangeli vangu votshe hi nga vafumeli kani?
9Ina Kalino hi nga ku nga Karkemisi kani?
Hamati hi nga ku nga Aripadhe kani?
Se Samariya, kha fani ni Dhamasku kani?
10Dianza dangu di tekile mifumo ya sithombe,
hambi ku sithombe sa kona
si pindako sa Jerusalema ni sa Samariya.
11Ina tile ni nga maha Samariya ni sithombe sakwe,
kha ni na ku ti maha ka Jerusalema ni sithombe sakwe kani?
12Ngu kumaha keto, mbimo yile Mkoma a no heta wotshe mthumo wakwe mmangoni ka Siyoni, kona Jerusalema, sekoko ni na tsayisa mihando ya mfumeli wa Asiriya, ngu mhaka ya kutikulisa ka mbilu yakwe, ni kutiguleta masoni kwakwe. 13Nguko a khene:
Ni mahile eto ngu mtamo wa dianza dangu,
ni wutxhari wangu, nguko ni txharihile;
Ani ni thavisile mihingano ya vathu,
ni handa tithomba tawe,
kufana ni ndena, ni wisile vale va nga ti situluni ka wukoma.
14Dianza dangu di mani tithomba ta vathu,
di txi nga do rola txisaka;
se ni sengeletile mafu otshe ku nga no sengeleta manda o lekwa;
ku si nga ni wo nawuluta tibhapi,
mwendo kutula txisofu, mwendo kungunguruka.
15Ina ditxhapu di nga ti dhumisa ka wule a gangako ngu dona kani?
Ni disaho di nga ti kulisa ka wule a sahako ngu dona kani?
Ku txi nga mtxheketelo wu nga zinginisa avale va wu guletako,
mwendo ndonga yi nga guleta wule i singako phande!
16Ngu toneto, Mkoma wa Mabutho a Tiyimbi,
a na gomisa vale i ku vo ena hagari kwawe,
se hahatshi ka wudhumo wa kona ku na tura,
kufana ni kutura ka mndilo.
17Nguko Liwoningo la Israyeli li na maha mndilo,
se Msawuleki wa kona a na nga dikala da mndilo,
di na tura di hisa mipa ni txitinga ngu ditshiku dimwedo.
18A na fuvisa wudhumo wa txitinga txakwe
ni wa thembwe yakwe yo nona,
kukhukhela ka muhefemulo kala ka mmidi;
a na fana ni kutsivala ka mrwali wa m'jeke.
19Se mindonga yi yi salako txitingani kwakwe, yi na va ya yidotho,
ti to hambi mwanana a nga sikota kubala.
Vokari va na wuya
20Ka ditshiku donedo, ku na maheka taku, miboti ya ka Israyeli, ni vale va nga huluka va nyumba ya ka Jakobe, kha va na mbi ngadi ve themba wule a nga va peka; va na themba Mkoma, Msawuleki wa Israyeli, ngu ditshuri. 21Miboti yi na hunduluka, ina, miboti ya ka Jakobe yi na tshumelela ka Txizimu txa mtamo. 22Nguko hambi ku vathu vako, awe Israyeli, va fanako ni mtxhefa wa lineneni, miboti yokha ngu yona yi no hulukiswa; kulovisa kutsanisilwe, ka thekelela ngu kululama. 23Nguko kukhundumuswa ku di tsanisilwe, Mkoma, Txizimu txa Mabutho a Tiyimbi a na kutatisa hagari ka dotshe ditiko diya. 24Ngu kumaha keto, Mkoma, Txizimu txa Mabutho a Tiyimbi, a khene:
Mi nga thaveni anu vathu vangu, mi zumbako Siyoni, Asiriya hambi a txi mi peka ngu ndonga, ni kuguleta m'gomba wakwe e mi wukela, ngu mamahelo a Vaegipta; 25nguko i si nga kuswela, ku na tatiseka kuhenya kwangu ni txiviti txangu, kasi ku ni va heta. 26Nguko Mkoma wa Mabutho a Tiyimbi, a na guleta ndonga yakwe txitimwi kwawe, kufana ni kudawelwa ka Midhiyani, hafuhi ni dirigwi da Orebhi, kufana ni kule a nga guleta ndonga yakwe txitimwi ka linene, a na yi guleta kambe kufana ni tile ti nga maha ka Vaegipta. 27Se ti na maheka ka dona ditshiku dile taku, mrwalo wanu wu thaviswa makatani kwako, ni dikange dako ha thamoni kwako; se dikange di na funyeletelwa ngu mhaka ya kutotwa.
Kulwisa ka Vasiriya
28Se wa hoka ka didhoropa da Ayate,
wa pinda ngu Migroni,
ni kutshotsha thundu yawe kona Mikimasi.
29Se va pinda, kambe va gova Gebha;
se Rama wa dhudhumela,
Gibheya wa Sawule wa tutuma.
30Kwangula ngutu, awe mwanana wa muhorana wa Galimi,
engisa awe Layisi,
O awe, txisiwana Anatote!
31Se Madhimena a hangalakile,
ni vahanyi va Gebhini va tutuma ngu mitxawa.
32Ka ditshiku donedo, a na hoka Nobhe,
e kombisa txibhakela mmangoni ka dihorana da Siyoni,
ni ka mmango wa Jerusalema.
33Se wona taku, Mkoma, Txizimu txa Mabutho a Tiyimbi,
a na dunguruta madhavi ngu kuthisa,
se ale o lapha ma na gangwa,
vale vo ti guleta va na wiswa.
34Se a na gangela ngu simbi#10:34 Simbi: I ku bhere. txitinga txo txhuma,
se Libhanoni a na wiswa ngu dianza da wule wa mtamo.
Currently Selected:
Isaya 10: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
