Eksodha 22

Milayo madingano ni wukhamba ni minandu

1“Ngako m'thu a txi pa homu mwendo nvuta, a txi yi daya mwendo ku yi xavisa, a na diha ngu mtxhanu wa tihomu ka homu yimweyo, ni mune wa tinvuta ka nvuta yimweyo. 2Ngako dikhamba di txi manwa di txi gwanda ditimba di txi pa, se di txi baliswa di txi fa, awule a ngadi daya kha na mbi va ni mnandu wa kutheketa mnoha. 3Ngako di ti humile ditambo di txi muwoninga, a na mana mnandu wa kutheketa mnoha. Dikhamba di na dihela sotshe sile di nga pa; se ngako di si nga ni so diha ngu sona, di na xaviswa ngu mhaka ya wukhokhokho.

4Ngako a txi manwa naso manzani sile a nga pa, hambi i di homu mwendo mbongola, mwendo kambe i nvuta, a na diha kambidi.

5Ngako m'thu a txi ya dyisela txifuyo txakwe amu txitingani mwendo thembweni, a txi txi leka txi txi dya thembweni ka mmwani, a na diha sa txitinganimo, ni sa thembweni.

6Ngako wuhya wu txi hisa txitinga, wu txi tshapela ka thembwe ya mmwani, wu txi hisa fulaho mwendo siyalo hambi txitinga, awule a nga hisa wuhya, a na diha sotshe sile si nga hiswa.

7Ngako m'thu a txi ya ningela ka mwakelani wakwe male mwendo simaha kasiku e si xayisa, se si txi ya piwa nyumbani ka wule a nga si amukela, ngako dikhokhokho da kona di txi manwa, di na diha ngu kuwuyeta kambidi wa kona. 8Ngako dikhamba di si manwi, sekoko nyamne wa nyumba a na tekwa a txi yiswa masoni ka valamuli, kasi kuya xamula to mwendo kha pa sa mwakelani ngu dianza dakwe.

9Ni yihi mhaka ku singako ni kupfana, mwendo ngu homu, mwendo ngu mbongola, mwendo ngu nvuta, mwendo ngu txyambalo, mwendo ngu tximwani txo maha txi nga mwalala, atxi txi wombwako ti to nja nombwe, mhaka ya kona yi na yiswa ka Txizimu. Atile Txizimu txi no womba ti to ana ni mnandu, a na diha e tshumeta ngu kuwuyeta kambidi wa kona.

10Ngako m'thu a txi vekela ka mmwani, mbongola, homu, mwendo txihi ni txihi txihari, se txi txi maneka txi txi fa, mwendo kulimala, mwendo txi txi mwalala, aha ko txi si manwi ngu m'thu, 11sekoko ku na vaho txixambanyo masoni ka Txizimu hagari kwawe vavambidi, txa ti to kha pa txilo ka thomba ya mwakelani wakwe; se nyamne wa kona a na tumela, awule mmwani kha na mbi diha. 12Aniko ngako txihari txi di pitwe ngu ditshuri, a fanete kudihwa kumbidi ka nyamne wa txona. 13Aniko ngako txifuyo txi di datwe ngu txihari txa txitinga, a na txi tisa txifuyotxo txi nga dawa, kasi ku ta maha wufakazi, se kha na mbi diha txilo txo vhandamulelwa.

14Ngako m'thu a di lombile txokari ka muakelani wakwe, se txi txi ta onhwa mwendo kudawa, nyamne wa txona na asi nga ho, ngu ditshuri a na txi diha. 15Ngako nyamne wa txona a diho, kha na mbi txi diha; ngako txi di ko lombwa, a na diha ngu mtengo wo lomba ngu wona.

Milayo ya mahanyelo ni wukhongeli

16Ngako m'thu a txi kanganyisa a txi otela ngu kukurumeta ni mbiri yokari yi nga ti sanzi kuwutwa, ngu ditshuri a fanete e yi teka yi txi va msikati wakwe. 17#Wona ni ka: Dhewut. 22:28-29. Ngako tate wakwe a txi lamba ti to e mteka, a fanete e ningela male ya mtengo wa lowolo.

18U nga leke mloyi wa wamsikati a txi hanya.

19 # Wona ni ka: Levh. 18:23; 20:15-16; Dhewut. 27:21. Ni wihi wule a otelako ni txihari ngu ditshuri a na dawa.

20 # Wona ni ka: Dhewut. 17:2-7. Awule a phaxelako ka simwani sizimu, i si nga ka Mkoma, a na dawa.

21 # Wona ni ka: Eks. 23:9; Levh. 19:33-34; Dhewut. 24:17-18; 27:19. U nga xuphe mluveli kambe u nga m'dyisete; nguko nanu mive valuveli ditikoni ka Egipta.

22Mi nga xupheni noni ni ya yimweyo, hambi wo felwa ngu vaveleki. 23Se ngako ngu mamahelo okari mi txi va xupha, vona va txi dila kwangu, ani ngu ditshuri ni na engisa huwa yawe, 24se kuhenya kwangu ku na tura, kambe ni na maha a ti to mi txi fuviswa ngu ditshuri; vasikati vanu va na va tinoni, ni vanana vanu va txi maha sikulungu.

25 # Wona ni ka: Levh. 25:35-38; Dhewut. 15:7-11; 23:19-20. Ngako u txi lombisa male ka txisiwana txokari, txa hagari ka vathu vangu, avale va ku ni nawe, u nga mkurumete ti to e diha ni ya dibhindu; u nga mkurumete ya dibhindu. 26#Wona ni ka: Dhewut. 24:10-13. Ngako u txi ñola txyambalo txa muakelani wako ngu mhaka ya mnandu, u na mtshumetela na di si se swa ditambo, 27nguko adileya didhamba dakwe ni txyambalo txo sisa mmidi wakwe; se a na fenengela txani kani? Ngako a txi dila kwangu, ani ni na mu engisa, nguko ni wa wumbilu.

28 # Wona ni ka: Mith. 23:5. U nga ruketele valamuli, kambe u nga ruketele vathangeli va vathu vako, u nga va ruketele.

29U nga swele ni sile u nga khata kuelula, ni vhinya ya kona; u na ni ninga matiwula a vanana vako. 30U na maha nga toneto ngu matiwula a tihomu tako ni tinvuta tako; amu ka mtxhanu wa masiku ni mambidi si na zumba ni vamame va kona, se ngu ka ditshiku da wutxhanu ni mararu u na si hambanisa u txi si ninga ani.

31 # Wona ni ka: Levh. 17:15. Anu mi na va mi di vathu vangu vo sawuleka; ngu kumaha keto, mi nga dyeni nyama ya txihari txo phatulelwa ngu sihari sa txitinga; mi na yi ningela ka timbwa.”

Currently Selected:

Eksodha 22: BEC2016

Highlight

Copy