Eksodha 21

Milayo madingano ni tikhumbi

(Dhewuteronome 15:12-18)

1Ayiya ngu yona milayo yi u no vekela va ka Israyeli:

2“Ngako u txi xava khumbi ya Muhebheru, yi na kuthumele mtxhanu wa malembe ni dimwedo; aniko dilembe da wutxhanu ni mambidi, yi na huma ngu kutxhatxheka, yi si diheli txilo.” 3Ngako awule wa khumbi a di tile ekha, a na tshumela ekha; ngako a di tile ni msikati, msikati wakwe a na tshumela nayo. 4Aniko ngako nyamne i di ene a nga mninga msikati, ni kungako a txi mana vanana vavafana ni vamahorana, wamsikati ni vanana i thomba ya nyamne wakwe, se ene a na huma ekha a txi tsula. 5Ngako awule wa khumbi a txi khene: “Nyamne wangu na m'dhunda, kumweko ni msikati wangu ni vanana vangu, kha ti lavi kutxhatxheka.” 6Sekoko nyamne wakwe a na mtisa masoni ka Txizimu, a na mkhigetelisa aha ka ditimba mwendo aha ka msasimo, a na mthola nzeve ngu linyonzi, se a na va i di khumbi yakwe ngu yotshe mbimo.

7Se ngako m'thu wokari a txi xavisa mwanana wakwe wa dihorana, ngu wukhumbi, ene kha na mbi txhatxheka ku nga khumbi ya wamwamna. 8Se ngako asi tsakisi masoni ka nyamne wakwe, awule a nga mxava, a na tumela to e tirulwa. Kambe asi mxavisi ka vanyamthuvo, nguko a mkanganyisile. 9Ngako a txi mxavela mwanana wakwe wa mfana, ene a na mxayisisa ku nga mwanana wakwe wa dihorana. 10Ti di ngeto, ngako ene a txi teka mmwani wamsikati, kha na mbi sikota kuhungula fanelo ya sakudya, syambalo ni fanelo ya wukati. 11“Ni ku ngako asi mahi totshe tifanelo ta tiraru, ene wa sikota kutsula, asi hakeli txilo, hambi kutirulwa.”

Milayo ngu mhaka ya wugevenga

12Ngako m'thu wokari a txi peka mmwani a txi wa efa, a na fa nene ngu kudawa; 13kambe ngako a ti m'date ngu phango, na Txizimu i di txona txi nga mningela manzani kwakwe, ani ni na kukomba wukhalo wu a fanelako kuthavela ka wona. 14Ngako m'thu a txi daya mmwani khakwenye, hambi nga ti a di ha digandeloni kwangu, u na mñola u txi mruruvisa u txi ya m'daya nene.

15Awule a pekako tate wakwe mwendo mame wakwe, a na dawa.

16Awule a pako m'thu a txi mxavisa, mwendo e ta manwa nayo manzani kwakwe, a na dawa.

17 # Wona ni ka: Levh. 20:9; Mat. 15:4; Mar. 7:10. Awule a ruketelako tate wakwe mwendo mame wakwe, a na dawa.

18Ngako vathu vambidi va txi phikizana va txi lwa ngu txawe, mmweyo wawe e peka mmwani ngu dirigwi mwendo txibhakela, asi fi, aniko a txi otela ha ditahoni, 19se ngako a txi khukha e tsimbila-tsimbila hahanze na a txi txheketela ngu ndonga, sekoko awule a nga mpeka a na divalelwa; aniko a na m'diha mbimo yile a nga jiyela, kambe a na mkondeta eza e kalamuka.

20Ngako m'thu wokari a txi peka txithumi txakwe txa wamwamna mwendo txa wamsikati ngu ndonga, aha koza txi txi fa ngu dianza dakwe, a na tsayiswa; 21kambe ngako txi txi hanya amu ka ditshiku dimwedo mwendo masiku mambidi, kha na mbi tsayiswa, nguko i male yakwe.

22Ngako vathu va txi lwa, va txi peka mrumbu wa wamsikati wule a ku ni txirumbu aha koza e holota, aniko ene asi fi; a na dihwa ngu mtengo wule mkatakwe a no wu lava, kambe a na dihela masoni ka vathethisi. 23Aniko ngako wamsikati a txi dawa, sekoko a na dihelwa wutomi ngu wutomi, 24#Wona ni ka: Levh. 24:19-20; Dhewut. 19:21; Mat. 5:38.diso ngu diso, dikwasa ngu dikwasa, mkondo ngu mkondo, 25kuhiswa ngu kuhiswa, ku dayiswa ngu ku dayiswa, kuganyatwa ngu kuganyatwa.

26Ngako m'thu a txi peka khumbi yakwe ya wamwamna mwendo ya wamsikati, e yi dayisa diso di za di onheka, a na yi leka yi tsula walo ngu mhaka ya diso da yona. 27“Ngako a txi kunula dikwasa da khumbi yakwe ya wamwamna mwendo ya wamsikati, a na yi leka yi tsula ngu kutxhatxheka, ngu mhaka ya dikwasa da yona.”

Milayo ngu mhaka ya tiphango

28“Ngako homu yokari yi txi dhina wamwamna mwendo wamsikati ngu titxheho ta yona eza a txi fa, homu yoneyo yi na baliselwa ngu marigwi, ni nyama ya kona kha yi na mbi dyiwa; aniko nyamne wa kona a na divalelwa mnandu.” 29Aniko ngako homu yi di zivisilwe to nja tshofu, ni nyamne wa yona a di zivisilwe a sikombi kukhatala a txi yi sunga, homu yi na baliselwa ngu marigwi, ngako yi di date wamwamna mwendo wamsikati, ni nyamne wa kona a na tsayiswa ngu kudawa. 30Ngako a txi dihiswa, sekoko a na dihiswa ngu mtengo wa male yi yi dinganako wutomi wakwe, nga ti va no m'gelisa tona. 31Ngako homu yi txi daya mfana mwendo dihorana, txithethiso txa kona txi mahiswa toneto ni txona; 32aniko ngako homu yi txi dhina khumbi ya wamwamna mwendo ya wamsikati, nyamne wa homu a na diha ngu male ya magumi mararu a maxekele a silivhela ka nyamne wa khumbi, ni homu ya kona yi na baliselwa ngu marigwi.

33Ngako m'thu a txi leka diphala di di asamile, mwendo wo kela diphala asi tshumeli a txi di kuletela, se ka dona ku txi hojomela homu mwendo mbongola, 34nyamne wa dona diphaledo, a na diha ngu male ka nyamne wa txihari ngu mtengo wa txona, aniko txihari atxile txi nga dawa txi na va txi txi mlumba ene. 35Ngako homu ya m'thu wokari yi txi dhina homu ya mmwanwe yi txi fa, sekoko va na xavisa homu yile yi hanyako va txi abana male ya kona, se ni nyama ya homu yile yi nga dawa, va na abana kambe nyama ya kona. 36Aniko ngako ti di zivisilwe ati to homu yile yi ni tshofu, se nyamne wa kona a sa khatala ngu mhakeyo, nga ti ti nga txi laveka, a na tshumeta ngu yimwani homu, ngu nyama ya kona yi na lumba ene.

Currently Selected:

Eksodha 21: BEC2016

Highlight

Copy