Ekleziyaste 4
4
1Msana keto, ni to engeta ni wona sotshe sixaniso si si mahekako hahatshi ka ditambo; se ni to wona mirongo ya vale va xaniswako, ni ya vale va pwatako mthaveleli; kambe mtamo wu ti ti ka didhawa da vaxanisi vawe; aniko vona va si nga ni mthaveleli ni wammweyo. 2Ngu mhaka yeto, ni dhumisa vale va nga fa, kupinda vale va ku ngadi va txi hanya. 3Kambe awule i ku txhuko kupinda votshe, ngu wule a sanzi kuvelekwa; a nga mbi wona mithumo yo biha yi yi mahekako hahatshi ka ditambo.
4Kambe ni to wona ti to wotshe mthumo, ni kotshe ku ti ningela kuthumani, si tisa kubavelwa ka m'thu, ngu mwakelani wakwe. Eto ni tona mbukanganyisi, ni kuxaniseka ka moya. 5Txiphukuphuku txi khutarela mawoko a txona, txidya nyama ya mmidi wa txona. 6I txhuko dianza dimwedo do tala ngu kuthutha, kupinda manza mambidi o tala ngu mthumo ni kuxaniseka ka moya.
7Ni to tshembereka kambe ni wona wukanganyisi hahatshi ka ditambo. 8Ku ni m'thu mmweyo i ku ekha, kha ku na wa wumbidi; ina, ene kha na mwanana mwendo ndiya; hambi keto, wotshe mthumo wakwe kha wu nga ni magwito, hambi maso akwe kha ma kolwi ngu thomba; kha wombi ku khene: Ni thumela mani ani, ni txi ti tona makatekwa kani? Eto ni tona mbukanganyisi, kambe mthumo wo karata.
9I txhuko kuva vambidi kupinda mmweyo, nguko va ni txhatxhazelo ya yinene ka mthumo wawe. 10Nguko ku txiwa mmweyo, a na wuswa ngu mmwani; aniko dikhombo ka wule a ku ekha; nguko a txiwa, kha na mbi mana wo muwusa. 11Ngako va txi otela i di vambidi va futumetana; aniko wammweyo dwe, a na futumelisa kutxani kani? 12Se ngako wokari a txi lava kulwa ni mmweyo wawe, va na mlwisa ngu wumbidi wawe; kambe dijoke do petwa kuraru, kha di kuluveti kubhenuka.
13I txhuko dijaha di i ku txisiwana di di txharihile, kupinda mfumeli wo kumba wa txiphukuphuku, awule asi tumeliko kukawukwa. 14Nguko mmwani a huma ngu mkorani a txi ya fuma; ina, awule a nga velekwa i di txisiwana mfumoni kwakwe. 15Ni to wona votshe vo hanya va txi tsimbila hahatshi ka ditambo, kumweko ni dijaha dile di no zumba ka wukhalo wa mmwani. 16Votshe vathu kha va nga ni magwito, votshe vale a va fumako; ni ka kudotho, tiveleko takwe, kha ti na mbi mtsakela. Ngu ditshuri eto ni tona mbukanganyisi, ni kuxanisa moya.
Currently Selected:
Ekleziyaste 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
