2 Samuwele 24
24
Dhavhidha e ruma ti to kubalwa vathu
1Se kuhenya ka Mkoma ku to engeta kuwukela va ka Israyeli, ene a to kujetela Dhavhidha ku va wukela a txi khene:
Tsula u ya bala va ka Israyeli ni va ka Judha.
2A to khene koko, mfumeli ka Jowabhi, mthangeli wa dibutho da yimbi, wule a nga ti nayo: Konkuwa, rendeleka ka totshe tihunzu ta ka Israyeli, kukhukhela Dhani kala Bherisebha, u bala vathu, kasiku ni ziva mtengo wawe.
3Sekoko Jowabhi a to khene ka mfumeli: Mkoma Txizimu txako a na engetele ka 100 mtengo wa vathu vava, ni maso a mfumeli, nyamne wangu ma na ti wone; kambe ngu kutxani mfumeli, nyamne wangu e navela kuziva mhaka yiya kani?
4Ngu kumaha keto, dipswi da mfumeli di to xula Jowabhi ni vathangeli va dibutho da yimbi. Jowabhi koko ni vathangeli va dibutho yimbi, va to khukha masoni ka mfumeli veya bala vathu va ka Israyeli. 5Se va to txhatuka Jordhani veya gova hafuhi ni Aroweri, ngu didhawa da txinene ka didhoropa, di di ku hagari ka mkova wa Gadhi, hafuhi ni Jazeri. 6Se va toya Gileyadhi ni ka ditiko da Mkovani ka Kadhesi, veya hoka ni Dhani-Jahani ni madhawani ka Sidhoni. 7Se va to ya mkhokholani ka Tiro, ni ka otshe madhoropa a Vahevhi ni a Vakanana, ve huma ngu didhawa da wulambwe ka Judha, veya Bherisebha. 8Ngu kumaha keto, va to ranganyeta dotshe ditiko, kambe msana ka mtxhanu wa mitxima ni mune ni magumi mambidi a masiku, va to tshumelela Jerusalema. 9Se Jowabhi a to ya ninga mfumeli mtengo wa vathu va va nga balwa: Va ka Israyeli i ti ti 800.000 wa vavamna vo lwa yimbi, va nga ti sikota ndiwita ditxhari; se va ka Judha i ti ti 500.000 wa vavamna.
10Se msana kova va di batwe vathu, mbilu ya Dhavhidha yi to panda, kambe Dhavhidha a to khene ka Mkoma: Ni onhile ngutu ngu ti ni nga maha, kambe konkuwa, awe Mkoma, ni kombela ku u thavisa kuonha ka txithumi txako, nguko ni mahile wuphukuphuku wa hombe.
11A di wukile koko Dhavhidha ni mixo, dipswi da Mkoma di to ta ka mprofeti Gadhi, m'huti wa Dhavhidha di txi ta kha dona: 12Tsula u txi ya khawe ka Dhavhidha: Mkoma a womba tiya: Na kuninga simaho siraru; sawula tximwetxo ka sona, ti to ni ku mahela. 13A to ta koko, Gadhi ka Dhavhidha e ta m'zivisa mhaka yiya, a txi khene: U lava ti to mtxhanu wa malembe ni mambidi a nzala me maneka ditikoni kwako; mwendo ti to u tutuma mitxima yiraru masoni ka valala vako, na vona va txi kututumisa; mwendo kambe u lava ti to ngu masiku mararu kumaneka mtungu ditikoni kwako kani? Xolisisa konkuwa, u wona ti to i xamulo muni yi ni no ninga wule a nga ni ruma.
14Sekoko Dhavhidha a to khene ka Gadhi: Ni ha kuxanisekani ka hombe; kambe he weleni manzani ka Mkoma, nguko wumbilu wakwe mbwa hombe ngutu; aniko manzani ka vathu ni nga wele kona.
15Sekoko Mkoma a to rumela mtungu ditikoni ka Israyeli, kukhukhela ni mixo kala mbimo yi a nga yi lava; ni ku kukhukhela Dhani kala Bherisebha, ku to fa 70.000 wa vathu. 16Mbimo yile Ngelozi koko yi nga guleta dianza da yona txitimwi ka Jerusalema, kasiku khundumusa, Mkoma a to tilaya ngu wubihi wule; a nje khene ka Ngelozi yile yi nga ti ti xasela hagari ka vathu: Tidingani, konkuwa thavisa dianza dako. Se Ngelozi ya Mkoma yi ti ti emile hafuhi ni txizenda txa Arawuna, Mujebhusi.
17Se ngako Dhavhidha a di woni Ngelozi yile yi nga ti dayela vathu, a to womba ka Mkoma a txi khene: Wona ta ku, ngani ni nga onha, kambe ngani ni nga maha to biha; kambe tinvuta tiya ti onhile txani kani? Ngu kumaha keto, dianza dako di na wele txitimwi kwangu ni txitimwi ka nyumba ya tate wangu.
18Se ka ditshiku donedo, Gadhi a to ta ka Dhavhidha, a txi ta khene kwakwe: Kwelela, u ya aka txiluvelo txa Mkoma txizendani ka Arawuna, Mujebhusi.
19Dhavhidha a to kwelela madingano ni mapswi a Gadhi, nga ti Mkoma a nga ti mleletisile tona. 20Se Arawuna a to wona mfumeli ni sithumi sakwe va txi ta kwakwe; Arawuna koko, a to huma hahanze eya khizama masoni ka mfumeli e namisa khohe hahatshi. 21Arawuna a to khene: A tela txani mfumeli, nyamne wangu ka txithumi txakwe kani? Se Dhavhidha a to khene: Ni tete ku ta xava txizenda txiya kwako, kasi ku ta aka ka txona txiluvelo txa Mkoma, kasiku txitsayiso txiya txi pinda txitimwi ka vathu.
22Sekoko Arawuna a to khene ka Dhavhidha: Teka u ningela awe mfumeli, nyamne wangu, nga ti u ti wonisako tona; ndite tihomu ta mphaxo wo hiswa, ni makange a tona, ni tindonga to hula ngu tona kasi kumaha tikhuni.
23Arawuna a to ningela ka mfumeli sotshe siya, a txi khene kambe ka mfumeli: Mkoma, Txizimu txako a na ku amukele.
24Kambe mfumeli a to khene ka Arawuna: Ahim-him, ni lava kuxava kwako ngu male, nguko kha ni na mbi ningela Mkoma, Txizimu txangu, miphaxo ya kuhiswa yi ni nga yi mana walo. Ngu kumaha keto, Dhavhidha a to xava txizenda ni tihomu ngu mtxhanu wa magumi a maxekele a silivhela. 25Se Dhavhidha a to aka koneho txiluvelo txa Mkoma, e ningela miphaxo ya kuhiswa ni mningelo wa kudikha. Koneko Mkoma a to tsetsa ditiko, se txitsayiso txile txi to guma txitimwi ka va ka Israyeli.
Currently Selected:
2 Samuwele 24: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
