2 Samuwele 23
23
Mapswi o gwita a Dhavhidha
1Se aawa mapswi o gwita a Dhavhidha. Kuwomba Dhavhidha mwana Jese, kuwomba wamwamna wule a nga guletwa txitimwi, awule a nga totwa wa Txizimu txa Jakobe, ni muembeleli wo dhundeka wa ka Israyeli.
2Moya wa Mkoma u wombawombile ngu ngani,
ni dipswi dakwe di ti ti txisofuni kwangu.
3Kuwombile Txizimu txa ka Israyeli
Dirigwi da Israyeli di wombile tiya kwangu:
Ku nava ni mlulami wu a no fumela txitimwi ka vathu,
a na fuma ngu kuthava Txizimu.
4Se a na fana ni kuwonekela ka mixo,
ngako di txi huma ditambo ni mixo ko pwata marefu,
ngu kuwoninga ka dona, msana ka kuva ma di wite mati,
kumilisa mwasi wa mafu.
5Hambi ku nyumba yangu yi si nga ya mamahelo eyo ka Txizimu,
kambe txi mahile txitumelelano txa kwa mbi guma ni nani,
txi ka sotshe txi no leletelwa ni kuvekiswa.
kotshe kuhulukiswa kwangu ni kutsaka kwangu si na va ka txona,
hambi ku asi se kumilisa.
6Kambe vanana va Bheliyali votshe va na fana ni mipa yo tshotshwa kule,
nguko kha ti koteki ku yi ñola ngu manza.
7Aniko ni wuhi wule a yi ñolako a fanela kuva ni simbi mwendo donga;
se yi hiswa do gwita koneho ngu mndilo.
Masotxhwa a nduma a Dhavhidha
(1 Makronika 11:10-47)
8Matina a tindena ti a nga ti nato Dhavhidha ngu awa: Josebhe-Bhasebheti, mwana Takemoni, wa hombe wa vathangeli va yimbi; awuwa i ti Adhino, muezini, a nga lwa ni 800 wa vavamna e va daya ngu mbimo yimweyo.
9Msana kwakwe ku ti ni Eleyazari, mwana Dhodho, wa mwana Ayoyi, mmweyo wa tindena tiraru tile ti nga ti ni Dhavhidha, mbimo yile va nga vhuka Vafilista vale va nga ti sengeletani kulwani, ni mbimo yile vavamna va nga huma ngu Israyeli, 10kambe Eleyazari a to khukha e daya Vafilista, kala kuza dianza dakwe di karala, di zumba di di namarete ka ditxhari; se ka ditshiku donedo, Mkoma a to ninga kuxula ka hombe; se vathu va to tshumela veya handa dwe.
11Se msana kwakwe, ku ti ti ni Sama, mwana Age, Muharari, mbimo yile Vafilista va nga sengeletana ve va dibutho da vathu, ahale ku nga ti ni thembwe yo tala ngu tinyawa, se va ka Israyeli va to tutuma masoni ka Vafilista. 12Awuwa koko, a to ema hagari ka thembwe yile, e yi lwela, e daya Vafilista; se Mkoma a to mninga kuxula ka hombe.
13Kambe vathangeli vararu ka magumi mararu a vathangeli va toya ka Dhavhidha ngu mbimo ya kufunyela ka siyalo, phakoni ka Adhulamu; se dibutho da Vafilista di to gova mkovani ka Refayime. 14Sekoko Dhavhidha a ti ti dikhokholani, kambe vawoneleli va Vafilista va ti ti Bhetlehema. 15Se Dhavhidha a to va ni kunavela, a txi khene: Nga ku na mana wo ni ninga mati a txisima txa Bhetlehema txi ku hafuhi ni txike, ni sela!
16Sekoko tindena tile ta tiraru ti to pinda ngu wugoveloni ka Vafilista, tiya reka mati ka txisima txa Bhetlehema txi ku hafuhi ni txike, ti ma tisa ka Dhavhidha; aniko ene kha ma lava kusela, kambe a to ma theketa masoni ka Mkoma. 17Se a txi khene: Ni xayise awe Mkoma, ti to ni si ti mahi to nga tiya; Ina ani ni di na sela mnoha wa vathu va nga xavisa wutomi wawe kani? Ngu kumaha keto, kha ti lava ku masela. Nguto ti nga mahisa tona tindena tile tatiraru. 18Hambi Abhixayi, mwanawe wa Jowabhi, mwana Zeruiya, i ti mthangeli wa vale va vararu; se awuwa a to guleta ditxhari dakwe e lwa ni 300 wa vavamna e va daya, kambe a to va ni nduma hagari ka vale va vararu. 19Ina wuwa i si nga wa nduma ngutu hagari ka vava va vararu kani? Nguko i ti wo khata kwawe; kambe asi hoki ka vale va vararu vo khata.
20Ni Bhenaya mwana Joyadha, mwanana wa ndena ya Kabhizeyeli, wa hombe ka mithumo yakwe, a to daya tingonyamo timbidi ta mtamo ta Mowabhi; ngene a nga relela eya daya ngonyamo hagari ka diphala, ngu mbimo ya hunguva. 21A to daya kambe wamwamna wa Muegipta, wamwamna wo thaviseka; se Muegipta a ti ni mseve manzani kwakwe, aniko Bhenaya a to m'yela a di ni mtxheketelo, eya honyola mseve manzani ka Muegipta, e m'daya ngu mseve wakwe wupune. 22Atiya ngu ti ti nga mahwa ngu Bhenaya, mwana Joyadha, se a to mana nduma hagari ka tindena tile ta tiraru. 23Hagari ka magumi mararu a tindena, ene i ti wa nduma ngutu, kambe kha hoka ka vale va vararu vo khata; se Dhavhidha a to m'veka kuva mthangeli wa vawoneleli vakwe.
24Asayeli mwanawe wa Jowabhi, i ti mmweyo ka vale va magumi mararu, i ku vava: Elanani, mwana Dhodho, wa Bhetlehema; 25Sama, Muharodhi; Elika, Muharodhi; 26Helesi, mpalita; Ira, mwana Ikesi, mtekoyi; 27Abhiyezeri, muanatoti; Mebhunayi, m'husati; 28Zalimoni, muayoyi; Maharayi, mnetofati 29Helebhi mwana Bhahana, mnetofati; Itayi, mwana Ribhayi, wa Gibheya, wa vanana va ka Bhenjamini; 30Bhenaya, mpiratoni; Hidhayi wa mkovani ka Gahasi; 31Abhi-Albhoni, muaribha; Azimavhete, m'bharumi; 32Eliyabha, wa Sahalibhoni; vanana va Jaseni ni Jonatani; 33Sama, Muharari, Ayamu mwana Sarari, muarari; 34Elifeleti, mwana Ahasibhayi, mwana muahakati; Eliyani mwana Ayitofeli, mugiloni; 35Hezrayi, mkarimeli; Paharayi, Muaribhi; 36Igali, mwana Nathani, wa Zobha; Bhani, m'gadhi; 37Zeleki, Muamoni; Naharayi, m'bheyerote, mnehi wa matxhari a Jowabhi, mwana Zeruiya; 38Ira, mujetri; Garebhi, mujetri; 39Uriya Muheti; i ti magumi mararu ni mtxhanu ni vambidi ku va pata votshe.
Currently Selected:
2 Samuwele 23: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
