2 Samuwele 12
12
Mprofeti Nathani e kawuka Dhavhidha
1 # Wona ni ka: Mas. 51. Se Mkoma a to rumela Nathani ka Dhavhidha; a di wuleta ka Dhavhidha a to ya khene kwakwe: Ku ti ti ni vavamna vambidi ka didhoropa dokari, mmweyo i ti nyatithombe, mmwani i ti txisiwana. 2Nyatithombe a ti ti ni tinvuta ni tihomu ta mikati to tala ngutu; 3aniko txisiwana txi si ngani txilo ni txa tximwetxo, hahanze ka txinvutana tximwetxo, a nga ti xavela e txi fuya; se txona txi to kula mazani kwakwe ni vanana vakwe; txi ti ti dya sakudyanyana sakwe, txi sela mati ngu digombe dakwe, txi otela hamakata kwakwe, txi txi nga mwanana wakwe wa dihorana. 4Se ku to bwaka mpfhumba m'tini ka nyatithombe, a to leka kuteka nvuta ka tinvuta takwe, mwendo homu ka tihomu takwe, kasi ku ta bhikela mpfhumba, a to ya teka txivutana txa wule wa txisiwana e ta bhikela m'thu wule a nga muendela.
5Sekoko kuhenya ka Dhavhidha ku to vhutuka ngutu kuwukela wamwamna wule, se a txi khene ka Nathani: Ni xambanya ngu Mkoma a hanyako, m'thu wu a nga maha eto a fanela kufa.
6Se a na diyela txi nvutana ngu kuningela mune wa sona, nguko a mahile mhaka yo ngeto asi nga ni kupfela wusiwana.
7Sekoko Nathani a to khene ka Dhavhidha: Wamwamna wa kona ngawe! Mkoma Txizimu txa Israyeli a khene: Ani ni ku totile kuva mfumeli txitimwi ka Israyeli, kambe ni ku hulukisile manzani ka Sawule; 8ni ku ningile nyumba ya nyamne wako ni vasikati va nyamne wako hakhana kwako, kambe ni ku ningile nyumba ya va ka Israyeli ni ya ka Judha; ngako siya i di sa sidotho ni di na kuengetela sihi ni sihi. 9Ngu kutxani koko, u nga eyisa dipswi da Mkoma ngu kumaha to biha masoni kwakwe kani? U date Uriya, Muheti ngu ditxhari, u tshumela u teka msikati wakwe wu mmaha wako; kambe u mdate ngu ditxhari da vanana va ka Amoni. 10Konkuwa koko, kha di na mbi ngadi di huma kambe ditxhari nyumbani kwako, nguko u ni eyisile, u teka msikati wa Uriya, Muheti, kuva e maha msikati wako. 11#Wona ni ka: 2 Sam. 16:22. A womba tiya Mkoma: Wona taku ni na kuwusela dikhombo nyumbani kwako, ni na thavisa vasikati vako masoni kwako, ni va ningela ka mwakelani wako, awule a no otela ni vasikati vako ni mitshikari. 12Nguko awe u ti mahile txihujani, kambe ani ni na ti maha masoni ka votshe va ka Israyeli, ni mitshikari.
13Sekoko Dhavhidha a to khene ka Nathani: Ni onhile ka Mkoma. Se a to khene Nathani ka Dhavhidha: Mkoma nene a thavisile txionho txako; khu na mbi fa. 14Hambi keto, ngako ngu mithumo yako u nga ninga wukhalo valala ve ruketela Mkoma, nene mwanana wule a nga velekwa kha ditshuri a na fa.
15Sekoko Nathani a to tsula m'tini kwakwe.
Kufa ka mwanana wa Dhavhidha ni Bhate-Sebha
Mkoma a to peka mwanana awule msikati wa Uriya a nga veleka ni Dhavhidha; se mwanana a to lwala ngutu. 16Se Dhavhidha a to kombelela mwanana ka Txizimu; kambe Dhavhidha e ti tona sakudya, e wulela nyumbani e otela hahatshi wusiku wotshe. 17Sekoko madhota a nyumbani kwakwe ma to khukha me m'yela, kasi kuya m'wusa; kambe ene kha tumela, a to lamba ni kudya navo sakudya. 18Se kumaheka taku, ngu ditshiku da wutxhanu ni mambidi, mwanana e fa; sithumi sa Dhavhidha si to thava ku m'gela taku mwanana a fite, nguko si ti ti kha sona: Wonani taku, mbimo yile mwanana a nga ti hanya, hi wombawombile nayo kambe kha engisa dipswi dathu; hi na m'gelisa kutxani koko taku mwanana a fite kani? Nguko ti na mkarata ngutu.
19Kambe Dhavhidha a to wona sithumi sakwe si txi womba-womba ngu malengo, se e ziva ti to mwanana a fite, aniko Dhavhidha a to khene ka sithumi sakwe: A to fa mwanana kani? Se sona si to kha sona: Ina, a fite.
20Sekoko Dhavhidha a to wuka ngu hahatshi, e samba, e tola mafura, e txhitxha syambalo, e wulela Nyumbani ka Mkoma eya khozela; sekoko a to tshumelela nyumbani kwakwe eya kombela sakudya, ve m'vekela sakudya e dya.
21Se sithumi si to kha sona kwakwe: Nda txani tiya u mahako kani? Mbimo yile mwanana a nga ti hanya wu ti toni sakudya, u dila; kambe msana ka kuva mwanana a di fite, u to wuka, udya sakudya.
22Se ene a to khene: Mbimo yile mwanana a nga ti hanya, ni ti toni sakudya ni dila, nguko ni ti ti khani: Mwendo Mkoma a na ni pfela wusiwana mwanana e hanya. 23Kambe konkuwa a nga fa, ni nga ti tonela txani kambe sakudya kani? Ina ani ni nga sikota ku m'wuyisa kambe kani? Ani ni na tsula kwakwe, kambe ene kha na mbi wuya kwangu.
Kuvelekwa ka Solomoni
24Sekoko Dhavhidha a to thavelela msikati wakwe Bhate-Sebha, e wulela nyumbani kwakwe, e otela nayo; aniko ene a to veleka mwanana wa mfana, e mraya ditina daku i Solomoni; Mkoma a to randa Solomoni. 25Se a to rumela ngu dianza da mprofeti Nathani, se ene a to mraya ditina daku i Jedhidhiya, ngu kuranda ka Mkoma.
Dhavhidha e teka didhoropa da Rabha
(1 Makronika 20:1-3)
26Ngu kumaha keto, Jowabhi a to lwa ni didhoropa da Rabha, da vanana va ka Amoni, e teka didhoropa da wukoma. 27Sekoko Jowabhi a to rumela mitumi ka Dhavhidha, yi txi ya kha yona: Ni lwite ni didhoropa da Rabha, kambe ni tekile didhoropa da mati. 28Konkuwa koko sengeleta vathu va va nga sala, u ya randela didhoropa, u di teka, kasi ku ni txo di teka ani didhoropa, di si dhanwi ngu ditina dangu.
29Sekoko Dhavhidha a to sengeleta votshe vathu, e tsula didhoropani ka Rabha, e yalwa nado, se e di teka.
30Se a to thavisa m'bhoti ha msungo ka mfumeli wa kona; wule kunemela ka wona i nga ti ti ka talenta yimweyo ya nzalama, ka wona ku ti ti ni marigwi a lisima, kambe wu to sanzekwa ha msungo ka Dhavhidha; se a to handa simaha so tala ngutu didhoropani. 31Se a to tisa vathu vale va nga ti ti ka dona, e va veka amu ka mthumo wa masaho, ni mithumoni ka misuka, ni ka matxhapu, e va pindisa ngu ka sikho sa sitini; se a to mahisa toneto ka otshe madhoropa a vanana va ka Amoni. Dhavhidha ni votshe vathu va to tshumela ve wuya Jerusalema.
Currently Selected:
2 Samuwele 12: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
