2 Samuwele 11
11
Dhavhidha ni Bhate-Sebha
1 # Wona ni ka: 1 Vak. 20:1. Se ku to maheka ta ku, ku di pindile dilembe dimwedo, ka mbimo yile vafumeli va nga huma veya kulwani, Dhavhidha a to rumela Jowabhi, kumweko ni sithumi sakwe, ni votshe va ka Israyeli, kuya xasela vanana va ka Amoni ni kuya randela Rabha; kambe Dhavhidha a to sala kona Jerusalema.
2Se ku to maheka tito, ni minova, Dhavhidha a to wuka ngu ha m'bhedhuni kwakwe, e tsimbila-tsimbila txitimwi ka nyumba ya wukoma, kambe a di txitimwi ka nyumba a to wona wamsikati a txi kuwula; se wamsikati wuwa i ti wo tshura ngutu. 3Se Dhavhidha a to ruma vo ya wotisa madingano ni wule wamsikati; kambe va txi kha vona: Ina awuwa hi nga Bhate-Sebha, mwana Eliyami, msikati wa Uriya, Muheti kani? 4Sekoko Dhavhidha a to rumela mitumi ya kuya mteka; se a txi wulela nyumbani ka Dhavhidha, a to otela nayo (nguko a ti ti basisile ka mtxima wakwe); sekoko ene a to tshumela e tsula m'tini kwakwe. 5Se wamsikati a to khura txirumbu, e rumela dipswi ka Dhavhidha, a txi khene: Ni ni txirumbu.
6Sekoko Dhavhidha a to rumela dipswi ka Jowabhi, a txi khene: Ni rumele Uriya, Muheti. Se Jowabhi a to rumela Uriya ka Dhavhidha. 7Mbimo yile koko Uriya a nga ta, Dhavhidha a to wotisa taku, o txani Jowabhi, ni vathu, ni ma tsimbilelo a yimbi. 8Msana keto, Dhavhidha a to khene ka Uriya: Kwetima m'tini kwako, u ya samba minenge yako. Se ngako Uriya a di humile nyumbani ka wukoma, koneko ku to huma siningo ngu ka mfumeli so ya ka Uriya. 9Kambe Uriya a to ya otela ha txikeni ka nyumba ya wukoma, ni sotshe sithumi sa nyamne wakwe, kha ya relela eya m'tini kwakwe. 10Se va to gela Dhavhidha va txi kha vona: Uriya kha ya tsula m'tini kwakwe. Sekoko Dhavhidha a to khene ka Uriya: Kasi khu wuya ngu kuendani kani? U lambete txani kutsula m'tini kani?
11Se Uriya a to khene ka Dhavhidha: Dibhokiso, ni va ka Israyeli, ni va ka Judha, va zumba matendani; Jowabhi nyamne wangu, ni sithumi sa nyamne wangu va govile sitingani; ina ani ni nga wulela nyumbani kwangu, ni dya, ni sela, ni otela ni msikati wangu kani? Na xambanya kwako ni ka muhefemulo wako, kha ni na mbi yi maha eyo mhaka!
12Sekoko Dhavhidha a to khene ka Uriya: Zumba kheno kambe nyamsi, se mangwana na kuleka u tsula. Uriya koko, a to zumba Jerusalema ditshiku dile ni mangwana ka kona. 13Se Dhavhidha a to dhana Uriya veya dya ve sela, e mlevisa, kambe ni minova Uriya a to huma eya otela m'bhedhuni kwakwe kumweko ni sithumi sa nyamne wakwe; aniko kha tsula m'tini kwakwe.
14Se ku to maheka taku, ni mixo ya kona, Dhavhidha a to bhala dipapilo do ya ka Jowabhi, e di rumela ngu dianza da Uriya. 15A to bhala ka dipapilo a txi khene: Vekani Uriya masoni ka yimbi ya hombe; se mi na xexa ngu msana kwakwe, mi msiya ekha, kasiku ve m'daya a txi fa.
16Se ku to maheka koko taku, Jowabhi a di wonisisile kha kwati didhoropa, a to veka Uriya ka wukhalo wule a nga wona to ku ni vavamna va tindena. 17Se mbimo yi vavamna va didhoropani va nga huma ku yalwa ni Jowabhi; ku to dawa vathu vokari ka sithumi sa Dhavhidha, kufa nene Uriya, Muheti.
18Sekoko Jowabhi a to rumela vathu kuya gela Dhavhidha totshe ti ti nga maheka ka nyimbi yile. 19Se a to ningela sileleto ka mtumi, a txi khene: Wu txi heta kugela mfumeli yotshe mhaka ya yimbi yiya, 20se ngako mfumeli a txi henya a txi khene: Mi hokete txani hafuhi ni didhoropa mi txi lwa kani? Ina anu mi si ti zivi taku va na mi fula ngu ha ka diguma kani? 21#Wona ni ka: Val. 9:53. I mani a nga daya Abhimeleki, mwana Jerubheseti kani? Ina hi nga wamsikati a nga rinza dirigwi da txigoyo a di digumani, a di a nga fa ngu dona kona Tebhesi kani? Mi hokete txani digumani kani? Sekoko u na khawe: Txithumi txako Uriya, Muheti, txi fite ni txona.
22Se mtumi wo to tsula, wu ya wulela wu gela Dhavhidha totshe tile Jowabhi a nga mruma tona. 23Se mtumi a to khene ka Dhavhidha: Kha ditshuri, vathu vale va ti ti ni mtamo ngutu kupinda athu, aniko va to hi londeta ve talwa ni nathu txitingani, kambe athu hi to va wukela kala ha txikeni ka ditimba. 24Sekoko vafuli va to fula sithumi sako kukhukhela mmangoni ka diguma, se kufa vokari ka sithumi sa mfumeli; ni txona txithumi txako Uriya, Muheti, txi fite.
25Se Dhavhidha a to khene ka mtumi: Gela Jowabhi u txi khawe: Atiya ti nga ku karate masoni kwako; nguko ditxhari di daya wuhi ni wuhi; tsanisa yimbi yako mi wukela didhoropa mi di xula; u nda ya mtsanisisa toneto awe.
26Mbimo yile koko, msikati wa Uriya a nga tipfa taku mwamna wakwe Uriya a datwe, a to dilela nyamne wakwe. 27Se ku di pindile txidilo, Dhavhidha a to rumela vo ya mteka eya nyumbani kwakwe; kambe a to mmaha msikati wakwe, ene e m'velekela mwanana wa mfana. Kambe mhaka yi ya Dhavhidha a nga yi maha yi ti bihile masoni ka Mkoma.
Currently Selected:
2 Samuwele 11: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
