2 Vafumeli 3
3
Yimbi ya Israyeli ni Mowabhi
1Se Joramu mwana Akabe, a to khata kufuma Israyeli, na a di Samariya, ka dilembe da digumi ni mtxhanu wa malembe ni mararu da Josafati, mfumeli wa ka Judha; se a to fuma digumi da malembe ni mambidi. 2Se a to maha wubihi masoni ka Mkoma; hambi keto kha nga tile a nga mahisa tona tate wakwe ni mwamwakwe; nguko ene koko a thavisile txithombe txa Bhahali a txile txi ngadi mahilwe ngu tate wakwe. 3Hambi ka toneto a to wulela sionhoni ka Jerobhowamu, mwana Nebhate, wule a ngadi onhisile Vaisrayeli: Kha nga dhawukana naso.
4Sekoko Mesa, mfumeli wa Vamowabhi, i ti ti muhodhi wa sifuyo, a to dihela ka mfumeli wa Israyeli 100.000 wa sihambana, ni 100.000 wa tihamba, e ningela ni matoya a kona. 5Se ku to maheka a tito, a txi fa Akabe, mfumeli wa Vamowabhi a to wukela mfumeli wa ka Israyeli. 6Ngu mhaka yeto, ka yona mbimo yile, Joramu a to huma ngu Samariya eya xola kotshe Israyeli. 7A to ya ruma Josafati, mfumeli wa ka Judha, a txi khene: Mfumeli wa ka Israyeli wa ni wukela; u nga tsula ni nani ku yalwa ni Vamowabhi kani? Se mfumeli Josafati a to khene: Ni na kwelela, ani ni na nga awe, vathu vangu, ku nga vathu vako, ni mahantxhi angu ma na nga mahantxhi ako. 8Se ene a nje khene hi na kwelela ngu yihi nzila kani? Ene koko a nje khene: Hi na tsula ngu nzila ya txiwulani ka Edhomi.
9Sekoko Joramu mfumeli wa ka Israyeli, ni mfumeli wa ka Judha, ni wa Edhomi, va to khukha ve horolokela ngu mpimo wo dingana mtxhanu wa masiku ni mambidi, aniko dibutho ni sifuyo va ngadi naso si si mani mati. 10Sekoko mfumeli wa ka Israyeli a to khene: A! Kasiko Mkoma a dhani vafumeli vava vavararu, ku ta va ningela masoni ka Vamowabhi!
11Se Josafati a to khene: Ina ahawa kha ngu nga ni mprofeti wokari wa Mkoma, kuva hi txi na wotisa ngu kwakwe ka Mkoma kani? Mmweyo wa vaprofeti va mfumeli a to xamula ku khene: Ndiyo Elixa mwana Safati, i nga txi thuma kumweko ni Elija. 12Se Josafati a to khene:
Nguyo a ku ni dipswi da Mkoma. Sekoko mfumeli wa ka Israyeli, ni Josafati mfumeli wa ka Judha, ni mfumeli wa Edhomi, va to tsula kuya womba-womba ni Elixa. 13Aniko Elixa a to khene ka mfumeli wa ka Israyeli: Njitxani ni ku natxo ani ni nawe kani? Tsula u txi ya wotisa ka vaprofeti va tate wako, ni ka vaprofeti va mwamwako. Joramu, mfumeli wa ka Israyeli, a to khene: Hi nga tona, nguko Mkoma a dhani vafumeli vava vavararu, kasi ku ta va ningela manzani ka Vamowabhi. 14Se Elixa a to khene:
Ni xambanya ngu Mkoma wa Mabutho a Tiyimbi a hanyako, awu ni ku masoni kwakwe, i ti ku ni si na txithavo ka Josafati mfumeli wa ka Judha, nga ni si rendekeli kwako kambe ni si ku woni. 15Inaka, hi nga ni tiselani m'veti wa ngoma. Ku to maheka a ti to mbimo yile muembeleli a nga txi veta txitende, kutile kwakwe dianza da Mkoma. 16Elixa a ti khene: Mkoma a khene: Kelani maphala amangi, ka mkova wuwa. 17Nguko Mkoma a khene: Kha mi na mbi wona moya, kha mi na mbi wona mati, hambi keto mkova wuwa wu na tala ngu mati amangi, mi na sela anu ni sifuyo sanu, ni sihari sanu.
18Kambe eto ndidotho masoni ka Mkoma; a na ningela vathu va Mowabhi manzani kwanu. 19Mi na honyola otshe madhoropa a mtamo, ni otshe madhoropa o sawuleka, mi na gangela yotshe mindonga ya yinene, mi na kuletela sotshe sisima sa mati, mi na onhetela totshe tithembwe ngu marigwi.
20Ku to maheka ti to ni mixo, mbimo ya mningelo wa sakudya, mati ma txi ta ngu nzila ya Edhomi, se mafu ma to tala ngu mati.
21Mbimo yile votshe vathu va Mowabhi va nga pfa to kha vona votshe vafumeli va kwelete ku yalwa navo, va to dhana votshe vale va ngadi sungile tibhande ve kwelela, veya zingela ngu mihinganoni. 22Ngu mabimbi-kutxa va to wuka, se aha di nga guleka ditambo txitimwi ka mati, mati ma to bhilivila, se vathu va Mowabhi masoni kwawe, va to ma wonisa ku nga mnoha. 23Se va to kha vona: Awuleya, mnoha; kha ditshuri vafumeli va ti hoxotile ngu matxhari, va dayanile! Anu koko, vathu va Mowabhi, a hi va ñoleleni ngu manza!
24Sekoko va di hokile dizumboni ka va ka Israyeli, Vaisrayeli va to khukha ve peketela Vamowabhi, ve tutuma masoni kwawe; va va xasete tithembweni kwawe, ni ku va dayela. 25Va to halela madhoropa, se mmweyo ni mmweyo a to rinzetela marigwi amu ka tithembwe ta tinene, ve ma maha mimumbu, ve kuletela sotshe sisima sa mati, ve gangela yotshe mindonga ya yinene, hahanze ka Kiri-Hareseti, ngu kona va nga siya marigwi, hambi keto, vatshuli va ti ya ma randela ve ma khundumusela.
26Se mbimo yile mfumeli wa Vamowabhi a nga wona to khene kulwa ka mtsindaveta, a to teka 700 wa vavamna ni matxhari awe, kasi ve kureta mfumeli wa Edhomi, aniko kha va humelela. 27Sekoko a to teka mfana wakwe wa matiwula, a nga txi dingana kufuma ka wukhalo wakwe, e maha ngene mningelo txitimwi ka diguma; se ku to maneka gujeguje ya hombe ka Israyeli; ngu mhaka yeto, va to tiwuka ve tshumelela ditikoni kwawe.
Currently Selected:
2 Vafumeli 3: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
