2 Vafumeli 2
2
Kugulwa ka Elija e tsula nzumani
1Ku to maheka taku mbimo yile Mkoma a nga lava kugula Elija ngu txivhunguvhungwani eya nzumani, Elija a to khukha Giligali kumweko ni Elizewu. 2Se Elija a to khene ka Elizewu:
Sala kona hawa, Mkoma a ni rumile kuya Bheteli.
Aniko Elixa a to khene:
Ni xambanya ngu Mkoma a hanyako, ni moya wako wu hanyako a ti to kha ni na mbi kuleka.
Se va to tsula kumweko Bheteli. 3Sekoko vanana va vaprofeti va nga txi maneka Bheteli, va to huma veya ka Elixa va txi ya kha vona:
Wa tiziva to nyamsi Mkoma a teka mthangeli wako ngu txitimwi ka msungo wako kani?
Elixa a to khene hambi ani na tiziva kha kwati eto; anu malalani.
4Se Elija a to khene: Elixa, sala kona hawa, nguko Mkoma a ni rumile kuya Jeriko. Aniko ene a nje khene:
Ni xambanya ngu Mkoma a hanyako ni moya wako wu hanyako a tito, kha ni na mbi kuleka. Se va to ta Jeriko.
5Sekoko vanana va vaprofeti va nga txi maneka Jeriko, va to tshuketela ka Elixa, va txi ya kha vona: Wa tiziva to nyamsi Mkoma a teka mthangeli wako ngu txitimwi ka msungo wako kani? Hambi ani na tiziva kha kwati eto; anu malalani.
6Se Elija a to khene ka Elixa:
Sala kona hawa, Mkoma a ni rumile kuya Jordhani. Aniko ene a to khene:
Ni xambanya ngu Mkoma a hanyako, ni moya wako wu hanyako, kha ni na mbi kusiya. Se ngu kumaha keto va to tsula votshe. 7Se mtxhanu wa magumi a vavamna, i ku vanana va vaprofeti, va to ema ngu masoni:
Se vona ngu wumbidi wawe va to ema Jordhani. 8Sekoko Elija a to peta dijasi dakwe, e peka mati, me abaneka ngu madhawa mambidi, va to txhatuka ngu wumbidi wawe, ku ti omile. 9Sekoko mbimo yile va ngadi txhatukile, Elija a to khene ka Elixa:
Ni kombele ati u ti lavako ku ni txi ku mahela, ni sanzi kuthaviswa hafuhi kwako. Elixa a to khene: Ni kombela moya wako txitimwi kwangu, na wu di wuyeletilwe kambidi.
10Se ene a to khene: U kombete tximaha txo nemela. U txa nga ni wona ni txi thaviswa hafuhi kwako, ti na maheka eto u kombelako; hahanze keto kha ti na mbi ku mahekela.
11Se mbimo yile va nga txi tsimbila na va txi bhula, ku to humelela txikotxikani txa mndilo ni mahantxhi a mndilo, si txi va dhawukanisa, se Elija a kwelisileto nzumani, ngu mu ka txihuhuri. 12#Wona ni ka: 2 Vafu. 13:14. Mbimo yile Elixa a nga muwona, a to kwangula a txi khene: Nzikotxikani sa mndilo ni vagadhi va mahantxhi! Se khaswa a di mwoni kambe. A to juwela ka syambalo sa kona, a txi si bhanda ngu madhawa mambidi. 13Se a to rola dijasi da Elija di nga ti wite, e tshumela eya ema likasani ka Jordhani. 14A to teka dijasi dile di nga ti wite ngu ka Elija, a to peka mati a txi khene:
Ahani Mkoma, Txizimu txa Elija kani? Sekoko a to peka mati me abaneka meya khe ni khe; se Elixa a to pinda.
15Mbimo yile va nga mu wona vanana va vaprofeti, na va di rendekelani ni Jeriko, va to kha vona:
Moya wa Elija wu khandamile ka Elixa.
Se va to mu hingeta ve ta mu khizamela. 16Sekoko va to kha vona kwakwe:
Wa txi wona txithumi txako ni mtxhanu wa magumi a tindena; va leke ve tsula kuya teka mthangeli wako; ti nga nda maheto na a di gutwe ngu Moya wa Mkoma, wu txi ya mu tshotsha ka wumwewo wa mmango, mwendo ka mkova wokari.
Sekoko ene a txi khene: Mi nga va rumeleni.
17Aniko va to mkhokhonisa eza e womba ku khene: Va rumeleni. Se va to rumela mtxhanu wa magumi a vavamna, va txi ya mlava masiku mararu, kha va gwitisa ku mmana. 18Sekoko va to tshumelela Jeriko, eyo a ngadi sate kona, a nje ku va gela tiya:
Ina kha na womba ku mi nga tsuleni kani?
Mati o sawulekiswa ngu Elixa
19Se vavamna va didhoropani mule, va to kha vona ka Elixa:
Hi nga wona tinyumba tiya ta tinene ta didhoropa diya, ngako nyamne wangu a ti wonako apune; aniko mati ma biha, mafu kha ma ningi dibhindu.
20Se Elixa a to khene:
Ni ningeteni txibhembzana txatxiphya, mi di thete mnyu ka txona. Va to mningeta. 21Sekoko mnyu wuleya a to ya wu thela txisimani, e gwita a txi khene: Mkoma a khene:
“Ni na basisa mati awa, kha ku na mbi ngadi kuva ni lifo, hambi ni wufule.”
22Se mati ale ma to basa, kala ka ditshiku da nyamsi, madingano ni dipswi dile a nga ti di wombile Elixa.
Vafana va sipoyilela
23Sekoko a to khukha ngu konaho e wulela Bheteli. Mbimo yile a nga txi kwelela ngu nzila, ku to humelela vafana vokari vavadotho ngu didhoropani, va txi mpoyilela va txi kha vona:
Kwelela nyalipalawe, kwelela nyalipalawe!
24Se mbimo yile Elixa a nga tshembereka e wona msana, a to va ruketela ditinani ka Mkoma. Sekoko ku to huma singwingwi ngu mu ka txitxhotxhota, si vhandamulela vafana vale va mune wa magumi ni vambidi.
25Se a to khukha e tsula mmangoni ka Karmeli, nguho a nga tshumelela kona eya Samariya.
Currently Selected:
2 Vafumeli 2: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
