2 Vafumeli 20
20
Kukalamuka ka mfumeli Ezekhiya
(2 Makronika 32:24-26; Isaya 38:1-8,21-22)
1Ka ona ale masiku, Ezekhiya a lwate hafuhi ni kufa; se mprofeti Isaya, mwana Amosi, a tile kwakwe a txi ta khene: Mkoma a khene: “Lulamisela nyumba yako, nguko u na fa, khu na mbi hanya.”
2Sekoko a to tshemberisa khohe e wonetela disetani, se e khongela ka Mkoma, a txi khene:
3Awe Mkoma! Alakanya taku ni tsimbite ditshurini, ngu mbilu yo thembeka, ni mahile to lulama masoni kwako, se a to dila ngutu Ezekhiya.
4Ku to maheka taku asi se huma Isaya ngu hagari ka m'hubhe wa nyumba ya wukoma, di tile kwakwe dipswi da Mkoma, di txi ta kha dona:
5Tshumela u txi ya khawe ka Ezekhiya, mthangeli wa vathu vangu: Mkoma, Txizimu txa tate wako Dhavhidha, a womba tiya: Ni engisile mkombelo wako, ni woni mirongo yako; sekoko ni na kukalamukisa; ka ditshiku da wuraru, u na kwela Nyumbani ka Mkoma. 6Ni na engetela digumi da malembe ni mtxhanu ka masiku ako, kambe ni na kuhulukisa manzani ka mfumeli wa Asiriya, awe ni didhoropa diya; ni na emela didhoropa diya ngu lirando langu, ni kuranda txithumi txangu Dhavhidha.
7Isaya a to engeta a txi khene: Tekani tximbwanda txo mahwa ngu makuwa. Se va to txi teka ve nameka aha ka txilonda, a so kalamuka.
8Se Ezekhiya a to wotisa ka Isaya ku khene: Ngu txihi txikombiso txaku Mkoma a na ni hanyisa, niku ngu ditshiku da wuraru ni na kwela Nyumbani ka Mkoma kani?
9Se Isaya a to khene: Mkoma a na kuninga txikombiso txaku, ene Mkoma a na maha tile a nga womba to khene: Ina mtsudi wu na ya masoni ngu digumi da mazambo, niku wu na tshumelela msana ngu digumi da mazambo kani?
10Sekoko Ezekhiya a to khene: Ta hehuka kuwekela mtsudi ngu lipimo la digumi da mazambo; ti nga maheke eto, mtsudi wu na wuye ngu lipimo la digumi da mazambo.
11Sekoko mprofeti Isaya a to khongela ka Mkoma; se a to wuyisa mtsudi ngu lipimo la digumi da mazambo, i ku mazambo ale diwatxhi da ditambo da Akazi di nga ti wekete ngu ona.
Vakombisi va Bhabhilona
(Isaya 39:1-8)
12Ka yona yile mbimo Merodhake-Bhaladhani, mwana Bhaladhani, mfumeli wa Bhabhilona, a to rumela mapasi ni txihiwa ka mfumeli Ezekhiya, nguko a ti ti pfite taku Ezekhiya a ti nga lwala. 13Se Ezekhiya a to va amukela kha kwati, e va komba yotshe nyumba ya thomba yakwe, silivhela ni nzalama, ni sithimbelo so nungela, ni mafura o bhumula, ni nyumba yakwe ya matxhari, ni sotshe sile si ngadi sisangalani kwakwe; kha ka nga ve ni txa tximwetxo a nga mbi va komba, hambi txa nyumbani kwakwe, mwendo txa wukoma wakwe. 14Sekoko mprofeti Isaya a tile ka mfumeli Ezekhiya, a txi ta khene: Vavamna vale va ti kha vona txani, niku va khukhete hani va txi ta kwako kani? Se Ezekhiya a to khene: Va tile ngu ka ditiko da kule ngutu, i ku Bhabhilona.
15Isaya a to khene: Va woni txani nyumbani kwako kani? Ezekhiya a to khene: Sotshe si ku nyumbani kwangu, va si woni; kha ku nga ni txa tximwetxo txi ku sisangalani kwangu ni nga mbi va komba.
16Sekoko Isaya a to khene ka Ezekhiya: Engisa dipswi da Mkoma. 17Mata masiku awa aku sotshe si no va si diho nyumbani kwako, si nga sengeletelwa ngu vatate vako kala ka ditshiku da nyamsi, si no tekwa si tsuliswa Bhabhilona; kha ku na mbi sala ni txa tximwetxo, kuwombile Mkoma. 18Hambi ni vanana vako ava u no va veleka, va na tekwa ve tsuliswa kuya mahwa mithenwa, nyumbani ka mfumeli wa Bhabhilona.
19Sekoko Ezekhiya a to khene ka Isaya: Ndinene dipswido da Mkoma u nga ni gela. A to womba kambe ku khene: Ina ku na pwateka kuthutha ni ditshuri ka masiku a kufuma kwangu kani?
Magwito a kufuma ka Ezekhiya
(2 Makronika 32:32-33)
20Kasi ngu kutala ka mithumo ya Ezekhiya, ni mtamo wakwe wotshe, ni txisima txi a nga txi maha, ni nzila yo tsimbitisa mati me wulela didhoropani, ina ti nga va ti sa bhalwa amu ka dibhuku da Matimu a vafumeli va ka Judha kani? 21Se Ezekhiya a to otela ka vatate vakwe; se mwanana wa kona Manasi, a to fuma ka wukhalo wakwe.
Currently Selected:
2 Vafumeli 20: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
