2 Vafumeli 19
19
Mfumeli Ezekhiya a kombela wudhota ka Isaya
(Isaya 37:1-7)
1Se mbimo yile Ezekhiya a nga ti mu engisete, a to vharulela syambalo sakwe, e ti fenengeta ngu disaka, se e wulela Nyumbani ka Mkoma. 2Sekoko a to rumela Eliyakimu, mthangeli wa nyumba ya wukoma, ni mabhalani i ku Sebhina, ni madhota a vaphaxeli va di fenengete masaka, ka mprofeti Isaya, mwana Amosi. 3Va to ya m'gela ku kha vona: Mfumeli Ezekhiya a khene: “Ditshiku diya da nyamsi ditshiku da xomulo ni kutxhipiswa, ni kuruketelwa; nguko vanana va hokile kuhefemulwani, kambe kuwalo mtamo waku va txi velekwa. 4Ti nga nda maheka ti to Mkoma Txizimu txako, a txi engisa otshe mapswi a Rabhisake, awule a nga rumwa ngu nyamne wako, i ku mfumeli wa Asiriya, ku ta duka Txizimu txa kuhanya; khongelela sotshe sile u si alakanyako.”
5Se sithumi sa mfumeli Ezekhiya va to ta ka Isaya. 6Isaya a to khene: Wombani tiya ka nyamne wanu: Mkoma a khene: U nga thave mapswi ale u nga ma pfa, ale si nga ni ruketela ngu ona sithumi sa mfumeli wa Asiriya. 7Wona ati to ni na thela moya kwakwe, se ene a na pfa diguwa, a na tshumelela ditikoni kwakwe; ngu ditxhari ni na mmaha ewa ditikoni kwakwe.
Vasiriya ve lwisa kambe
(Isaya 37:8-20)
8Sekoko Rabhiseke a to tshumela, a to ya mana mfumeli wa Asiriya a txi lwisa didhoropa da Libhina, nguko a di ti pfite taku mfumeli wa Asiriya a khukhile ngu Lakisi. 9Mbimo yile ene a nga pfa taku Tiraka i ku mfumeli wa Etiyopiya wa huma, a lava ku kulwisa, a to engeta e rumela mitumi ka Ezekhiya, a txi khene: 10Mi na ya khanu ka Ezekhiya mfumeli wa ka Judha: “U nga ti xenge, Txizimu txako txile u txi thembako u txi khawe: Jerusalema kha na mbi ningelwa manzani ka mfumeli wa Asiriya. 11Se u khala ku tipfa tile va khalako kumaha vafumeli va Asiriya ka otshe mafu; ngu ku ma fuvisa otshe; se ina awe u na ti txhatxhisa eko kani? 12Ina ma nga va ma di txhatxhisilwe ngu sizimu sa mifumo yile yi nga fuviswa, i ku madhoropa a Gozani, Harani ni Rasefi, ni ka vanana va Edheni, va nga txi zumba Telasari kani? 13Kumahilwe txani ka mfumeli wa Hamati, ka mfumeli wa Aripadhe, wa Sefarvayimi, wa Hena, ni wa Ivha kani?”
14Sekoko mbimo yile Ezekhiya a nga amukela mapasi ngu manzani ka mitumi e ma gonda, a to wulela Nyumbani ka Mkoma; Ezekhiya a to ma ateta masoni ka Mkoma. 15#Wona ni ka: Eks. 25:22. A to khongela masoni ka Mkoma a txi khene: Awe Mkoma, Txizimu txa ka Israyeli, u zumbako hagari ka Makerubhima, awe upune ngawe wekha u ku Txizimu txa yotshe mifumo ya ha mafuni; awe u vangile tinzuma ni mafu. 16Namisa nzeve yako Mkoma, u engisa; tula maso ako Mkoma u wona: Hi nga pfa mapswi a Senakeribhe a nga ma rumela ku ta emisana ni Txizimu txa kuhanya. 17Ditshuri ngu diya, awe Mkoma, vafumeli va Asiriya va xasete mifumo ni mafu a kona. 18Va tshotshile sizimu sawe mndiloni, ngako i nga si nga sizimu sa txilo, aniko i ti mithumo ya manza ya vathu, nzithombe so mahwa ngu mapulango ni marigwi; ngu mhaka yeto, va si khundumusete. 19Konkuwa koko, awe Mkoma, Txizimu txathu, thumelwa ngu kuva u di hi txhatxhisile, ngu kumaha keto, yotshe mifumo ya ha mafuni yi na tiziva ti to ngawe wekha u Mkoma Txizimu.
Mahungu a Isaya ka mfumeli Ezekhiya
(Isaya 37:21-38)
20Sekoko Isaya mwana Amosi, a to khene ka mfumeli Ezekhiya: Mkoma, Txizimu txa ka Israyeli, a khene: A tile u nga ni kombela ngu mhaka ya Senakeribhe, mfumeli wa Asiriya, ani ni ti engisile. 21Dipswi di a ngadi womba Mkoma ngu mhaka yakwe ngu diya: Wo tuma, mwanana wa Siyoni wa dihorana, wa kutxhipisa, wa kupoyilela; mwanana wa Jerusalema wa dihorana wa zinginisa msungo msana kwako. 22U phikizanile ni mani niku u ruketete mani kani? U kwangulete mani ni kuguleta maso txiluveloni kani? U mahete ani Msawuleki wa Israyeli kani? 23Ngu mitumi yako u lwisile Mkoma u txi khawe: Ngu kutala ka sikotxikani sangu, na kwelela ani txitimwi ka mimango yo sawuleka, ya didhawani ka Libhanoni, ni na gangela mikedhari yakwe yo lapha, ni mikhure yakwe yo tshura, ni na wulela kala mtungwe ka tinyumba takwe, kala ka sitinga sakwe so nona. 24Ni kete mati o biha ni sela, ngu mikondo yangu ni na omisa yotshe minambo ya makhalo o tsana.
25Ina u nga va u sa tipfa taku ngu kale ni ti mahile toneto, niku kukhukhela masiku a kale ni si vangile kani? Sekoko konkuwa ni ku tisile, kuva u ta khozisa madhoropa a mtamo me maha situletule sa siwula. 26Ngu kumaha keto va zumbi va kona, ngu manza o sawuleka, va to xamaliswa, ve kanganyiseka; ku nga mwasi wa txitingani, ni wotshe mwasi wo nakana, ni mwasi wo tshulela tinyumba, ni fulaho yo hiswa yi si se kula.
27Hambi keto, kukhalahatsha kwako ni kuhuma kwako, ni kuwulela kwako, ni ku ni henyela kwako, na kuziva. 28Ngu mhaka ya ku ni henyela kwako, niku kuhenya kwako ku pfate ka tinzeve tangu, sekoko ni na vekela tximemba txangu thonvuni kwako, ni matomu angu txisofuni kwako, ni kutshumeta ngu nzila yile u nga ta ngu yona.
29Txikombiso txa kona ngu txiya: Dilembe diya ku na dyiwa sile si no mila sipune, se ka dilembe di tako sile si no huma; sekoko da dilembe da wuraru, phayani mi funyela, mi phaya mivhinya, mi txi dya mihando ya kona. 30Nguko va nyumba ya ka Judha avale va nga huluka, va tshumela ve zima mikoloti hahatshi, ve wonekisa mihando txitimwi. 31Nguko ngu Jerusalema ku na huma vale va nga sala, se ngu mmangoni ka Siyoni avale va nga huluka; kuthembeka ka Mkoma ku na maha eto.
32Ngu toneto, Mkoma a womba tiya ngu mhaka ya mfumeli wa Asiriya: Kha na mbi wulela ka diya didhoropa, hambi kujangetwa lingove limwelo; kha ku na mbi wulela txitxhangu ni txa tximwetxo, hambi ka mibhala yo sisala ka yona. 33Nzila yile a nota ngu yona, a na tshumela ngu yona, sekoko kha na mbi nga wulela ka diya didhoropa, kuwomba Mkoma. 34Nguko ani ni na emela didhoropa diya, ku na di hulukisa, ngu kuranda kwangu ni kuranda txithumi txangu Dhavhidha.
35Ku to maheka ti to ka wona wusiku wule, kuhuma ngelozi ya Mkoma yi peka 185.000 wa va Asiriya dizumboni kwawe; ni mixo mbimo yile va nga wuka vale va nga huluka, va to wona sirumbi. 36Sekoko Senakeribhe i ku mfumeli wa Asiriya a to khukha e tsula; a to tshumela eya zumba Ninivha. 37Mbimo yile a nga ti namile nyumbani ka txizimu txakwe Nisiroke, vanana va kona i ku Adrameleki ni Saresari, va to m'daya ngu ditxhari; hambi keto, va to thavela ditikoni ka Ararati; se mwanana wa kona Esari-Hadhomi, a to fuma ka wukhalo wakwe.
Currently Selected:
2 Vafumeli 19: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
